Euskararen Erabilera Berezituei buruzko Mintegia (EBM), izenak berak dioen bezala, hizkuntzaren erabilera berezituez edo espezialitate-alor ezberdinetan egiten den hizkuntzaren erabileraz jarduteko eta hizkuntzalaritza aplikatuarekin zerikusia duten gaiez gogoeta egiteko xedea duen mintegia da.

Joan den udazkenean Euskal Herriko Unibertsitateko Zientzia Fakultateko bi irakasle -Euskal Filologia Saileko Juan Carlos Odriozola eta Igone Zabala- izan ziren euskararen erabilera berezituei buruzko mintegi egonkor bat abian jartzeko dei egin zutenak.
Mintegia eratzeko arrazoiak argi ikus daitezke deialdia egin zuten bi irakasleon hitzetan: "Asko gara egun Euskal Herrian euskararen erabilera berezituak aztertzen ari garenok: batzuk irakaskuntzan (Euskara Tekniko izeneko irakasgaietan edo bestelakoetan), beste batzuk hiztegiak egiten, hedabideen eguneroko eginkizunetan edota testuak zuzentzen. Ez dira gutxi gure eguneroko eginkizunetan aurkitzen ditugun arazoak, batzuek euskara orokorrarekin eta beste batzuek zehazkiago erabilera berezitu batekin edo batzuekin zerikusia dutenak. Zenbaitetan erantzukizun handiaren zama nabaritzen dugu halako arazoren bati aurre egin behar diogunean: euskararen gramatiketan deskribatu gabe dagoen puntu baten inguruan, kontraesanak dituzten deskribapenak daudenean, estiloarekin zerikusia duten liburuek edota joerek kontraesanak dituzten ohiturak edo proposatzen dizkigutenean, norbaitek maiz erabili dugun hizkuntz baliabideren bat txarto erabilita dagoela aldarrikatzen duenean eta abar". Arrazoi eta arazo horiekin bat egin duen edota bat etor litekeen profesional oro da eta izan daiteke mintegikide.
Mintegikideen artean hainbat unibertsitatetako irakasle ugari bada ere, badira unibertsitatetik kanpoko arlo askotako profesionalak ere, hots, hedabideetan, administrazioan, irakaskuntzan eta bestetan dihardutenak. Izan ere, mintegia zabalik dago eguneroko jardunean hizkuntza baliabide edota xede izanik, hizkuntzaren normalizazioak kezkatuta daukan edonorentzat.
Lehenengo deialdi hari erantzun ziotenen artean eztabaidatu zen mintegiak zein izen hartuko zuen, nolako bilerak egingo zituen, zein gai azter zitezkeen eta abar. Zerrenda elektronikoa sortzea ere erabaki zen eta bide hori erabili da geroztik deialdiak egiteko. Zerrenda elektronikoa, orobat, partaideen artean informazioa eta iritziak trukatzeko baliabide ere bada. Mintegiko partaide izateko zerrendan sartu behar da eta horretarako listproclg.ehu.es helbidera "subscribe" (zuriune bat) "aadebm" (zuriune bat) eta horren ostean norberaren izen-deiturak jarrita, mezua bidali behar da.


Hainbat bilera egin dira orduz geroztik Leioako Zientzia Fakultatean eta zenbait gai jorratu dira eta jorratzen ari dira -gaiak azaldu, eztabaidatu eta erabilera-esparru ezberdinetan egin daitekeen aplikaziorako ondorioak atera-, hala nola, erdal erreferentziazko adjektiboen euskal ordainez jardun zuen Igone Zabalak abenduan eta hitz-hurrenkeraz aritu zen Bittor Hidalgo otsailean. Hitz-hurrenkerari buruz mintzatuko dira bai Zabala bai Hidalgo datozen mintzaldietan ere. Hizlari horiek jorratuko dituzte hitz-hurrenkeraren inguruko gaiak, oraingoz, apiril eta maiatzerako deitu diren bileretan. Era berean, asmoa dago hainbat estilo-liburutan hitz-hurrenkeraren eta puntuazioaren arteko harremanaz esan direnak aztertzeko, ikuspegi kritiko eta zientifiko batetik ondorio batzuk lortzearren, hitz-hurrenkeraz eta puntuazioaz erabiltzaileei irakatsi behar zaienaz.
Halaber, laburdurak hizkuntza-gertaera modura aztertu eta haien osaera eta erabilera aztertu nahi lituzke Odriozolak uda inguruan.


Beste gai batzuk ere proposatu dira, oraindik mintzaldiak finkatu ez diren arren: Euskaltzaindiak emaniko zenbait arauren interpretazioa dela-eta sortzen diren arazoak, hala nola, mugagabearen erabileraren inguruan edota zenbait hitz-elkarketaren inguruan sortzen direnak.
Ildo horretatik, Odriozolak asmoa du hitz elkartuen ikuspegi orokorra eskainiko duten zenbait hitzaldi emateko eta, bereziki, hitz elkartuen osaeran eta idaztarauetan Euskaltzaindiak erabat deskribaturik ez dituen esparruak jorratzeko.
Bestalde, lehenengo deialdi hartan irakur zitekeen gisara, "didaktikarekin eta hizkuntzalaritza aplikatuaren alderdi teorikoak jorratzearekin zerikusia duten kontuak" ere aztergai ditu mintegiak.
Mintegiak egiten dituen bileretan, deialdia egin zutenek hasiera-hasieratik proposatu eta ondoren erabaki bezala, hiru arlo jorratu dira eta jorratu nahi dira aurrerantzean ere: batetik, euskararen erabilera berezitua (edota zeharka erabilera orokorra) ukitzen duen edozein gai, interes orokorrekoa dena; bestetik, Euskara Tekniko izeneko irakasgaiekin zerikusia duten didaktika-kontuak (batez ere irakasgai hauek ematen dituzten irakasleen interesekoak liratekeenak); eta, azkenik, hizkuntzaren erabilera berezituen edota terminologiaren inguruko alderdi teorikoak jorratzen lagunduko luketen kontuak