Hirukoaren gehiengo osoa kolokan da
Egungo hiruko gobernuaren gehiengo osoa, hori da kolokan jarri dena EHAK-k Batasunaren boto eskaera jaso zuenetik. Joera nagusietan ez da aldaketarik espero, hauteskundez hauteskunde jasotzen diren emaitzek behin eta berriz adierazten duten bezala. Gobernagarritasunaren ikuspegitik, ordea, eserleku gutxi batzuek funtsezkoak dira Jaurlaritza norabide batekoa edo bestekoa izan dadin. Inkesten arabera, 4-6 izan daitezke EHAK-k lor ditzakeen eserlekuak eta kopuru horrekin, badirudi berak bete dezakeela iragandako legealdian Sozialista Abertzaleek izandako giltza funtzioa. Ikusi behar, dena den, Ezker Batua noraino iritsiko den, eta baita Aralar ere, ataka estuan, iragartzen zaion parlamentaria funtsezkoa izan baitaiteke EHAKrik gabeko gehiengo osoa osatzeko. EHAKren presentziak, dena den, ezin du ezkutatu ilegalizazioek sortzen duten egoera antidemokratikoa. Bakegintzaren pakete osoaren barruan garrantzi berezia hartuz, hurrengo legealdirako konpongai nagusietakoa izango da.
Erresuma Batua Frantziako erreferendumari begira
Maiatzaren 5ean egingo dituzte Legebiltzarrerako hauteskunde orokorrak Erresuma Batuan. Laboristak ala kontserbadoreak izango dira Gobernuan? Laboristak balira, hauteskunde orokor batzuk hiru aldiz jarraian irabaziko lituzketen lehen aldia litzateke. Baina badirudi britainiarrek maiatzaren 5ari beste edo gehiago begiratuko diotela Frantzian 29an Europako Konstituzioaren erreferendumean zer ateratzen den, eta oraingoz inkestek nahiko garbi diote ezezkoa nagusituko dela. Apurka gero eta gehiago ezagutzen ari den Europako Batasunaren (EB) Bolkestein zuzentaraua litzateke ezezko horren arrazoi nagusietakoa. Zerbitzuen liberalizazioa arautzen du honek, 2004ko urtarrilean onartu zuen Europako Batzordeak, baina orain bere atal korapilatsuenetakoak berraztertzen ari dira eta sindikatuek gogor ekin diote bere aurka. Erresuma Batuan, erreferenduma datorren urtean egingo litzateke, jadanik gainerako herrialde gehienen posizioa ezaguna denean. Edozein modutan, EBko estatu bakar batek Konstituzio-Itunari ezezkoa emango balio, berau ez litzateke aurrera aterako. Zenbait adituk dioenez, Europako Batasuneko estatuek jadanik aurreikusia dute B plan bat, oso ezkutuan dagoena, baina berehalakoan indarrean jarriko litzatekeena ezezkoa gailenduz gero. Koldo Gorostiaga eurodiputatu ohiak, esate baterako, hitz egiten zuen B plan honi buruz otsailean LARRUNen egindako Europako Konstituzioari buruzko debatean.
Jon Agirre presoari mokorreko ebaketa egingo diote
Hilaren 14an Jon Agirre 62 urteko preso arrasatearrari mokorreko ebaketa egin eta protesia jarriko diote Donostia Ospitalean. Agirrek 24 urte egingo ditu espetxean maiatzean eta, gaitz desberdinak medio, larri dago. Sarritan eskatu da bere askatasuna, baina oraingoz denetan ukatu zaio eta bere zigorraren azterketa berririk ez badago, 2006ko udan aterako da kalera espetxean 25 urte bete ondoren.
Kontzertu ekonomikoak talka ekarriko ei du Maragall eta PSOE artean
Pasqual Maragall Generalitateko buruak EAJ eta PSE-EEren arteko gobernua hobetsi duela azpimarratzerakoan, albo batera geratu zen kontzertuaren gaia. Maragallek jarraitzen duen oinarrizko gaia da eta Kataluniako Estatutuaren erreforman oinarrizkoa. Gaur egun Nafarroako Foru Erkidegoa eta EAE dira hitzarmen ekonomikoak dituzten erkidego bakarrak. Maragallek beste erkidegoek ere antzerako ereduak izatea nahiko luke eta hori indarrez azaleratzen denean, PSCren eta PSOEren arteko talka saihestu ezina izango ei da analista zenbaiten ustez.
Eusko Legebiltzarrean ez da giro
Jesus Mari Agirre Berezibar Eusko Legebiltzarreko Itzulpen Zerbitzuko buruak izenburu hori jarri dio erabili.com-en argitaratutako iritzi artikuluari. Legealdia amaituta, hausnarketa egin du euskarak Legebiltzarrean bizi duen egoerari buruz. Pozik egoteko arrazoirik dagoenik ez dirudiela dio berak. Legebiltzarkideek ahozko jardunean, osoko bilkuretan, azken bi urteetan, aurreko bietan baino gutxiago hitz egin dute euskaraz; 2004an %10ak eta 2001ean %18ak. Idatzian berriz, Batasuna da idazkiak euskara hutsean aurkezten dituen alderdi bakarra. Gainerako alderdiek gaztelania hutsean aurkezten dituzte. Emakumeen eta gizonen berdintasuna lortzeko hautagai-zerrendetan kuotak jarri diren bezala, euskararekin beste hainbeste zergatik ez den egiten galdetu du Agirrek.
Nafarroako hizkuntza politikako ponentziaren porrota
Bukatu da Nafarroako Parlamentuaren ponentzia. Alderdiek jaso dute txostena eta ez zaio batere gustatu hainbat alderdiri. Aralarrek (bere ekimenez abiatu zen ponentzia) apirilaren 13ko bileran ponentzia bertan behera uztea proposatu zuen eta Batasunak ponentzia herren jaio zela azpimarratu du. Esanak esan, ponentziaren ondoren, ez dago aldaketa handirik euskararentzat. Aldaketa nabarmenena Iruñerriko hizkuntz eremuak berraztertzeko proposamena da.
NUPeko euskararen normalizazioko batzordekideak dimititzeko zorian
Patxi Salaberrik eta Koldo Asironek dimititu zuten eta orain mehatxua egin du batzordeak. Dimititu baino lehen, hamar eguneko epea eman diote Pedro Burillo NUPeko errektoreari. Burilloren erabakiaren zain da orain batzordea. Hilaren 5ean, berriz, batzordeak hamar eguneko epea jartzeko erabakia hartu baino lehen, Nafarroako Unibertsitate Publikoak hurrengo ikasturterako eskaintza onartu zuen. Lehenengo mailan euskarazko derrigorrezko 13 irakasgai berri eskainiko ditu, oraingo kopurua bikoiztuz. Dena den, bi hizkuntzetan ikas daitezkeen irakasgaien eskaintza %12,2koa da.
Euskarazko ekitaldiak laguntzarik gabe utzi ditu Iruñeko Udalak
2004ko martxoan egindako deialdira aurkeztu ziren euskarazko ekitaldiak antolatzen dituzten taldeak. 150 ekitaldik ez du sosik ikusi, horien artean 75 bat hitzaldi eta 25 kontzertu, bertso eta antzerki saio eta bideo emanaldi daude. Talde hauek jakin dute ordea, diru-laguntza horietarako zen dirua (20.000 euro) Udaleko kutxara itzuli dela. Iruñeko Udalak eman die afera honen azalpena: bi langile gaixo egon dira eta ezin izan dituzte diru-laguntza horiek bideratu.
