18/98 auziaren salaketa Bilboko kaleetara
Datorren larunbatean 18/98 makroauziaren aurkako mobilizazio handia egingo da Bilbon. Epaiketa mota hauen atzean dagoen jokaldi politiko osoa salatu nahi da, ETArekiko identifikazioa eta lotura logika eta errealitatetik guztiz kanpo eraman zuen PPren politika haren salaketa gordina. Eta politika hura guztiz lekuz kanpo bazegoen, PSOEko agintari askok ahopeka onartzen dutena, Zapateroren Gobernuak bere ondorioak saihesteko politika moldeak bideratzea litzateke logikoena. Bilbon, azken finean, gisa honetako epaiketa eta errepresio joeren aurkako oihua entzungo da, izan errepresio kolpe hau Segiren aurkakoa edo izan Egunkaria ixteko. Bi urte bete dira, hain zuzen, Espainiako judikaturak Egunkaria itxi zuenetik eta auzi hartan auzipetutakoek Egunkariaren Alde Kultur elkartea sortu dute Juan del Olmo epaileak eraiki eta Espainiako judikaturak sostengatu duen gezur erraldoia desegiteko. Plurala da kaltetutakoen multzoa eta erantzunetan ere antzematen da hori.
ETAren hilketak, desioa eta errealitatea
Estatuko segurtasun indarren lanaren berri ematerakoan aspaldi galdu da froga eta zantzu hitzen esanahi zehatza. ETArekin lotutako atxiloketa eta auzietan bederen hori oso garbia da. Azken bi asteetan izandako atxiloketa mordoxketan, poliziak atzeman duen materiala ETAk hilketei berrekiteko duen asmoaren frogatzat aurkeztu dira, eta komunikazio munduaren eragile gehienek ontzat jo dituzte zantzuak besterik ez direnak. Bere historia kontuan hartuta, ETA oso luzaro ari da inor hil gabe, eta azken hilabete luzeetan egindako atentatu mota ikusita, hilketak saihestera jo duela esan daiteke. Horrek eta sortu den elkarrizketaren aldeko giroak literatura ugari egitera eraman gaitu komunikabideak, seguruenik desioa eta errealitatea nahasteraino. Izan diren atxiloketa eta mugimenduak ikusita, ez dirudi esan litekeenik ETAk hilketak eragitea bere egungo jardunetik baztertu duenik; frogak ez, baina hori sumatzeko zantzuak agertu dira.
18/98 auzia eta Kursaaleko ekitaldia: El País eta El Correoren bi titulu
Kursaalen joan den larunbatean 18/ 98 auziaren salaketa ekitaldiaren ispilu izan nahi dute ondoko tituluek. El País prestigiotsuak zutabe erdi eta honako titulua erabili zituen: «Arzalluz eta Otegi Segiko auzipetuei sostengua emateko ekitaldi batean izan ziren». El Correoko titulua ere ez zen txantxetakoa: «Arzalluzek eta Egibarrek ETAren ingurunearen epaiketaren aurkako ekitaldiari sostengua eman zioten».
The Jerusalem Posteko artikulugilearen begirada Euskal Herrian pausatu da
Hillel Halkin da artikulugilea eta Palestina eta Euskal Herriko egoerei buruzko gogoeta egin du. Ibarretxe Plana hartu du aitzaki, eta Espainiako Gobernuak Euskal Herriari autodeterminazio eskubidea ukatzen diola azaldu du, hain zuzen ere Palestinako arazoa bideratzeko Israeli behin eta berriz gomendatzen dionean. Espainiak eta oro har Europako herrialdeek autodeterminazioaz egiten duten irakurketa bitxia dela dio egileak. Ulertzen duela Euskal Herria eta Palestinako egoera guztiz desberdina dela eskubide eta zapalkuntzari begiratuz gero, baina agian euskaldunek palestinarrak baino estatu premia handiagoa dutela dio, batez ere herri txiki bat direlako eta beren kulturari eusteko gaur egun estatu batek dituen tresna guztien beharra izan dezaketelako. Gogoeta bitxiak, batez ere Jerusalemetik datozelako. www.izaronews.org helbidean irakur daiteke osorik.
Zortzi irakasle postu eta erdi gutxiago Iparraldean
Pirinio Atlantikoetako Eskola Kartari buruzko bilera eginda sindikatuak eta guraso elkarteak haserre atera ziren. Bazekitena baieztatu zieten: Zuberoa, Nafarroa Beherea eta Lapurdiko eskoletatik zortzi irakasle lanpostu eta erdi kenduko zituztela 2005eko ikasturtean, alegia. Haur eskolak eta eskola elebidunak kaltetuenak direla salatu dute sindikatu eta guraso elkarteek. Esate baterako, Zuberoako Altzürüküko eta Larraineko haur eskolak kenduko dituzte.
Patxi Larrainzar ikastetxea leku eske
Eraikin berean daude Ave Maria ikastetxeko ikasleak eta Patxi Larrainzarrekoak. D eredua eskaintzen duen Iruñeko Arrotxapea auzoko eskolak tokia behar du ikasle-irakasleentzat eta Nafarroako Gobernuaren zain dago. Eraikin berria egitekoa zen Gobernua Patxi Larrainzarreko haurrak biltzeko, baina oraindik lanak hasi gabe daude. Hezkuntza Sailari aurreikuspen falta egotzi diote Patxi Larrainzar ikastetxeko arduradunek.
Arabako Foru Aldundiak euskara neurtzeko planaren 3. fasea onartu du
Foru Aldundiak Euskararen Erabilera Normalizatzeko Planaren 3. fasea onartu du eta orain arte bezala, euskararen eskakizuna %24,4 lanpostutan eskatuko da. Plan hau, sail guztietan, 2007. urtera arte izango da indarrean.
Euskara Elkarteen kanpaina bazkideak egiteko
Kanpainak Zein da hizkuntza eta zapaten arteko ezberdintasuna? izena du eta Estitxu Fernandez telebista aurkezle ezaguna eta Kirmen Uribe idazlea aukeratu dituzte kanpaina babesteko. Honako euskara elkarteek antolatu dute kanpaina, besteren artean: Bizkaiko Axola (Abanto), Barriketan (Elorrio) Berbaizu (Deustua), Zorrizketan (Lezama), Euskal Birusa (Ermua); Nafarroako Bierrik (Sakana), Gipuzkoako Dobera (Hernani) eta Pilpilean (Soraluze) eta Arabako Geu (Gasteiz) .
Haika-Segi auzia eta ezinulertuak
Itzultzaileekin arazo ugari izan zuten joan den astean Haika-Segi auzian. Hilaren 15ean saioa eten egin behar izan zuten itzultzailea euskara ulertzeko gai ez zelako eta egindako itzulpenak zeharo kaxkarrak zirelako. Hurrengo egunean, Alfonso Guevara epaileak auzipetuei jakinarazi zien euskaraz deklaratzen segi nahi bazuten hala egiteko, baina itzultzaileei hutsak zuzentzeko aukerarik ez zutela izango. Bigarren egunean ere, itzultzaileekin lasai ez eta Berria, Gara eta Euskadi Irratiko kazetariei itzultzaile lanetan aritzeko eskatu zien Auzitegiko prentsa arduradunak.
