Aspalditik entzun izan da Ondarroan gitarra jole "famaua", iaioa dela Keu. Etsaiaken hasi zenetik bizkaitarra profesionalki aritu da musika munduan. Bestalde, agian, jorratzen zuten estiloa zela medio, ez da nabarmendu instrumentista moduan. Dudarik gabe, bere bakarkako proiektua izan da bere ingurukoen ahotan entzun zitekeen trebetasun horren konfirmazioa. Maiatzean «Ganbaratik» bere bigarren lana argitaratu zuen eta jadanik hasia da kanta eta melodia berriak sortzen. "Ganbaratik" aurreneko diskoaren ildotik doa, bertan kanta intimista eta batez ere instrumentalak biltzen baitira. Musikari bizkaitarrak Uek (Keu alderantziz irakurrita) izenpean hasi zuen bere bakarkako ibilbidea. Denetarik entzun zitekeen zazpi abestiz osatutako lehen lan hartan, jazz doinuak, rocka, musika elektronikoa, flamenkoa... Amorotoko Musikorta estudioan grabatu zen "Uek". "Ganbaratik", ordea, izenak berak ongi adierazten duen moduan, etxeko ganbaran grabatu du. Bertan egituratu duen estudioaren lasaitasunean burutu ditu bai konposaketa eta bai grabaketa gehienak ere.
"Ganbaratik" maiatzaren 24an aurkeztu zuen zuzenean, Ondarroako Kafe Antzokian. Emanaldietarako hiru musikariz inguratu da Keu, Mikel Arakistain baxuan, Mikel Breixo baterian eta Mikel Santos gitarran: "Ez da erraza horrelako proiektu batean sartzeko jendea aurkitzea. Beraiek herrikoak dira eta oso gustura nago. Bai entseguetan eta bai zuzenekoetan ere oso ongi konpontzen ari gara. Hamarreko nota beraientzat". Kontzertuetan, hortaz, aurrez grabatutako programazio elektronikoa eta bateriaren soinu akustikoa uztartzen ditu ondarrutarrak. Horrez gain, Biarko bikote mutrikuarrak prestaturiko irudiak ere gehitzen dituzte musikarekin batera.
Bakarkako proiektua gutxi balitz musikari ondarrutarra beste banda berri batean ere murgildu da: Homo. Talde berria esperientzia handiko musikariek osatzen dute: Mikel Arakistain (Psychophony eta Etsaiak) baxuan, Juanito Sangre (Ekon) ahotsean, Iban Zugarramurdi (Baldin Bada eta Su Ta Gar) baterian eta Keu gitarran. Homo-ren estreinako lana negu aldera argitaratuko da. Dena den, Keuk ez du Uek proiektua albo batera utziko eta kontzertuak eskaintzen jarraituko du.
16 urtetatik gitarrari itsatsirik
16 urterekin hartu zuen musikari ondarrutarrak estreinakoz bere lehen gitarra eskuan. "Gitarra klasikoa ikasten hasi nintzen Josetxu Penasegaz, bi urte izan nintzen beregaz eta gero Hilobi taldean sartu nintzen", dio Keuk. Aurreneko maketa, "Hilobi", 91n kaleratu zuten. Heavy euskaldunetik gertu kokatzen zen estiloa jorratzen zuten gazteok. "Hainbat kontzertu eskaini genituen, batez ere, Ondarroan. Getaria eta Aramaion ere aritu ginen, oso gazteak ginen", gogoratzen du gitarrajoleak. Galder Arrillaga mutrikuarrarekin batera KTI trash metal taldea osatu zuen gero: "Maketa bat argitaratu eta zenbait kontzertu ere eskaini genituen, Urtz taldearekin adibidez. Gutxi iraun zuen, ordea". Giarrajole bizkaitarraren ibilbidean, ostera, ez da etenik izan. Horrela, 1993an Psychophony taldea sortu eta urte bateko epean maketa argitaratu zuten. Psychophony albo batera utzi gabe Keu Etsaiak taldearekin hasi zen garai hartan. Eta gezurra badirudi ere, baxua jotzen hasi zen banda lekeitiarrarekin. Baxuaren eta gitarraren arteko elkartrukaketa hauek, ordea, ez dira arraroak izan musikaren historian. Jimmy Page, Led Zeppelin taldeko gitarrajole mitikoa, adibidez, baxua jotzen aritu zen denboraldi bat Yardbirds taldearekin hasi zenean. "Presoak SOS' diskoa grabaturik zegoen eta ni lan berriaren aurkezpenekin batera hasi nintzen Etsaiaken, urte eta erdi izan nintzen baxua jotzen", oroitzen du. Keuk, ordea, ez zuen diskorik grabatu baxuan zegoela, izan ere, "Gerra zikina" diskorako Mikel Arakistain Psychophony taldeko kideak hartu baitzion lekukoa. Ondorengo bost diskoetan gitarra eskuan zuela aritu zen Keu Etsaiaken. Psychophonyk 1996an grabatu zuen bere bigarren maketa. Bi urtera gitarra jole ondarrutarrak ordura arte egindako grabaketarik lasaienetako bat burutu zuen: "Zain" izeneko proiektu akustikoa. Musikari bizkaitarra ez da geldirik egoten dakien horietakoa. Hainbeste proiektutan murgildurik egon ostean, 2000. urtean bakarkako ibilbideari ekin zion Uek proiektuarekin. "Urteekin talde eta musika estilo asko entzuteko aukera izan dut, gaztetan itxi egiten gara askotan. Orain esperimentatzeko eta ikasteko gogo handia daukat", dio Keuk. Gitarra jolearen esanetan eraginen artean Rush taldea izan da berarentzat nabarmenena: "Psychophony taldean, esaterako, musika oso gogorra egiten genuen, death-metala. Eta hala eta guztiz ere, Rush-en eragina nabarmena zen abestien hainbat zatitan". Musika estilo ugari entzuten ditu Keuk eta guztietatik zerbait ikasten dela deritzo. "Afinaturik dagoen edozein gitarra jolerengandik ikasten da zerbait", dio txantxetan ondarrutarrak. Batek baino gehiagok diskoak Joe Satrianiren ukitua duela badio ere, Keu ez da musika hori gehiegi entzuten duenetarikoa: "Melodietan agian ukitua izan dezake. Nik, ordea, aspaldi utzi nion Joe Satriani, Steve Vai eta horrelakoak entzuteari. Beraien hainbat disko dut eta oso onak dira, baina gaur egun nekatu egiten naiz disko horiek entzuten".