Larruzko jantzi beltzak soinean, motorra ere beltza du. Sugarren irudiak eta garezurrak ageri dira bere motorrean. Eta kaskoak ere estilo bera du. Alberto Rodriguez Elizalde iruindarra Valentziatik heldu berria da gurekin bildu den egunean, moteroen kontzentrazio batean izan da eta hainbat argazki esku artean heldu da gurekin egin duen zitara. «Arelizalde» du ezizena eta horrela deitzen diote, bera bezala kontzentrazioz kontzentrazio motor gainetik apenas jaitsi gabe bizi diren moteroek.

Izan ere, moteroa grinatsua da, motorra da bere bizitzaren motorra; bere bizitzeko modua eta hura gabe ez doa inora. Denbora eta ardura handia eskatzen du bai, eta dirua, noski; baina "sexurik gabeko amodio" horrengatik ia edozer egin lezake motero batek. Behin proba egin eta kontzentrazio batean izaten dena harrapatu egiten du zaletasun honek; gogobetetze handia eskaintzen baitu dedikazio horren ordainetan.

«Arelizalde»k horrela bizi du motorraren mundua eta horrelaxe deskribatu du, bere beste zaletasuna duenaren bitartez: argazkiaren bidez, alegia. Motero izateaz gain, argazkilari ere bada eta gazte zenetik bi zaletasunak uztartu eta lanbide bilakatu ditu. Egun, Easyriders motor kontuetan berezitua den aldizkariarekin lan egiten du. Kontzentrazioetan argazkiak ateratzea da bere lanbidea.


Astebururo joaten da «Arelizalde» moteroen kontzentrazioetara. Espainiako eta atzerriko errepideak ongi ezagutzen ditu dagoeneko. Valentziatik etorri eta gero Tamaritera joateko guztia prestatzen ari zen gurekin bildu zen egunean. Hurrengoa asteburuetarako plana ere egina zeukan: Albazetera zihoan lehenengo eta gero Tarragonara. Zerrenda amaierarik gabea da; izan ere, urte osoko plangintza prest du motero iruindarrak.

Asteburu bakoitza abentura berri bat da. Motorrak ematen duen independentziaz, herriz herri eta autobideak alboan uzten saiatuz, bakarrik edo lagunekin errepidera irteten da. Helmugak ez du bidean bizitakoak baino gehiago balio.

Kontzentraziora heldu eta izena eman beharko du ezer baino lehen. 20-25 euroren truk, non lo egin eta zer jana izango du; baita kontzentraziorako prestatu diren ekintza eta ekitaldietan parte hartzeko aukera ere.

Kontzentrazioa egingo den herria eta herritarrak ezagutzeko parada hartzen dute orduan; ostean, jolasak helduko dira: erruberak urratzea, motelen zein baino zein aritzea, pultsu egiteak, garagardo kupelak motorraz bultzatzen lasterketa egitea… gustu guztietakoak. Horrela igarotzen dute eguna kontzentrazio batean bildu ohi diren 300 edo 400 pertsonek.

Gauerako, rock gogorra jotzen duen taldearen kontzertua eta streapteasea. Garagardo ugari, eta Jack Daniels botilatik isuritako whiskyak gozatzen die eztarria. Baina motorra geldirik da une horretan, "maiteegia" dute mozkorturik gidatzen hasteko.

Kanpin dendan edo hotelean, norberak nahiago duen moduan lo egingo dute, hurrengo egunean ekintzekin jarraitzeko indarrak hartzeko.

Igande bazkal ostean, elkar agurtu eta hurrengo batera arte etxerako bidea hartzen dute, bakoitzak norabide batean.

Guztiak helduko al dira? Moteroa ez da »elkarrizketatuaren hitzetan» errepidean istripu gehien izaten duena. Uste orokorraren aurka, segurtasun handiko ibilgailuak omen dira eta istripuak izaten dituztenak gehiago izaten omen dira auto gidariak edota scooter txikietan ibiltzen diren hirietako gaztetxoak: "Behar ez bezala gidatzen dituzte motorrak eta ez dira ohartzen, duten motorra ez dagoela eskatzen dioten tratuari erantzuteko prestaturik, horregatik gertatzen dira istripuak".


Haizea du arerio nagusi motorrean doanak; euriak eta hotzak ez diote kalte handiegirik eragiten. Hala ere, istripuak gertatu gertatzen dira eta konponketak garestiak izaten dira gainera. Asegurua egitea ere ez da batere merkea, 960 euro balio du, batez beste. Zifra hori, dena den, motorra eta gidariaren adinaren arabera asko alda daiteke. Beste herrialde batzuetan askoz merkeagoa da, eta hori lortze aldera mutualitate bat sortzekotan dira «Arelizalde» eta beste hainbat lagun.


Motorra, gorputzaren parte bailitzan zaintzen dute moteroek; batzuek 60.000 euro ere gasta ditzakete ibilgailuak behar dituen konponketatxoak egiten. Custom motorra erabiltzen dutenek estetikoki transformatzen dute motorra, batez ere; eta turismo edo pepino izeneko motorrak dituztenek mekanikari dagozkion aldaketak egiten dizkiete, batik bat. Autoa ere izaten dute batzuek baina motorra tailerrean dutenean baino ez dute erabiltzen.

Denbora eta dirua poltsikoan, abentura zale izaten da moteroa eta ez du munduari bira ematea erokeria kontsideratzen. Ausardia eta indarra ere behar dira eta gero eta frogatuagoa dagoen legez, emakumeek ere badute horretarako grina. Etxean zain geratu beharrean motor gainean urrutirako bidea hartu du askok. Adina ere ez da muga helburu hori betetzeko, 70 urtetik gorako pertsonak kontzentrazioetan aurkitzea ez baita hain harrigarria.

Hori guztia laster ikusi ahal izango du uztailaren 2an, 3an eta 4an Sestaon egingo den kontzentraziora hurbiltzen denak. Bidai luze baten hasiera izan daiteke hara egindako bisita. Zeinek daki!