Agorila diskoetxearen erakusmahaia aurkituko dugu lehenik. Iparraldeko musika topatuko dugu mahai gainean. Ramuntxo Idauze Mendiko Pastorala eta Xiberoko Kantarien Denetarik zazpiak bat nobedadeak eskuratu ahal izango ditugu bertan. Ondoren dator Aus-Art Recordsen standa. Aurtengo nobedadeen artean organoari eskainitako zenbait lan aurki ditzakegu. Hala nola, Bergarako San Pedro organoa, Tolosako Santa Mariako organoa eta Begoñako Santa Monica monasterioko organoa diskoak.
DDT diskoetxearen erakusmahaian berriz, Erantzun taldearen Burmuinak astindu eta Aske taldearen Izatearen nahia ikusiko ditugu Azokan.
Elkar
Elkarreko mahai gainean diskoak, hostoak adina, urtero legez. Asko eta kolore guztietakoak. Angel Unzu gitarra joleak Melodias de piel izeneko diskoa ekarri du Azokara. Konpositoreak hamar melodia bildu ditu, sokarako moldatuak.
Euskarians izeneko bilduma ere topatuko dugu Elkarren mahaian. Aurtengorako prestatu du bilduma diskoetxeak. 3 CDtan, Euskal Herriko artistarik garrantzitsuenen 50 urrezko abesti jaso ditu. Bestalde, Oskorri folk talde ezagunak ere, badu nobedaderik aurtengo ediziorako. Desertore da lan berriaren izenburua, eta bertan sorkuntza berriko 12 kantu bildu dituzte.
Atzokoak berritzen
Disko berriek ez ezik, berrargitalpenek eta bildumek euren lekua hartu dute azokako standetan barrena. Esaterako, Errobiren eta Zaramaren diskografia osoak argitaratu ditu Elkar diskoetxeak. Mikel Laboak ere atzera begiratu du, eta bere lehen sorkuntzak bildu ditu bilduma batean, 60ko hamarkadako kantak, hain zuzen.
«Noizpop» zigilu berria
Gaztelupeko Hotsak diskoetxeak Noizpop zigilua sortu du, proposamen indienei lekua egiteko. Euskal Herriko zein nazioarteko pop taldeak hartuko ditu bere baitan. Durangoko Azokari begira Gernikako Audience taldearekin estreinatuko da. Ingelesez abesten dute eta bigarren diskoa atera dute dagoeneko, Second handed izenekoa.
Baina mahai gainean nobedade gehiago izango dituzte. Uek-ren Ganbaratik, Txuma Murugarrenen Gauak, neskak eta maletak...
Karidadeko Benta taldearena eta Mal de ojo taldearena ere bertan izango dituzte. Jon Maia bertsolariak sortutako kopla eta bertsoak abiapuntu hartuta, munduko herri doinuetara jo dute (Euskal Herrikoak, Marokokoak, Karibekoak...) lehenengoan; bigarrenean, Mal de Ojo taldeak, flamenkoaren adarrik alaiena hartu eta euskaraz abesteari uko egin gabe, runba eta erritmo beroak ederki landu ditu Mestijaia lan berrian.
Gor
Gor Iruñeko diskoetxeak lau nobedade argitaratu ditu aurtengoan Durangoko Azokari begira. Betiko moduan, rock doinuak jorratu ditu aurkeztuko dituen lanetan. Berri Txarrak talde arrakastatsuak disko berria kaleratu du, Libre izenekoa; bestalde, Leihotikan taldearen Munduaren leihoa izenburua daraman lana; Lor talde elorriotarraren lehen lana Lor eta Lau Itzal taldearen Sartu lan berria ere bertan izango dira.
Kantuok jartzen ditut
Literaturan bezala, musikan ere, badira Azokari distira berezia ematen dioten izenak urtero. Metak diskoetxearen erakusmahaian aurkituko dugu izen horietako bat. Ruper Ordorikarena, hain zuzen. Kantuok jartzen ditut bere azken lana izango da bertan eskuragai. Mahai gainean izango dira hala ere nobedade gehiago. Zortzi lan berri orotara.
Behin behineko egitasmo gisa sortu zen Kuraia taldea, baina bigarren diskoa ekarri du azokara, Isiltasunaren barre izenburupean. Rock eta metal musikan eskarmentua duen taldea dugu Eraso!. Eta euren hirugarren lana eman dute argitara, Mikel Kazalisek grabatu eta ekoitzitako Grisez bustitako egunak. Diskoa Haritz Harregik nahastu du.
Bada oraindik gehiago. Rafa Ruedaren Kea, Maddi Oihenart eta Josetxo Goia-Aribek osatutako bikotearen Ilhargi-min eta Anari eta Petti bikotearen lana ikusiko baititugu mahai gainean. BAP! taldean ere zaharrak berri. Andoaingo Gaztetxean eskaini zuen azken kontzertua cd-an eta DVDan jaso ditu Metak etxeak. Benetako harri bitxia, beraz.
Oihuka
Zortzi dira Oihuka etxearen standean ikusiko ditugun disko berriak. Aurtengo sorpresa, Iparraldeko Ikus taldearen, Nere buruan izeneko lehen diskoa izan da. Bitxia taldea benetan. Izan ere, grabaketa osoa software bidez egiteaz gain, zuzenekoak ere horrela egiten baitituzte.
Axular Arizmendi DJak techno progressive eta trans progressive doinuak ekarriko ditu Azokara. Lana cd-an nahiz biniloan atera dute.
Harlaxen bigarren lana ere bertan izango da; Ez diren gauzak ere badira izenburupean eman dute argitara.
Azkenik, Sex'n'roll da ikusmin handiena lortu duen lana. Euskal Herriko rockak eman dituen 18 kanturik beroenak, sutsuenak, sexualenak eta maitasunezkoenak bildu dira bertan. Besteak beste, Doctor Deseok, Barricadak, Urtzek, Leizek, Tijuana in Bluek, Baldin Badak eta La Polla Records-ek kantatuak dira.