Ibarretxe Planarekin bukatu genuen kurtso zaharra eta Ibarretxe Planarekin hasiko dugu berria. Ibarretxek badaki sozialistek eta PPkoek ezetz borobila emango diotela bere planari, baita EA eta EBren laguntza ez dela nahikoa parlamentuan plana aurrera ateratzeko. Bakarrik Batasunaren botoak gelditzen zaizkio bere plana aurrera ateratzeko. Batasunekoek esan diote ez dutela bere plana onartzen, baina era berean esaten diote, behin eta berriro, prest daudela negoziatzeko. Ibarretxek esaten die ETArekin hausten ez duten bitartean gobernuak ez duela beraiekin negoziatuko »hitz egin bai baina negoziatu ez. Xehetasunak inportanteak dira politikan». Gauzak horrela daude baina horrela zeuden kurtso zaharrean ere. Zergatik erabaki du orduan Ibarretxek bere plana eztabaidatzea eta botatzea legislatura honetan? Kontuan izan behar da hauteskunde atarian gaudela, datorren udaberrian Euskadiko hauteskundeak izango direla. Nola azaldu nahi du Ibarretxek bere plana hautesle aurrean? Onartuta Batasunaren botoekin? Bere planak porrot eginda parlamentuko botazioan? Edo agian, Batasunarekin adostasun minimo bat lortu, ez hauen baiezko botoa lortzeko »garestiegi izango litzateke horrelako akordio bat» baizik hauen abstentzioa, horrela gehiengo gutxieneko bat lortuko zuen parlamentuan eta horrekin aurkeztu hauteskundeetara? Une honetan ez dakigu hiru aukera hauen artean zein izango den aterako dena baina garbi dagoena da pilota PNVren teilatuan dagoela. Arzalluz eta Egibarren estrategiarekin jarraitzen badu PNVk, seguru asko, Batasunarekin akordio batera iritsiko da »publikoa edo sekretua? Denborak esango du». Batasunak ez baditu gauzak asko aldatzen badaki hauteskundeetan jai daukala, ez diote legalizatuko zerrendarik eta parlamentutik kanpo geratuko da. PNVk hori badaki eta Batasunaren hautesleen botoak oso tentagarriak dira autonomikoetan. Ibarretxe planarekin akordio bat lortuz gero Batasunarekin, erreklamo ezin hobea izan dezake PNVk Batasunaren botoak bereganatzeko. Orain, gerta daiteke Josu Jon Imazek erabakitzea estrategia hori agortuta dagoela eta iritsi dela ordua panorama politikoa aldatzeko eta ondorioz Batasunarekin negoziatzeko ate guztiak ixtea. Hori horrela bada Ibarretxek ez du lortuko bere plana parlamentuan onartzea, baina hauteskunde ondorenean eskuak libre edukiko ditu beste akordio batzuk lortzeko. Egoera honetan, ETAren ekintzekin adi egon beharko dugu, hiltzen hasten badira berriro Batasunak jai dauka eta PNVren barruan indartu egingo dira estrategia aldatu nahi dutenak.

PPkoak oraindik Madrilgo hauteskundeen emaitzen digestioa egiten ari dira. Urrian kongresu nazionala dute eta ez dira egoera onenean aurkeztuko hauteskundeetara. Sozialisten egoera guztiz kontrakoa da, haizea aldekoa dute eta hemengo hauteskundeetan emaitza onak lortuko dituzte. Ikusteke dago "PATXI lehendakari" leloa "ZP presidente" leloak bezalako arrakasta lortuko duen ala ez. Hala bada kontuz, orain pentsa ezinezko emaitzak lor ditzakete. EA berriz "desojando la margarita", PNVrekin elkartuta joan edo bakarrik. Ezker Batuak, berriz, berean jarraituko du, ez da asko igoko ezta jaitsiko ere, mantendu egingo da. Hori bai, "Patxi lehendakari" leloak lortuko balu gizartean susmoa zabaltzea oraingo honetan benetako gobernu aldaketa egon daitekeela, kontuz!, EBko boto asko sozialistengana joan daitezke Madrilgo azken hauteskundeetan gertatu zen moduan. Egia da Patxi Lopez ez dela ZP eta Ibarretxe ez dela Aznar, baina Ibarretxeren plana »hiru urte daramagu planarekin bueltaka eta mantsoenak ere aspertzen hasiak dira» eroso ez bada ateratzen parlamentutik, jende asko pentsatzen hasi daiteke iritsi dela ordua gauzak aldatzeko.

Bitartean bizitzak aurrera jarraitzen du eta kanpotik bueltatzen zarenean, Euskadiko politika "soto" usaina hartzen hasita dagoela dirudi, itxita denbora gehiegi, eta zahartzen hasita dauden tokien usaina. Ezin dezakegu onartu beste legislatura bat egoera politiko blokeatu batean. Gure zoko zaharrak haize freskoaren beharra dauka, bestela, geure artean talentua duen hainbat jende, hemengo giro klaustrofobikotik atera nahian, beste tokiko haizeak probatzera joango da guk gure zilborrari begiratzen jarraitzen diogun bitartean.