Ez du itsasoak eragin, ez da hildakorik suertatu. Baina asko birrindu da euskal eta espainiar politikan, Legebiltzarreko bozketa dontsuarekin. Esango nuke PPrena dela bere horretan dirauen txabola bakarra, olatua pasa eta gero. Ez du meriturik ordea, aspaldian ez baitu hori baino egiten PPk, iraun, alegia. Batasunan bertan ibiliko da nahikoa lan, erabakia talde txikian hartu dute eta sekretupean gorde, baina orain sozializatzeko ordua da eta izango da ulertzen ez duenik. Dena den, tsunamia eragin izanak lagunduko die Arnaldo eta enparauei.

Okerrago gelditu dira Ibarretxe eta bere alderdia. Argi samar dago beste ibilbide bat zeukatela aurreikusita hurrengo hilabeteetan, gordin hemendik eta hauteskundeetara, gehiengo osoa lortze aldera, eta leunago gero sozialistekin, adostasun bila. Kaltetuena, ordea, Patxi Lopez izan da. Maragallen jokaldia nahi zuen, eta Piqué bakarrik gelditu zaio eskura. Nekez orain Patxi lehendakari.
Bazterrak birrinduta, berreraikitzeko ordua da. Aukera berriak datoz.

Eaj
Oraindik ez dira klabe guztiak ezagutzen, baina azken hamarkadako mugimendu garrantzitsuena alderdi honek egin zuen, Ajuria Eneatik Lizarra-Garazira. Hor dago tsunamiaren epizentroa. Badirudi, ordea, bazetorrela pendulua bueltan gutxienez erdibidera, eta derrepente trabatuta gelditu da mutur soberanistan, ezker abertzalea lagun. Ea nola eragiten duen alderdi barruan penduluak hartutako inertziak. Formalki, Ibarretxek beteko du bere planaren prozedura, eta iritsiko da hauteskundeetara. Hauen emaitzak izango dira gakoa.

Ezker abertzalea
Asmatu egin du azken boladan, eta lortu du mugitzea politikaren bazterretik zentrora. Esan eta esan ari da Arnaldo bere kide guztien izenean hitz egin duela, bai Anoetan eta bai Legebiltzarrean. Hori horrela bada, argi dago lehentasuna: espainiar gobernuarekin negoziatzea hauteskundeetarako aukera eta presoen hurbilketa, su-etenaren truke.

Zapatero
Talanteaz gain, talentua beharko du hurrengo denboretan. Uko egin dio PPren besarkada hilkorrari Espainia defendatzeko orduan, baina Konstituzioaren mugak berreste hutsarekin ez du arazoa konponduko. Talentuz hasi beharko du Espainia berri bat pentsatzen eta azaltzen, nahi baditu katalanak eta euskaldunak barruan eta konforme. Ez badu horretan asmatzen, agintea ere gal lezake, hain izango da gai hau zentrala datozen garaietan. Espainia zaharra defendatzeko, hobe PP badago gobernuan eta, ahal bada, Aznar buru duela.

Berreraikuntzarako ardatzak
Bat. Ibarretxe plana ez da orain inportantea. Bete du bere betebeharra. Balio izan du gainditzeko Lizarra ondorengo blokeo egoera. Argi utzi du EAEko Legebiltzarrean 43 hautetsik nahi dutela plan hori edo gehiago, eta 32k jarraitzen dutela estatutu zaharraren defentsan. Bai, 43/32 ez da gehiengo itzela, baina ez da ere berdintasuna. Maiatzean asko aldatzen ez bada, eta ez dut uste, hau da konponbidearen oinarria.

Bi. Norabide guztietan hitz egin behar da, epe luzeko ikuspegiz. Zubiak eraiki behar dira ezer baino lehen. Eta epe motzera helburua izan daiteke marko juridiko berri bat adostea, baina epe luzeko helburua da mekanismo bat aurkitzea, euskal hiritarren gehiengoaren borondatea gauza dadin aldi oro. Edonon bi joera daudenean lehian, adostu behar izaten da nola erabaki zein den nagusi, eta noiz izango duen galtzaileak irabazteko aukera. Ipar Irlandako errepublikarrek onartu dute lehen erreferenduma galtzeko arriskua, hurrengoren bat irabaziko dutelakoan. Antzera Quebec-eko independentistek.

Hiru. Besterik dirudien arren, uste dut gai honetan gehienak zentzudunak garela, eta beharko dela gure ekarria eztabaida zentzuz egin dadin. Alferrik izan bitez zarata eta zalaparta, ez dezala balio mehatxuak edo irainak. Eraiki dezagun geroa sendo.