«Sindikalismo anitz eta solidarioa» lelopeko kongresuan bozkatu beharreko txostenen artean, bada bat euskararen gizarte garapenaren eta hizkuntza normalizazioaren alde egiten duena. Kongresuan parte hartuko duten ordezkariak Hego Euskal Herriko lau lurraldeetatik joango dira, eta sindikatu historiko horretako 65.000tik gora kideren ordezkari lanak egingo dituzte. Gaur egun sindikatuko idazkari nagusia den Josu Onaindi hautatuko dute ziurrenik beste lau urtetan lan horretan jarrai dezan, izan ere, ez baitirudi itzal egin diezaiokeen beste hautagairik dagoenik. Bere agindupeko azken lau urteak oso lasaiak izan dira sindikatuaren barruko ikuspegitik begiratuta, eta sindikatuaren zuzendaritzan aldaketak egin behar direla eskatzen duen ahotsik ere ez da entzun.

Euskadiko CCOO erakunde sindikal anitza eta demokratikoa da eta gainontzeko erkidegoetako ordezkaritzarekin kidetuta dago. CCOO da Estatuko konfederazio sindikal handiena, bai kide kopuruari dagokionez eta bai ordezkari kopurua kontuan hartuta. Bestalde, Konfederazio Sindikal Europarreko (CES) eta Sindikatu Libreen Nazioarteko Langile Konfederazioko (CIOLS) partaide ere bada.


Militanteen ordezkariak azken hilabeteetan eztabaidatzen ari diren zortzi txostenen inguruko erabakiak hartuko dira kongresuan. Hauexek dira txosten horiek: Negoziazio kolektiboa, Autogobernuaren eragina gizartean, Datorren aldirako proposamenak, Eredu sindikala, Gizarte babesa Euskadin, Berdintasunerako ekintza positiboa, Nazioarteko ekintza sindikala eta Globalizazio alternatiboa, eta Antolakuntza. Aldizkari honetan azken txosten horretako zati bati erreparatu nahi diogu, euskararen eta hizkuntza normalkuntzaren ingurukoari, hain zuzen ere.

Txostenak dio sindikatuarentzat "ezinbestekoa dela euskararen gizarte garapena sustatzea, jakin eta erabiltzen dutenen kultur ondarea baita euskara, baina baita jakin eta erabiltzeko gai ez direnena ere". Txostenak adierazten du, "sindikatuak badakiela urritasunak dituela eta gure gizartean badirela alde bateko eta besteko indarrak CCOO euskararen aldeko gizarte dinamikatik aldentzeko interesa dutenak". Horregatik, "lan harremanetan, gizartean eta erakundearen barruan euskara garatzeko erabiliko diren espazioak sustatzeko konpromisoa" hartzearen alde dago. Horri dagokionez, asmoa du "egoitzetan errotulu, ohar-orri eta material elebidunak erabiltzen, pixkanaka Biltzarrean euskara sartzen eta eskualde eta federazio mailan euskarari dagokionez hobetzen joateko. Sortu den Euskara Zerbitzuan pertsona bat aritzeak onura nabarmena ekarri du eta bide horretatik jarraitu beharra dago".

Konfederazioko Batzorde Exekutiboak kideen artetik pertsona bat aukeratuko du Euskalduntze Planaren jarraipena egiteaz eta CCOOko euskaldunen proposamenak jasoko dituen Euskara Batzordea dinamizatzeaz arduratzeko. Aipatutako Planaren bidez, antolakuntzako eta administrazioko agiriak itzultzea eta organo informatzaileetan -Biltzar, web orria, Lanberriak, panfletoak, barruko euskalduntzea- euskararen presentzia areagotzea lortuko da. Urtero Plan bat egingo da sindikalistek eta administrazioko langileek euskaraz hitz egiten ikas dezaten edo ahozko ezagutza hobetu dezaten. Planean parte hartzea borondatezkoa izango da, eta lehentasuna izango dute pertsonen etorkizuneko zereginek eta jarduera esparruek.

Kontratazio berriak egiterakoan eta erantzukizuneko karguak proposatzerakoan kontuan hartuko da hautagaiek euskaraz jakitea. Konfederazioko zuzendaritza exekutibo eta euskal federazio guztiek euskaldunen bat izan behar dute, eta sindikatuaren ordezkariak euskaraz hitz egiten jakin beharko du. Azkenik, txosten horrek dio enpresetako negoziazio kolektiboetan hizkuntza normalkuntzako planak egitearen alde azaltzen dela Euskadiko CCOO.