Argitalpenak
Hitz lau
K. Izagirre, A. Lertxundi, X. Lete, R. Saizarbitoria
Euskal Editoreen Elkartea
118 orrialde
12 euro
Lau idazleren artikuluak
Del Olmo epailearen aginduz bertan behera itxia izan zen "Euskaldunon Egunkaria"ko langileen aldeko argitalpen hau Koldo Izagirrek, Anjel Lertxundik, Xabier Letek eta Ramon Saizarbitoriak 1993ko azarotik 1994ko uztaila bitartean igandero euskal egunkari bakarrean plazaratu zituzten lanen bilduma da. Batzuetan beren kasa, besteetan batak besteari erantzunez, beti debaterako pronto, garaiko kezka politiko, sozial eta kultural garrantzitsuenen inguruan idazle hauetako bakoitzak zer pentsatzen zuen uzten dute artikulu hauek agerian. Eta berdin izan dezakete hizpide historia eskolan, koherentziaren xarma, entziklopedien zapata, nazionalismoa, karramarroaren dilema, borroka armatua, jubilatuen ezkontza edota zaharren sexu debekatua.
Glosak. Esana zetorrenaz
Tere Irastortza
Pamiela
86 orrialde
12,40 euro
Tere Irastortza ulertzen zaila den munduari erreparatuz
Poema batetik abiatuz eta hura garatuz eratutako konposizioa izan daiteke glosa, baina baita ere ulertzen zaila den testua ulertarazteko, esapide iluna hizkuntza ulergarriagoan azaltzeko ezartzen den oharra. Eta hain zuzen ere ildo horretatik abiatua da Tere Irastortza Pamiela argitaletxearen eskutik plazaratu duen "Glosak Esana zetorrenaz" poema-liburua. Hiru ataletan banaturik dago. "Ateraldi entziklopedikoak. Idatzian zetorrenaz" deritza lehena, "Oharkabean zetorrenaz. Edo ilunaren eta beldurraren in-bertsioak" bigarrena eta "Ibileran. Esateko zegoenaz" azkena. Eta guztietan ulertzen zaila den munduari erreparatuz kontu edo erregistro baten alboan jarritako galdera-ikurrak agertzen ditu Tere Irastorzak.
Mattin-Laurent Partarrieu
Mattin-Laurent Partarrieu
Hordago /
Galerie saint-germain des pres
98 orrialde
40 euro
Hazparnekoaren margolanak
Mattin-Laurent Partarrieu margolariaren lanak jasotzen ditu liburu honek. 1946an Hazparnen sortua da bere kolore biziko margolan adimentsu bezain alaiak Partarrieu bezala izenpetzen dituen pintore hau. Parisen ikasia izan arren, bere jatorria nabarmen uztea gustuko du edozein dela marraztutakoa gehitu ohi dizkion euskal kutsuko xehetasunekin. Jende arruntaren bizimodua islatzen du bere koadroetan Mattin-Laurent Partarrieuk, tabernetako giroa dela, metro geltokietako eserlekuetan zerbaiten zain edo denborapasa daudenen jarrerak, emakume eder baten atzetik begiak joaten zaizkien gizonenak, ardo tragoska bat edateko gonbita, dantzaldi edota kasinoetako gorabeherak... Lan ugari egina da eta makina bat erakustaldi eskaini izan ditu Euskal Herrian zein atzerrian.
Jakin
Batzuen artean
Jakin
120 orrialde
8,40 euro
Munduko Gizarte Foroa
Euskal Herritik mundura egin du jauzi "Jakin" aldizkariak bere azkenengo zenbakian, gai nagusi gisa 2003an hirugarren aldiz Porto Alegren bildu den Munduko Gizarte Foroa aztertzen baitu. Haren inguruko bederatzi lan agertzen ditu denera, Foroaren historia, izaera, antolaketa, funtzionamendua, kokapen ideologikoa, parte hartzaileen aniztasuna, dauzkan helburuak eta etorkizunerako erronkak bezalako auziak jorratuz. Porto Alegreko bileretan parte hartzaile izandako Josu Egireunek eta Paul Nicholsonek eginiko lanak ematen dio azterketari hasiera, Munduko Gizarte Foroaren aurrekari historikoak eta funtsezko lan ildoak aurkeztuz. Eta ondoren doazen zortzi lanak Europa, Asia eta Latinoamerikako hainbat adituk eginak izan dira.
Azken urtea Lizeoan
Joxemari
Iturralde
Ibaizabal
248 orrialde
8,21 euro
Misterio sorta Leroux ikastetxean
Joxemari Iturraldek gazteei begira idatzitako nobela dugu "Azken urtea Lizeoan". Hemezortzi urteko neska kementsu bat da bere protagonista. Azken kurtsoa errepikatu beharrean aurkitu da, aurreko urtean ama hil zitzaiolako eta burua erabat galduta ibili zelako. Zoritxarrez, ez da errepikatzaile bakarra. Han aurkitu ditu Lizeoko bizimodu osoa gobernatu nahirik dabiltzanak ere. Mutil talde horrek banda bat dauka osatua eta ez du inor bakean uzten, ezta protagonista ere, baina hau ez da kikiltzen den horietarikoa. Bat batean, irakasle bat hilda agertu denaren zurrumurrua zabaldu da, ordea. Eta gero bi direla ere esan da. Nor ote hilketa horien erruduna?
Betizu izar artean
Batzuen artean
Ibaizabal/ Baleuko / Eitb
75 orrialde / 11,99 euro
Irailean estreinatuko den filmaren komikia
Ibaizabal argitaletxeak Baleuko ekoizpen etxearekin eta EITBrekin elkarlanean argitara emandako komikia da "Betizu izar artean". Euskal telebistako "Betizu" saioko pertsonaiak ditu komiki honek protagonista, eta bere mamia ere saio horretan dago oinarritua, irailean estreinatuko den filmaren komikia baita. Bertan, musikaren bidez galaxia osoa kontrolatzen duen Buff Alu bere izar berriak aukeratzeko lehiaketa prestatzen ari da, eta Betizu taldea parte hartzera gonbidatzea erabakitzen du.
Mil y una coces contra la disidencia
Batzuen artean
Beraiek editatua
199 orrialde
10 euro
Euskal disidentziaren aurkako "ostikoak"
Joxemi Zumalabe Fundazioko partaide diren Patxi Azparren, Luix Barinagarrementeria, Sabino Ormazabal, Mario Zubiaga eta Mikel Zuloaga ditugu "Mil y una coces contra la disidencia" liburua osatu dutenak. Garzon epaileak irekitako 18/98 sumarioaren barnean atxilotuak, preso edukiak eta ondoren kaleratuak izan ziren guztiak, beste hainbat eta hainbat bezala; eta beraiei buruz zein beste askoren inguruan Espainiako komunikabideetan zabaltzen ari zena kontuan harturik erabaki zuten liburu hau osatzea, Jose Mª Aznar edota Baltasar Garzonen ahotik irtendako hitzetatik hasiz, beste politikari, kazetari eta iruzkingile ugarik euskal gizarteko esparru oso zabal baten aurka aditzera emandakoetatik zenbait lagin jasoz, hitzez hitz eta gaztelera hutsean, zabalduak izan ziren bezalaxe. Izan ere, "Oro da ETA" Garzonek esan zuenetik, makina bat euskal jende zein erakunderi buruz direnak eta ez direnak esaten jardun dute (eta jarduten dute oraindik) Espainiako komunikabide garrantzitsuenek, beren "ostikoen" helmuga euskal gizartearekin zerikusia duen ia-ia guztia delarik: alderdi nazionalistak bezala, Athletic edo Realeko jokalariak eta abar.
Laura Macayaren liburua ekarri du euskarara Katakrakek. Amaia Astobizak itzuli du, feminismoaren baitako eztabaidak ireki eta beste begirada batzuetatik ekiteko helburuarekin.
Palestinaren aldeko manifestazioetan parte hartzen duten atzerriko ikasleak kanporatzea baimentzen duen dekretua izenpetu zuen urtarrilaren 30ean AEBetako presidente berriak. Orduz geroztik ikasleen bisen baliogabetzeak errepikatzen dabiltza.
Helena Taberna zinegileak jasoko du aurten Donostiako Giza Eskubideen Zinemaldiaren Saria. Sariaren entrega ostiralean, apirilak 11, 20:00etan Viktoria Eugenia Antzokian ospatuko den bukaera emanaldian izango da.
Eritasunaren kontrako protokoloa salatzeko eta prefeturarekin hitzordu bat lortzeko asmoz, bideratu dute okupazioa ehun bat laborarik. Tuberkulosia kasu batzuk agerturik Zuberoan, eritasunaren kontrako neurri sanitarioak segitu beharrean dira inguru horietako 280 etxalde... [+]
Hamaika eraso Uztaritzeko (Lapurdi) San Frantses Xabierko ikastetxe katolikoan gertatu ziren, beste biak Domintxaineko (Zuberoa) ikastetxe katolikoan eta Angeluko (Lapurdi) San Josepe ikastetxe publikoan. Uztaritzeko ikastetxean ikasitako bost gizonek beren testigantzak eman... [+]
Carli Pup (Udine -friuleraz Udin-, 1973) Friuli [friuleraz, Friûl] herriaren ekintzaile kultural garrantzitsuenetako bat da. Bere hizkuntza gutxituaren idazle, hizkuntzalari eta bere herriaren historialari bihurtu da.
Gaur egun, Informazione Friulana kooperatibako... [+]
Hezkuntza publikoko irakasleok hamabost urtetan berriztu gabeko lan-hitzarmena eguneratzeko eta hobetzeko beharra eta eskubidea dugu. Horretarako, benetako negoziazio batean murgilduta egon beharko genuke, baina errealitatea negargarria da. Negoziazio batean, alde oro ados... [+]
Martxoaren 27an aurkeztu zuen ARGIAk Bizi Baratzea Orria, lurrari begiratzen dion urtarokako aldizkari berria. Martxoaren hasieran zabaldu zen kide egin eta formatu oso berezia duen orri handia etxean jasotzeko aukera. Erantzun oso beroa izan du. Kide hauen profila ezagutu nahi?
Jaitsiera AEBen muga zergen igoerari erantzun ez dieten eta negoziatzeko prest azaldu diren herrialdeei aplikatu diela argudiatu du Donald Trumpek, Europar Batasuna barne. Txina eta AEBen arteko lehia komertzialak gora egiten jarraitzen du.
Hirugarren greba zikloa iragarri dute Steilas, ELA, LAB eta CCOO sindikatuek maiatzaren 12tik 16ra bitartean, hezkuntza publikoa indartzearen alde. Azaldu dute Hezkuntza Sailak helarazitako azken proposamenak ez diela euren aldarrikapenei erantzun egokirik ematen.
Sarriguren, Tafalla, Noain, Buztintxuri eta Gares herrietako D-PAI ereduko ikastetxeetako familiak kalera aterako dira Hezkuntza Departamentuak foru lege bidez ingeleseko orduak handitu nahi dituela salatzera. Euskarazko murgiltze ereduaren kontrako erabakia dela iruditzen... [+]
Nafarroako funtzio publikoan 30.000 langile zeuden grebara deituta asteazken honetan. Deialdiak jarraipen desberdina izan du sektorearen arabera, eta sindikatuek salatu dute foru gobernuak "abusuzko" gutxieneko zerbitzuak ezarri dituela nahita.
Iazko abuztuan, Irundik gertu, ertzainek atxilotzean izan zuen bihotzekoa gizon batek. Eneko Valdésen heriotzaren ikerketan, Polizia errugabetu zuten.
Bekat’uros LGBTQIA+ euskal besta hirugarren urtekoz iraganen da Atharratzen. Apirilaren 12an egun osoko egitaraua antolatu du Prefosta elkarteak, usaiako karrika inguruarekin, kontzertuekin eta ikusgarriekin.
Bi langileek Microsoften 50. urteurreneko ekitaldia moztu zuten ostiralean, eta enpresako buruei Gazako genozidioan duten papera leporatu zieten. Adimen artifizialarekin eginiko armak saltzen dizkio multinazionalak Israelgo armadari.