Zakurra zeure laguna
Gotzon Garate
Elkar
171 orrialde
12 euro
Harreman luze baten emaitza
Zakurrenganako maitasunez eta haien ohoretan idatzitako liburua dugu Gotzon Garateren hauxe. Izan ere, txikitatik izan ditu zakurrak bere inguruan Gotzon Garatek, baita gaur egun ere, Deustuko unibertsitatean, eta zakurrekiko harreman luze horren emaitza eskaini nahi izan digu Elkar argitaletxearen eskutik plazaratu duen "Zakurra, zeure laguna" lanean. Aipatutako liburuan, zakurrekin lotura estua duten era askotako pasadizo eta gertakizunak biltzen ditu Gotzon Garatek, etxekoenak ez ezik Euskal Herrian zehar baserrietan egindako egonaldietan ezagutu dituenenak ere bai. Era berean, gizakiaren lagunik onena dela esaten den horren ezaugarri orokorrak, ohiturak, ondo hezteko egitea komeni dena eta beste hainbat jakingarri jaso ditu liburuan.
Memoria 2002
Eusko Ikaskuntza
Eusko Ikaskuntza
191 orrialde
Urte oso bateko ekitaldi eta gorabeheren kontu ematea
Ohiko duenez, aurten ere plazaratu du Eusko Ikaskuntzak aurreko urteko memoria, non jasorik dauden 2002an zehar burutu dituen jarduera ugariak eta epe bereko txosten ekonomikoa. Albiste bikain batekin abiatu zen urte hura Eusko Ikaskuntzakoentzat, urtarrilaren 16an sinatu baitzen "Euskal kulturaren aldeko apustu garbia" ziurtatzen zuen hitzarmena Eusko Jaurlaritza, Euskal Autonomia Erkidegoko hiru foru aldundiak eta euskal kulturaren ikerketa, irakaskuntza eta zabalkundea eginkizuntzat dituen erakunde horren artean. Gero, Asmoz eta Euskomedia fundazioen eraketa, Euskal Herri osoan barrena nahiz gure geografia eremutik kanpo egin ziren 16 foro akademikoen antolaketa, eta beste asko etorri ziren.
Diario de un clandestino
Miguel Bonasso
Txalaparta
280 orrialde
13,50 euro
Militantziaren gazi-gozoak
Duela urte batzuk "Memoria de la Muerte" (1994) nobelarekin dar-dar batean utzi gintuen Miguel Bonasso idazle argentinarrak, Videlaren diktadurapean bahitu eta desagerrarazi zituzten milaka hiritarrei gertatutakoa kontatuz. "Diari de un clandestino"n, berriz, Montoneroen erakundeetan hamar urtez bizi izan zuen militantziaren gazi-gozoak jasotzen ditu. Izugarriak jasan behar izan zituzten Argentinaren agintea Bonassok bezala eskuetan zeukaten hainbat militarri ikuspegi iraultzaile batetik aurre egiten saiatu zirenek. Juan Domingo Peron generalaren itzulerarengatik borrokan zebiltzan makina bat kide hiltzen ikusteaz gain, Peronek berak iraultzaileak nola arbuiatzen zituen bizi behar izan zuten, eta baita Montoneroek beraien artean izan zituzten liskarrak ere.
Eguberri kanta
Charles Dickens
Hiria
132 orrialde
11,50 euro
Dickens, bere garaiaren isla
Nerea Mujika Arandak euskaratu du Hiria argitaletxeak plazaratutako Charles Dickensen "Eguberri kanta". Familia behartsu bateko semea izanik, hamabi urterekin hasi behar izan zuen Charles Dickensek, bere aita, zorrak zirela eta, espetxeratu zutelako. Sekula ez zitzaizkion ahaztu bere haurtzaroko giro eta nekeak idazleari, bere idazlan guztietan ondo asko ikus daitekeenez. "Eguberri kanta" esandakoaren lekuko ezagunenetakoa dugu. Victoria erreginaren garaian bizi izan zen gizon zeken bat du protagonista nagusi. Inori ez zion laguntzen, eta bistan da, inork ez zuen bera asko maite, bere eskribau gazte jatorrak izan ezik. Baina Eguberriarekin batera gizon zekenaren bizitza erabat aldatuko zuen ustekabeko bisita etorri zen.
Maitagarria zarelako
Guido van Genechten
Ibaizabal
26 orrialde
17,20 euro
Bost urtetik aurrerako haurrentzat
Bere pelutxezko hartz txuri eta guzti dator "Maitagarria zarelako", haurrek egin ohi dituzten galderak eta eskatzen duten baldintzarik gabeko maitasuna gai dituen ipuina. Nekane Umerezi esker orain euskaraz irakur daitekeen kontakizun hau, Guido van Genechtenek sortu eta marraztu zuen, bost urtetik aurrerako umetxoentzat, eta erabat adierazkorrak dira bertan azaltzen diren irudiak. Elurtsu deitzen den hartz txiki bat du protagonista. Gauza asko dakizki Elurtsuk, baina kontutxo batzuk ez ditu ondo ulertzen, eta amatxori galdetzen dizkio. Adibidez, zergatik maitatzen duen bera hainbeste. Eta amatxok esan egiten dio Elurtsuk entzun nahi duen horixe.
Bat Soziolinguistika aldizkaria
Batzuen artean
sei
144 orrialde / 6,01 euro
Euskara azterketa "makroetan" eta egitasmo berrietan
Azkeneko "Bat" soziolinguistika aldizkarian, besteak beste, makroikerketa soziolinguistikoei buruzko irakurketa kritikoa egiten da, UNESCO erakundeak osatutako munduko hizkuntzei buruzko txostena aurkeztuz eta hari buruz zenbait adituk diotena azalduz. Eta gauza bera egiten dute Europako Batzordeak 1992an argitaratu zuen "Euromasaic" izeneko lanarekin. "Euromasaic"ek, Europako Batasuneko hizkuntza komunitate gutxituak, hizkuntza politika eta hizkuntza aniztasuna ditu gaitzat.
Itzarri nahi ez zuen printzesa
Felipe Juaristi
Alberdania
274 orrialde
17 euro
Errealitatea eta nahiaren arteko jokoa
Euskalgintza Elkarlanean Fundazioak eta Alber dania argitaletxeak batera plazaratutako liburua da Felipe Juaristiren "Itzarri nahi ez zuen printzesa", Joseba Jaka beka eskuratu zuen kontakizun poetikoa. Ipuin luze batean hainbat eta hainbat ipuin laburrago tartekatzen ditu Felipe Juaristik errealitatearen eta nahiaren arteko jokoa den maitasun istorioa agertzen duen kontakizun honetan. Maitasunaren kariaz gizonezko guztiak printze eta emakume guztiak printzesa bihurtzen direla esan ohi da, baina gertatzen dena zerbait konplikatuagoa dela iruditzen zaio berari, gehienetan gizonezkoa printze bilakatzen denean jartzen baitu emakumeak harengan begia, eta emakumea printzesa bihurtutakoan erreparatzen baitiote gizonezkoek ere hari. Hau da, gizonezkoak ez du emakumea maite bere bihotzeko errepresentazioan printzesa bat ikusten duelako, baizik eta kanpoko begiz printzesa ikusten duelako. Eta horixe gertatzen zaio "Itzarri nahi ez zuen printzesa"ko Joanesi ere, printzesa bat maitatu nahi du, eta Justina maitatzen amaituko du, baina printzesaz antzaldaturik etortzen zaionetik aurrera.