"Euskal literaturan pribilegiatua bezala ikusten dut nire burua. Duela hamar urte poemak argitaratzen hasi nintzenean ez nuen erraza ikusten idaztetik edo idaztearen inguruko gauzetatik bizitzea edota ogibide bat izatea. Komikiak irakurtzen zituen ume hari esan izan baliote egunen batean komiki gidoiak idatziko zituela... Alde horretatik beraz zoriontsu ikusten dut nire burua, ez dut kexarik".

Entusiasmoa da idazteko gakoetako bat, Canoren ustez: "Idazle bati gauza asko barkatzen ahal zaiola, baina ezin zaiola entusiasmorik eza barkatu esan ohi dut. Idazleak poz sortzaile bat izan behar du, bestela sufrikarioa litzateke. Alde horretatik nire entusiasmoak bizirik jarraitzen du". Bere literatur bidaiaren unea deskribatu digu: "Hasieran mundu surrealista eta amets giroko batetik abiatu nintzen nolabait, gero, gauza errealistak idazteko gogoa sentitu nuen. Orain erdibide batean nago, errealismo hutsa eta errealismo zikina deitzen diren horiekin pixka bat aspertuta. Erdibide bat topatu nahian ari naiz, gauza errealista baina aldi berean arnasbide pixka bat fantastiko eta metaliterarioa duten gauzak idatziz. Ildo horretatik doa Neguko zirkua".

Idazleen banitateaz aritu gara segidan. Bakartasunean ohituak eta bereziak direla. Bera bakartia den itaundu diogu: "Bai, baina lanean bakarrik. Idazleak bakardadean idazten du, baina jendearentzat sortzen du eta kontzientea da horretaz: hitzaldiak ematen ditu, jendearekin harremana du, hitz egiten du irakurleekin eta lana kontrastatu nahi izaten du. Hartara, inguruko jendeak pistak ematen dizkio. Beraz, bakardadea parte garrantzitsua da idazlearentzat, baina berea bakardade sortzailea da inola ere".

Hona Canok, aukeran, idazle lanbidetik kenduko lukeena: "Kenduko nuke enkarguzko zenbait lanen proportzioa eta presa, denbora mugatuan egin behar izatea. Eta ordainetan irakurtzeko denbora gehiago izan nahi nuke... Bekak idazteko ez ezik irakurtzeko ere eman beharko lituzkete, denbora librea izateko!". Alta bada, ez du bere burua literaturan ez den beste egiteko batean ikusten: "Zaila egiten zait". Inoiz edo behin musikari zapuztua dela aitortu duenez, musikari ikusten ote duen azaldu diogu gaiztoki: "Saiatzen naiz musikariz inguratzen ea zerbait neureganatzen dudan, baina... (irriak). Hara, lehengo batean amets bat izan nuen, idazleok askotan gezurrezko ametsak kontatzen ditugu, baina hau benetakoa da. Taxilaria nintzela amestu nuen. Beraz, idazle izango ez banintz beharbada taxilaria izango nintzateke. Ametsean gustura samar nengoen, hala ere, egin kontu ez dudala autoak gidatzeko baimenik... Baina batek daki, nire etorkizuna taxi-gidari izatea da agian. Liburuen antza dute taxiek: istorioz betetako lekuak dira".