Hartzak ezaugarritzen duen Hego Euskal Herriko Panda Software enpresa, zein sarean barrena zabaltzen den birus mordoari erasotzeko eta aurre egiteko zereginetan aritzen baita, ezaguna da, jada, planetako herrialde nagusi guztietan eta merkatuko enpresa onenekin konkurritzen du mundu osoan. Birusen kontrako programen ekoizpenari gagozkiola, lider dugu Europan eta laugarren munduko rankingean. Horrela, munduko hogei milioi konputagailu inguru babesten ditu birusetatik, egungo egunean. Bestalde, segidako datu hauek erakusten dute Panda Software enpresaren hazte bizkorra. Bederatzi milioi euro inguru fakturatu zituen 1998ko ekitaldian: 1.500 milioi-edo orduko pezetetan. Iazko ekitaldian, 2001ekoan, bikoiztu egin zituen 2000ko emaitzak, 700 enplegaturen lana oinarri zuela. Hain zuzen, 24,8 milioi euro edo 4.131 pezeta fakturatu zituen 2000ko ekitaldian, eta 1,45 milioi euroko edo 242 milioi pezetako irabazia geratu zitzaion zenbateko horretatik. Iaz, berriz, 35 milioi euro fakturatu zituen; 2000an baino %44 gehiago, beraz. Aurtengoari dagokionez, 60 milioi euro edo 9.983 milioi pezeta fakturatzea aurreikusi du; 9 milioi euroko edo 1.500 milioi pezetako irabazia ateratzea eta Japonian nahiz Australian konkurritzen hastea aurreikusi du.

Birusen kontrako Panda Software enpresa euskaldunak, zeinek Zaldibarko Mikel Urizarbarrena bizkaitar gaztea baitu garatzaile nagusi, Euskal Herritik Txinara egin du salto, aurrez Estatu Batuetako eta planetako herrialde garrantzitsuenetako merkatuetan lekua hartuta. Berrogeita bost herrialdetan konkurritu du 2001. urtea amaitu aurretik, eta aurten ere munduan barrena hedatuz joateko asmotan dabil.
Txina izan da Panda Software enpresa besoak zabalik hartu duten potentzia handietako bat. Iazko abuztuan, Asiako lurralde horretara joan zen José María Hernández, enpresako lehendakariordea. Hara iritsita, Hyatt Shangay izeneko munduko hotel garaienean bildu zen mila lagunetik gorako giza multzoarekin. Tartean ziren, besteak beste, Txinako Administrazioko eta enpresa handietako goi kargudun ugari. Nola 300 milioi lagun baino gehiago hartzen baititu, kontsumoko potentzial izugarria dauka herrialde horrek. Bada, Panda Antivirus programaren txinerako bertsioa hasi da lekua hartzen, eta hango enpresen merkatuaren %30 bereganatu du dagoeneko.
Horrelaxe da. Egungo egunean, Txinan barna ere badabil birusen kontrako hartza. Lurralde horretara iritsi aurretik, ordea, munduko enpresa eta multinazional indartsu ugari egin dira Panda Antivirus programaren erabiltzaile, hala nola, Microsoft boteretsua (Bill Gates-en enpresa), Nokia, Adidas, Pepsico, Canon, Pizza Hut eta Boeing, baita hainbat gobernu edo erakunde ofizial ere: Frantziako Barne Ministerioa, Suediako Parlamentua, Txinako Banku Zentrala eta abar. Azken batean, Europako herrialde guztiak, Estatu Batuetako beste batzuk, Kanada, Ghana, Iran, Malasia, Bolivia... euskal enpresaren bezero ezin hobeak dira. Giza baliabideei dagokienez, 700 enplegatu dauzka Panda Software enpresak. Azpiegitura hori aski izan du Espainiako merkatuaren %60 hartzeko eta beste 45 herrialdetan ezartzeko. Frankizien bidez, %30 saltzen du kanpoko merkatu horietan, eta, bi urteren buruan, %50etik gora saltzea espero du. Ordurako, ordea (2004rako, alegia), 108 milioi euroko edo 18.000 milioi pezetako sarrerak izatea aurreikusi dute.
Panda Software enpresak birusen kontrako programen %8 edo %10 saltzen du Europako merkatuan. Oraingoz, %2,7 saltzen du nazioartekoan, baina aurten bertan iritsi nahi du %5era. Egia esan, Euskal Herriko Panda enpresak ia "irentsi" egin ditu birusen kontrako programa-ekoizle handi batzuk, hala nola, Ipar Amerikako Symantek firma, Norton antibirusaren ekoizlea, eta Network Associates, McAfee programaren jabea, eta, jakina, horrexegatik dira hain nabarmenak, hala enpresaren hedapena, nola enpresaren datu ekonomikoak.
Birusak egunero jaiotzen dira eta sarera zabaltzen. Ondorioz, erantzun ere egunero erantzun behar zaie, eta on-line, gainera. Horretarako, gertaera horri aurre egiteko, Panda Software enpresak 16,8 milioi euro edo 2.800 milioi pezeta inbertitzen ditu urtean. Izan ere, hauxe da ezinbestekoa: egunero eta une oro sareko azken birusa menderatzeko gai izatea. Alde horretatik, euskal enpresaren programak bata bestearen ondoren suntsitu ditu milioika konputagailu blokatu dituzten I love You, Magistr.b, Badtrans.b eta gainerako birus gogorrak.

Panda Software enpresak hamar urte behar izan ditu nazioarteko egungo maila lortzeko. Sorrera, berriz, Ostirala 13 izeneko birusari zor dio, antza denez. 1987an Eurosoft enpresa sortu eta gero, autoeskolentzako multimediako programa batean ari ziren lanean Mikel Urizarbarrena, Berta Frías (Mikelen emaztea eta enpresako akzioduna) eta José María Hernández, 1990. urtean. Birus horrek konputagailuaren memorian hartzen zuen ostatu, eta, behin bere lekuan, agindu jakin batzuk betetzen zituen ostiral eta 13 ziren egunetan, ordenagailuak kaltetzeko. Hala, norbaiten esanari jarraituz, birusa aztertzen hasi ziren hiru pertsona horiek, eta ahulgarriak aurkitu zizkioten: menderatzeko moduko programazioko makurrak zituela jabetu ziren. Orduan, edozein erasori aurre egiteko antibirusa sortzea posible ote zen bururatu zitzaien, eta hortik segitu zen «hartza»ren lehen bertsioa. Lan horren harira, 1990ean sortu zuten Panda Software enpresa Mikel Urizarbarrena eta Berta Frías senar-emazteek: 5.000 euroz azpitiko kapitala ipini zuten eta Durangoko etxebizitza txiki batean instalatu ziren.
Garai hartan, etsai ezezagunak ziren eskrupulu gutxiko programatzaileek garatutako birusak. Disketeetako informazioarekin batera, amaierarik gabe transmititzen ziren konputagailuz konputagailu, eta bilioi askotako galera sortzen zuten. Informatikako erraldoia zen IBM, esaterako, gauza zen bere burua defendatzeko, baina ez zekien nola aurre egin Espainiako estatuko PCei erasotzen zieten birusei. Hala, Panda enpresa kontratatu zuen Espainiako Estatuko konputagailuak babesteko, eta hitzarmen horrexek zimendatu zuen Panda Espainiako merkatuan.
1995. urtetik aurrera, Internet abian jarri zenean, globalizatu egin zen erabat birusen fenomenoa. Halako eran, non egunero 20 bat birus berrik kutsatzen baitute sarea, posta elektronikoaren bidez. Han-hemengo kalkuluen arabera, pirata informatikoek 33.656 milioi euro edo 5,6 bilioi pezeta galarazi zizkieten enpresei 2000. urtean. Programa antibirus gutxi batzuk bakarrik atera ziren onik urtearen buruan, ia-ia Ipar Amerikakoak soilik. Beraz, hil edo bizi zen kontua, eta, egoera horretan, irauteko erabakia hartu zuten Panda enpresako arduradunek, hau da, hazten jarraitzeko behar adina inbertitzea deliberatu zuten.
Geroztik, aldi oro ari da produktu berriak merkaturatzen. Joan den apirilean, adibidez, korporazioentzako Antivirus Corporativo eta Panda perimeterScan atera zituen kalera. Maiatzean, berriz, Panda Platinum programaren bertsio berria zabaltzekotan zen, enpresa txikientzako produktu gisa. Bestalde, iaz komertzializatu zuen Panda Titanium, etxeko antibirusetan munduan aitzindari den programa. Egungo egunean, propioki birusen kontrako programak alde batera utzi gabe bada ere, informatikako segurtasuneko sistema globalak garatzen ari da Panda enpresa, eta halaxe egiaztatu zuen joan den maiatzean Mikel Urizarbarrenak berak