Irri eta solas izenaz bataiatu du Joseba Irazokik bere lehen bakarlana. Atea jotako diskoetxeen interes ezak bultzatuta guztiz autoekoitzia da beratarraren disko berria. Bere ibilbide luzeak hedabideen arreta piztu du berehala. Eta beraz, ez du zailtasunik izan bakarkako proiektua Euskal Herriko publikoari helarazteko.
Onddorentzat konposatuak
Onddo taldearekin hasi zen Joseba Irazoki bere kantak idazten. Disko bat karrikan zutela, bigarren bat argitaratzeko kantak sortzen jarraitu zuen Irazokik. Baina taldeko partaideen artean desadostasunak eta bide berrietatik jotzeko asmoak zirela medio proiektuak ez zuen aurrera egin. Denbora aurrera zihoan eta sortutako kantek karrikaratu gabe jarraitzen zuten. Beraz, irtenbide bakarra abestiak bakarkako ibilbideari ekinez kaleratzea zela ikusi zuen. Horrela sortu zen Irri eta solas.
Onddo taldearen ildotik pop estiloa jorratzen du bere lehen bakarlanean. Amodioaz eta desamodioaz hitz egiten duten bederatzi kantetan sampler eta elektronika zertzeladarik ere bada, ordea. "Onddoren diskoan house erritmo garbia zuen kanta bat geneukan eta disko honetan ere badaude elektronika puntu batzuk. Zaratak eta sampleatutako zenbait doinu sartu ditut, adibidez. Beti gustatu izan zait elektronika puntu bat izatea", azaldu digu Irazokik. Izan ere, gitarra jolea Oiartzungo Pagoa garagardotegian DJ lanetan aritu zen denboraldi batez. Eta beraz, musika elektronikoa ez da berria berarentzat.
Lan intimista
Irri eta solas diskoa tristea baino intimista dela aitortzen du Joseba Irazokik: "Kantatzeko moduak, xuxurlatzeak, bai ematen dio triste puntu hori. Eta melodiak ere, nahiz eta pop estilokoak izan, ez dira oso argitsuak. Baina ez da tristea, nik intimista dela esango nuke".
Hitzak norberak ez idazteko arrazoi nagusia nagikeria izan dela aitortzen du Irazokik: "Ez dut batere irakurtzen eta irakurtzeko ohiturarik ez baduzu nire ustez oso zaila da hitz dezente edo polita idaztea. Aurrekoan, Onddorekin, idaztera ausartu nintzen, baina ez nengoen sobera kontent", diosku gitarra jole nafarrak. Hortaz, hitzak egiteko lagunez inguratu da Irazoki. Mikel Taberna, gitarra jolearen lehengusua, izan da gehientsuenak idatzi dituena. Daniel Irazokik eta Beñardo Goietxek ere hartu dute parte eta Xabier Silveirak Nafarroako Bertso Txapelketan abestutako Bizio bat bertsoa utzi dio. "Mikelek hogei olerki utzi zizkidan eta aukeraketa egin nuen. Gehienek amodio eta desamodio kontuez dihardute. Dena den, badira pare bat galdutako lagunez hitz egiten dutenak. Aurten koadrilan lagun bat joan zitzaigun istripuz eta egokia iruditu zitzaidan gai horren inguruan aritzea", diosku Irazokik.
Euskal musika oso osasuntsu ikusten badu ere, merkatuaren egoera ona ez dela dio: "Musika gustatzen zaion jende asko dago, baina gero benetako interesa duen hainbeste musikazale ere ez da. Jende guztiaren bizitzan dago musika, baina gauza berriak bilatzen eta erosten dituztenak zale amorratuak izan ohi dira eta horietatik ez daude hainbeste. Besteek edonon entzuten dute musika, beraz, ez dira arduratzen horretaz".
Diskoa bere kontura ekoitzi badu ere, Zabaltzen arduratuko da Irri eta solas Euskal Herriko dendetara banatzeaz. Bostehun ale bakarrik kaleratu ditu eta dendetan zein kontzertuetan izango dira salgai. Diskoan instrumentu ugari eta konponketa asko dauden arren, zuzenekoak musikari gehiagoren laguntzarik gabe eskainiko ditu beratarrak: "Kantak gitarraz eta ahotsaz sostengatzeko konposatuak daude, beraz, bakarrik egingo ditut emanaldiak. Hanketan perkusio pixka bat eramango dut, panderetaren bat-edo, kontzertuari bizi pixka bat emateko".
Do proiektu instrumentala
Kanta berri-berriak ez direnez, diskoa argitaratu, gutxi gorabehera urte batez emanaldiak eskaini eta beste zerbaitekin hastea nahi du Irazokik. Izan ere, dagoeneko proiektu berri batean murgildu da: Do izeneko esperientzia instrumentala. Gitarra hutsean oinarritzen da proiektu berria eta musikari beratarrak dioskunez, "inprobisazio esperimentala" da lanaren abiapuntua: "Gitarran destornilladoreekin-eta zarata arraroak ateratzen hasi nintzen hasieran eta gero kantak sortzen zirela ikustean maketa bat egin nuen". Do proiektuaren lehen diskoa grabatua du dagoeneko eta Bartzelonako zigilu batek argitaratuko du. Lana datorren urtean kaleratuko da ziurrenik.