Jose Cruz Sarasola naiz, Orereta-Errenterian sortua, 72 urte ditut. 1967an atxilotu ninduten lehen aldiz, frankismoan, ez nuen torturarik jaso. Gero bai ordea, Melitón Manzanas hil ondorenean atxilotu, eta poltsa eta bainera aplikatu zizkidaten, baita pikatxoi batez oin zolan jo ere. Donostiako Komandantzian 15 egun pasa nituen. Martutenen eta Palentzian urte eta erdiko kartzela eman nuen. Epaileak torturen aztarnak nik egindako ariketa fisikoen ondorio zirela aurpegiratu zidan.
Iaz atxilotu ninduten berriz ere. ETAko muga-aparatuko kide nintzelakoan. Goizeko 6:30etan 12 guardia zibilek eta emakume funtzionario batek etxea miatu zuten goitik behera. Madrilera eraman ninduten burua makurtua eta eskumuturrak lotuak. Mofak eta irainak jasan nituen sexu kontuak aipatuz: ea noiz egin behar nuen larrutan. Lasai egoteko laster ekarriko zidatela atsoa nirekin. Uste dut, Guardia Zibilaren Tres Cantos kuartelera eraman nindutela. Lau egun egon nintzen han. Bainera eta poltsa ez zizkidaten aplikatu baina psikologikoki oso egoera gogorra bizi nuen. Alboetako bi morroiek garondoan kolpe txikiak baina etengabeki jo zizkidaten, gaueko 10:00etatik goizeko 05:00ak arte. Batek ziostan: «Mi amigo es un señor y yo un señor y tu un terrorista hijo de la gran puta. Me has entendido?». Baietz esan arte, zapla eta zapla, erotzeraino. Nire komando kideak omen zirenen torturen garrasiak entzunarazi zizkidaten. Gero jakin nuen grabatuak zituztela. Ni bezalako aiton batentzat hiltzeko modukoak. Hiru bikote ezberdin izan nituen ondoan, bat beti mozorrotua. Esaten zidan nire ondoan basoerdi asko hartua zela. Hiru urtez ibili zela nire atzetik, eta ni espetxeratzeko frogen bila ari zirela. Hendaiaraino segitu omen ninduten, egia esan, nire nondik norako guztiak ezagutzen zituzten. Nire lagunen izenak zekizkiten, Biriatu eta Hendaiakoak. Nire senitarteko guztien fitxak ondo osatuta dauzkate. Hala ere, ikerketa guztiek erakutsi dute ez dudala loturarik inongo talde armaturekin.
Olatz Galarraga naiz, 28 urte ditut. Oreretarra naiz. Iazko inauterietan kalera atera nintzen eta morroi mozorrotu batzuek atxilotu ninduten. Intxaurrondora eraman nindutela uste dut, bidean kolpeak eta mehatxuak jasan nituen. Hatz markak eta argazkiak hartu eta etxera eraman ninduten berriz ere, dena miatu zuten eta Madrilera. Kolpeak eta poltsa jasan behar izan nituen. Lau gizonezkoen irain etengabeak jasan nituen, begiak estaliak edo burua makurrarazia. Komandantzian ukituak, mehatxuak jasan nituen, biluziarazi eta bortxatuko nindutela esan zidaten. Anaia atxilotua zutela eta hainbat lagun ere bai. ETArekin kolaboratzea leporatzen zidaten. Nik dena ukatu nuen. Gero ofizioko abokatuarekin epailearen aurrean pasa nintzen, burua erabat galdua nuela, nahasita, ez nintzen ni, ez nintzen gauza ezer esateko.
Azkenik frogarik ez, eta behin-behineko askatasunean nago; 12.000 euroko fidantza ordaindua. Bi astean behin epaitegira joan behar dut sinatzera. Lehen torturatzen zela uste nuen, orain berriz badakit zer den tortura. Esperientzia gogorra da, ez baitiozu inori kontatu nahi jasan dituzunak. Nik ez dut nahi gurasoek zehatz-mehatz jakin dezaten, zuretzako tortura bada, ez dituzu maite zaituztenak sufriarazi nahi.
Peio Goikoetxea naiz, Nafarroako Uztegi herrian sortua eta 30 urte ditut. 2001ean, otsailean, Tolosako errepidean atxilotu ninduten guardia zibilek. Intxaurrondora eraman eta handik etxera, goizeko ordubietan. Hiru ordu eta Madrilera. Ez naiz ziur non egon nintzen, baina Tres Cantos kuartelean izango nintzelakoan nago. Gau oso batez garondoan kolpeak etengabe jasan nituen, psikologikoki jota, burua lehertu beharrean. Ariketa fisikoak egitea agindu zizkidaten zutik ezin egon arte; larru gorritan jarri, umiliatu. Gero, oihuak eta garrasiak entzuten nituen, nik ez nuen imajinatzen horiek grabatuak zirenik, inguruan jendea txikitzen ari zirela pentsatzen nuen. Bost egun jan eta edan gabe. ETArekin kolaboratzen nuela aurpegiratzen zidaten.
Bukatutakoan, haiek idatzitako guztia sinatzera behartu ninduten. Nik ezetz, ez nuela sinatuko esan nien. Berriz ziegara eraman eta jipoitu ninduten lehertu arte. Azkenik sinatu nuen. Audientzian, ofizioko abokatua zain neukan. Dena ukatu nuen. Epaileak 6.000 euroko fidantza jarri eta etxera. Sumario baten barruan nago eta 15 egunetan behin sinatzera joan behar dut Tolosako auzitegira, ezin dut estatutik atera epaiketa egin arte.
Konfiantzako jendeari ere oso gogor egiten zait honetaz hitz egitea, oso gauza delikatua da. Oso urduri jartzen naiz pasatutakoa biziberritzen.