Hauteskundeak eta Batasunaren presentzia
Prozedura, ezetza, Auzitegi Konstituzionala, datozen hauteskunde autonomikoak, ETAren Alacanteko atentatua... Dena saltsa-maltsan eta jira-biraka euskal herritarren buru gainetan. Hauteskunde autonomikoak arte bederen horrela jarraituko du egoerak, argibiderik gabe, Estatutu Berriaren bideratzeak eta bakegintzaren balizko prozesu nagusiek elkarri nola eragingo dioten asmatu ezinik. Ibarretxe Planari dagokionez, hauteskundeen aurreratzea edo ez, hori da mugitzeko geratzen den pieza nagusi bakarretakoa, gainerakoa herritarren esku legoke. Beste frontean, ETAk bere indar metaketaren estrategiarekin jarraitzen du, eta hor bai, gauza asko ikusteko dira oraindik: ETA eta Zapateroren arteko elkarrizketa prozesu niminoena zabalik balego ere, dagoeneko ona litzateke isiltasun handiagoa izatea. Gainerakoan, Batasunak »edo txarrenean honen ordezkoren batek» hauteskundeetan parte hartu ahal izango duen da laster argitu beharko den puntuetakoa.
Kanarietako estatutu erreforma ‘filosoberanista‘ dela salatu du PSOEk
PSOEk gogor kritikatu du Kanariar Uharteetako autonomia estatutuaren erreformarako Coalición Canaria eta PPk prestatu duten aurreproiektuaren zirriborroa. Arbuiatzearen arrazoi nagusien artean, erreformak duen izaera soberanista zalea eta Konstituzioaren aurkakoa izatea. Ez litzateke Ibarretxe Planaren desafio mailara helduko, baina Kataluniako Estatutuaren erreformarako zirriborroak erakutsi duena baino muturrekoagoa bai. Kataluniakoari dagokionez, ERCk kritikatu du Pasqual Maragallek ‘beherapenei’ ekin nahi diela. Datorren udazkenerako Espainiako Diputatuen Kongresuan egotea nahiko litzateke. Andaluziakoa ere garai horretarako aurreikustenda Kongresuan. Aragoe eta Balear Uharteetan otsailean osatuko dira estatutuen erreformak bideratuko dituzten ponentziak. Galiziari dagokioenez, udazkeneko hauteskunde autonomikoen ondoren ekingo diote erreforma prestatzeari.
Andres Urrutiaren kargu hartzearen bi ikuspegi
Hilaren 28an Andres Urrutia Euskaltzainburu berriaren kargu hartze ekitaldian azpimarratutakoei buruzko bi ikuspegi islatzen ziren ondorengo eguneko prentsan. El Mundo eta El Correok era batera ala bestera azpimarratu zituzten Euskaltzainburuaren honako hitzak: «Euskara Espainiako identitatearen sinboloetakoa da». Berriak eta Garak ez zioten aipamenik ere egin hitzei.
Dagokion 600.000 euro jaso ezinik ari da Sozialista Abertzaleen Taldea
Eusko Legebiltzarreko Mahaia eta Auzitegi Gorenaren arteko aurrez aurreko judiziala lehenengoaren alde ebatsi denean, Gasteizko ganberaren Sozialista Abertzaleen Taldeak berari dagozkion 600.000 euro jaso gabe jarraitzen duela salatu du. Mahaiak diru hori ukatu ez dionean, SAren taldeak dagokiona noiz eta nola jasoko duen zain ari da. Legebiltzarra desegitearen atarian, auzi hau orain konponduko ez baltiz, lehen HBri behin baino gehiagotan gertatu zaion moduan, auzitegien bidea izan liteke auziari gera dakiokeen bidea, aurrekoetan legez, bide luzea seguruenik eta korapilotsua, Alderdien Legea dela eta Auzitegi Gorenaren epaiak tartean direlako.
Hizkuntzak eta Immigrazioa mintegia
Nazioarteko mintegia Eusko Jaurlaritzako Kultura Sailak antolatu du UNESCO Etxeko Hizkuntzen Amarauna proiektuko Batzorde Teknikoarekin. Otsailaren 8 eta 9an Bilbon elkartuko diren adituek Euskal Herrian hizkuntza aniztasuna kudeatzeko neurriak proposatu eta eztabaidatuko dituzte. Gonbidatuen artean izango dira Herbehereetako, Suediako, Mexikoko eta Espainiako adituak.
Informatikari Euskaldunen V. Bilkura
Apirilaren 22an, UEUko Informatika Sailaren eskutik antolatuko dute bosgarren edizioa. Gai nagusia Softwaregintzaren erronka berriak izango da. Hizlari adituak eta arituak bilduko dira web zerbitzuei buruz hitz egiteko, baita aplikazio informatikoetako segurtasunari buruz eta osagaien bidezko programazioari buruz hitz egiteko ere. Hitzaldiez gain euskaraz garatutako software-produktuak aurkezteko aukera izango da. Aurkezpenen bat egin nahi duenak otsailaren 18a baino lehen jakinarazi behar die antolatzaileei (arruartesi.ehu.es edo 943015065).
Shanghaiko Euskal Etxea
Txinako lehenengo euskal etxea da. Pekinen, Shanghain, Hong Kongen, Ningbon eta beste hainbat herrialdetan Euskal Herriko enpresen bidez joandako langile batzuek eta hango unibertsitateetan ikasten ari diren ikasleek sortu dute euskal etxea. Presidentea, Juan Ignazio Motiloa, SPRI enpresako bulegoko zuzendaria da.
Euskaltegi pribatuak etorkizuna bermatzeko eske
Euskaltegi pribatuek protestaldia egin zuten urtarrilaren 25ean, Lakuaren aurrean. Euskaltegietako bozeramaileak, Mailu Lasartek, esan zuen Eusko Jaurlaritzak bukatutzat eman nahi duela helduen euskalduntze eta alfabetatzea. Negoziaketen emaitzak ikusita, sektorea lehentasunezkotzat ez dutela hartu nabari dela esan du Lasartek. Administrazioak ikasleko eta orduko 1,80 euro aurreikusi ditu gehienez eta euskaltegiek 2,07 euro eskatu dute. Maiatzerako tesoreria arazoak izatea litekeena dela aurreratu dute. Miren Azkarate, Kultura sailburuak aurtengo diru laguntza iazkoa baino txikiagoa denik ukatu egin du.
Mamutxak sakeleko telefonoko protagonista
Mamutxak, izaki mitologikoak, sakeleko telefonoetako joko bateko protagonista bihurtu dituzte. Joko hori Animatu enpresak sortu du Eusko Jaurlaritzako Kultura Sailaren laguntzarekin eta sakeleko telefonoetan erabiltzeko euskarazko lehenengo jokoa da.
Euskal Herriko curriculuma
Euskal Herriko Ikastolen Elkarteak, Udalbiltzak eta Sortzen-Ikasbatuaz erakundeak Euskal Herriko curriculuma garatzeko hitzarmena sinatu berri dute. Hiru erakundeek curriculuma garatzeko falta diren urratsak aurten emateko konpromisoa hartu dute. Euskal curriculumaren txostena udazkenerako egingo dute.