Euskal zinema Londresen
Britania Handiko British Film Institutek euskal zinemari buruzko zikloa antolatu du Euskadiko Filmategiarekin elkarlanean. Maiatzaren 1etik 27ra bitarte, Londreseko National Film Theatren proiektatuko diren bederatzi film eta 12 dokumentalei esker «euskal auzia»ri buruzko ikuspegi hainbat ezagutu ahal izango dute ikusleek. Nestor Basterretxea eta Fernando Larruquerten Ama-Lur, Imanol Uriberen Mikelen heriotza, Montxo Armendarizen 27 ordu eta Julio Medemen Euskal pilota: Larrua harriaren kontra (33 emanalditan) dira, besteak beste, ikusi ahal izango diren lanak. Orson Wellesek 1955ean eginiko The Basque Countries lana ere tartean izango da. Proiekzio horiez gain, mahai-ingurua egingo dute maiatzaren 13an, Galesko Unibertsitateko Rob Stone katedradunak gidatuta . Saio horretan Euskal Herriko errealitate sozial, politiko eta kulturala aztertuko dira.
Bizkaiko Txapelketaren txanda
Abian da bi urtez behin egiten den Bizkaiko Bertsolari Txapelketa. Maiatzaren 29ra bitartean lehenengo faseko eskualdeetako txapelketak egingo dira eta saio horietako irabazleak 2002an finalera iritsitako bertsolariekin lehiatuko dira bigarren faseko kanporaketetan eta finalaurrekoetan. Finala abenduaren 19an izango da Bilboko Euskalduna jauregian. Gipuzkoan ere izango da bertso lehiarik. Bergarako, Debako, Elgetako eta Mutrikuko Gaztetxeetan Plazatik Gaztetxera 2004 abiatu dute. Bertsolaritzak gune berriak irabaziz gaztetxeetara zabaltzeko eta Eskolarteko Txapelketan adinez kanpo gelditzen diren bertsolariei plaza berriak eskaintzeko antolatutako ekimena da. Finala Mutrikuko Gaztetxean izango da maiatzaren 29an.
Dantza garaikidea Nafarroan barrena
Datorren ekainaren 13ra arte, Escena 2004 dantza programa izango da Nafarroako 12 herritan, Nafarroako Gobernuko Kultura eta Turismo Sailaren ekimenez. Aurtengoa zortzigarren edizioa da eta Nafarroako zein Aragoiko, Madrilgo, Kataluniako eta Andaluziako bederatzi konpainiek dantza garaikidearen azken proposamenak aurkeztuko dituzte. Tempomobile taldearen La memoria de las piedras, Dancem taldearen Reflexiones de Mey eta Hojarascaren El mundo al reves ikusi ahal izango dira, besteak beste. Dantza taldeen ikuskizunak Zangozan, Altsasun, Valtierran, Burlatan, Barañainen, Los Arcosen, Beran, Noainen, Lizarran, Zizur Nagusian eta Antsoainen izango dira.
Eskola eta gazte antzerkiaren garaia
Geroz eta usuago entzuten dugu eskola edo ikastoletan antzerki talde bat dagoela. Izan ere, geroz eta garrantzia gehiago ematen zaio antzerkiari hezkuntzan. Horren froga dira aste hauetarako antolatu diren antzerki topaketak. Donostiako XVI. Gazte Antzerki Topaketak abian dira dagoeneko. Bederatzi taldek hamaika antzezlan aurkeztuko dituzte maiatzaren 16a bitartean. Bestalde, Apirilaren 20an abiatu ziren Euskarazko Antzerki Jardunaldiak Nafarroako Antzerki Eskolan eta hainbat ikasle euren lanak eskaintzen ari dira bertan, iaz Haur Antzerki Testuen lehiaketan garaile suertatu zen Xabier Lopez Askasibarren Greentown tartean. Berako Mugaz Gain antzerki jaialdiak ere haur eta gazteen lanak hartuko ditu, maiatzaren 6tik 21era, hamargarren edizioan.
Kanona bai ala ez
Europako Batasunak ordainpeko mailegua ezarri nahi du liburutegi publikoetan. 92/100/CEE arteztarauaren arabera, egile eskubideak ordaindu behar dituzte liburutegi publikoek irakurleei maileguan uzten dizkieten liburuengatik. Hala ere, Europako Batasuneko gobernu bakoitzaren esku uzten du horretarako erabakia. Dena den, Europako Batzordeak arau-hauste prozesua zabaldua du Espainia, Italia, Irlanda eta Portugalen aurka. Espainiako Estatuko hainbat liburutegik neurri horren aurkako jarrera azaldu du, egile eskubideengatik kanona ordaindu beharrak liburuak erosteko aurrekontua murriztea ekarriko lukeelako. EBLIDA Europako Liburutegi, Informazio eta Dokumentazio Bulegoak eta Copyright Expert Group elkarte europarrak adierazi dute herrialde guztietako egoera bera ez dela eta salbuespenak egin behar direla, kanona ezartzeko garaian. Espainiako Estatuko autore batzuk ere kanonaren aurka agertu dira, maileguek doakoak behar dutela argudiatuta. Berriz ere egile eta hartzaileen eskubideak daude borrokan eta bienak babesteko ardura dute gobernuek. Kultura babesteko nahia benetakoa bada, behintzat.
Kantautoreak batzeko
Nafarroan Ojala kantautoreen elkartea sortu da. Javier Martin eta Lina Ortegak bultzaturiko proiektuaren helburua kantautoreen lanari babesa eskaintzea da, orain arte herrialde horretan musika mota horrek dituen gabeziak gainditu asmoz. Ojala elkartekoek ikasketa eta trebakuntza saioak antolatzeaz gain, artista zahar zein hasiberrien promozioa bultzatzeko eta kontzertuak antolatzeko asmoa azaldu dute. Apiriletik ekainera bitartean, adibidez, 1,2,3, trovando, trovando izeneko zikloa antolatu dute. Saio horietan Nafarroako eta beste hainbat tokitako egileak arituko dira, besteak beste, Kiko Toyar, Luis Ramiro, Silvia Penide, Adriana Olmedo eta Angel Rodríguez. 2005erako, berriz, Estatu Espainiarreko hainbat kantautore elkartuko dituen topaketak prestatu nahi dituzte. Barañaingo Auditorioan kokatu du elkarteak egoitza.
Disko eta liburuetan BEZa murriztuko da
Espainiako Kultura ministro Carmen Calvok adierazi duenez, diskoen gaineko BEZ zerga %16tik %4ra jaitsiko du eta liburuena %4tik %1era. Hala, pirateria arinduko dela eta herritarrek diskoak merkeago erosi ahal izango dituztela esan zuen. Herritarrek kultur produktuak errazago erostea eta produkzioa laguntzea du helburu neurriak. Datorren urteko aurrekontuetan islatuko omen dira ministroak proposatutako aldaketak.
