Aurtengo urtarrilean bete da Askapen Nazionaleko Armada Zapatista (EZLN) matxinatzen hasi zeneko zortzigarren urteurrena. 1994ko urtarrilaren 1ean altxatu zen armetan, Mexikoko herri indigenen eskubideak aldarrikatuz. Martxoko hilabete honetan bete da, halaber, Zapatisten Lehenengo Ibilaldiaren edo Bakearen Karabanaren urtemuga. Halaxe da, bai, iaz iritsi ziren azteken hiriburuko Kongresuko tribunaraino, eta orduantxe entzun zen lehenengoz EZLNko komandante indigenen ahotsa. Gasteizen bizi diren bi euskal herritarrek -langile erretiratuak biak, dagoeneko- hilabete eman dute zapatisten matxinatokiaren erdi-erdian, eta sortu zaizkien gogoeten berri eman digute.
Imanol Olabarria Bengoa dugu mintzalagun eta Jesus Fernandez Navesek iritzi artikulua idatzi digu. Biak entzute handiko borrokalariak dira, duela 15 urteko martxoaren 3ko egun historikoaz geroztik. Hilabete pasatu dute Mexikon, zapatisten matxinatokiaren bihotz-bihotzean. Han, La Realidad inguruan, San José del Ríoko komunitatean bizi izan dira, eta harreman handia izan dute zapatisten mugimenduarekin eta mugimendukoekin; hau da, gertutik ezagutu dute orain dela urtebete indigenen eskubideen defentsan azteken hiribururainoko ibilaldia egiteagatik hedabide guztietan aurre-aurrean azaldu zirenen higikundea. Langile hauek ez ziren turista gisa joan Chiapasera. Gasteizen, laneko eta borrokako modu jakin bat hobetsi zuten bere garaian; langile batzordeen, batzorde herrikoagoen eta zuzeneko demokraziaren alde egin zuten beti. Orduko esperientziaren arra barruan, Chiapaseko errealitatea ezagutu nahi zuten, hango lagunena eta zapatisten mugimenduarena, eta, era berean, esperientzia trukatu. Orain, gogoetan aritu ondoren, ARGIA aldizkariarentzat hustu dute barrena, baina aurrez ondoko hau garbi adierazita: «Geure historiak, geure iraganak eta geure ametsek baldintzatzen digute errealitatearen ikuspegia».
Mexikoko bidaiaren aurretik, zer iritzi zenuten zapatismoaz?
IMANOL OLABARRIA. Gasteizen ginela, ohartzen ginen zenbait arriskuren artean zegoela zapatismoa, baina uste genuen Mexikoren barrukoak zirela guztiak. Alde batetik, Estatuaren ildo gogorraren aldekoak zeuden; bestetik, alderdi politikoen multzoa. Tartean, zapatistek irrigarri bihurtutako armada, zeinek, aski arma gutxirekin, Mexikoko hego-ekialdeko hiri garrantzitsuak hartu baitzizkion; Amerikako Estatu Batuek, Iparraldeko auzoak, alegia, polizia huts izatera behartutako armada, bestalde, droga-kontuez, delinkuentziaz, migrazioaz eta barruko gobernatzeko ezintasunaz soilik arduratzera hertsatua; mendekua asetzeko eta behialako pisua eta tokia berreskuratzeko premian dagoen armada. Alderdi politikoetan, berriz, PRI, PAM eta PRD alderdi estatuzale autoritarioak, beti boterean txanda noiz hartuko dabiltzanak. Horiek, jakina, ipurdiak agerian utziko lituzkete zapatisten zuzeneko demokraziaren teoriak eta praktikak; hots, «obedituz agintzeak».
Behin Mexikora helduta, Chiapasen bertan, zer ikusi duzue?
Han, beste arrisku batzuez jabetu gara; zapatismoaren beste etsai batzuez ohartu gara. Laburtuz, hauexek ditu arerio: Mexikoko Konstituzioan bertan ere jasoa dagoen arrazismo soziala, Hego Amerikako gerrilla-mugimendua, ahulgarrietan ahulgarrien gerta dakiokeen ekonomia eta Panamako Puebla Plana (PPP).
Zer dela-eta jar dezake arrazismoak zapatismoa arriskuan?
Antzinatikoa da indiarrenganako mesprezua, Mexikoko Konstituzioaren letran jasoa dago gutxiespen hori eta oraindik ere badu indarra zurien nahiz mestizoen artean. Indigenek pisu handia dute EZLNn eta beraz, zapatismoa moteltzeko moduko arrisku berria, hedatua eta lausoa da arrazismo kulturala. Horrez gainera, oso kontuan hartzekoa da langileen mugimenduak zapatisten auzian erakusten duen interes eza edo onarpen eza.
Nola egiten dio aurre zapatismoak arrazismo instituzional horri?
Zapatismoak herri indigenen duintasuna hartzen du ahotan, eta indigenen identitatea ezagutzea exijitzen du. Ez dute eskatzen, demokrazia formalaren idealaren arabera, «har gaitzazue beste herritarren berdin», ezta har gaitzazue beste herritarren ezberdin ere, baizik eta, herritar bezala hartzeko eskatzen du, ezberdintasunak ere barne direla. «Ezberdintasunak» ez dira onartu behar herritar hitsen eta trukerakoen osagarri edo kolore moduan. Berdintasuna bezain axolakoa da duintasuna, eta kontua ez da herritar oso izateko nork berea zokoratzea, parentesi artean jartzea edo elementu folkloriko bihurtzea, ezta bozkatzeko garaian poltsikoan gordetzea ere.
Nolatan da zapatismoaren beste galgarri bat Hego Amerikako gerrillen mugimendua?
Ezuste handia hartu zuten, hala Mexikoko Gobernuak, nola Hego Amerikako gerrillek oro har, EZLN Askapen Nazionaleko Armada Zapatista bezala agertu zenean. Mexikok, Espainiako errepublikano atzerriratuak hartu zituenetik, besteak beste, bazeukan halako izen bat, estatu edo herrialde ireki, progresista eta solidario moduan. Horrenbestez, Hego Amerikako ezkerrak uste zuen Amerika osoan zela bidezkoa iraultza, Mexikon izan ezik. EZLN jardunean hasteak Mexiko auzo solidariotzat eta babeslekutzat zeukaten gerrillak amorratu zituen, batik bat. Guatemalako gerrilla da adibide. Talde horrek Chiapas baliatzen zuen euskarri, gordeleku eta pasabide gisa.
Eta, gainerako gerrilletan, zer sortu zuen zapatisten jardunak?
Beste arrazoi batzuk tarteko, harridura, errezeloa, ezin ulertua eta kontrako jarrera sortu zituen gainerako gerrilletan, orokorrean. Ondoko adierazpen hau da horren erakusgarri: «...hamabi egunez borrokatu ziren, eta ordu batzuez okupatu zituzten udalerri bakar batzuk Mexikoko mugaldean. Gu 30 urtez aritu ginen borrokan, nazioko lurraldearen zati handiak kontrolatu genituen eta nahi genuen tokian egin genuen min. Gure ekintzak, ordea, inork ez ditu aintzat hartzen. Haienek, berriz, jakin-mina piztu dute».
Zapatismoa ez dabil botere bila.
EZLN da Berlingo Harresia botaz geroztik sortu den gerrilla-mugimendu bakarra. Zerk ezaugarritzen du?
Egia da. Beraz, komunismoaren osteko lehen gerrilla ere bada. Hasieran, EZLN bat etorri zen Hego Amerikako gerrillen teoria marxista leninistekin, eta miretsi egiten zituen Nikaraguako nahiz El Salvadorko esperientziak. 1994a eta gero, alde batera utzi zituen abangoardia-masak, buruzagiak-gauzatzaileak... bezalako teoriak eta baztertu egin zituen bai boterea lortzeko estrategia, bai proletarioen diktadura. Orduan, gerrillako abangoardia ohia indigenak matxinaden dinamikara biltzen hasi zen. Txiro, bakarrik, baina aske, aurreko mugimenduen mimetismotik eta sukurtsalismotik libratuta, bide berriak urratzen hasi zen mugimendua. Gaur egun, nire ustez, mugimendu zapatista ez da gerrilla ohien agerpena edo jarraipena; ez bata, ez bestea. Aitzitik, haiek porrotetik eta beren hasierako proiektua oker ateratzetik jaioa dela iruditzen zait, eta hori guztia denboraren joanak egiaztatzen du.
Gaur egungo zapatismoak nahi al du botereren bat?
Boterea alde batera utzita, transformazioaren alde ari da lanean egungo mugimendu zapatista. Kontuak horrela, bada non edo han sailkatu nahian dabilenik, baina inor ez da iritsi definitzera: «zoroak» dira zenbaitentzat; beste batzuentzat, berriz, «inozoak», «idealistak», «erreformista armatuak», «poeta gerrillariak», eta abar. Marcosek justizia modu konplexuagoan ikusteko eskatzen digu, era horretara, banaketa nahiz ezberdintasunen (duintasunaren) aitortzea barne izan ditzan. Era berean, kultura politikoa berriz aztertzeko esaten digu: boterearen piramidea behekoz gora jartzeko, zaborretik askatzeko; norabidez aldatzeko, helmuga finkorik izan ez arren; baliabideak inprobisatzeko... Abentura izugarria da, benetan. Errotiko aldaketa defendatzen dute, bai teorian, bai praktikan, baina horretarako metodoak arian-arian asmatu behar dira. Horrexek ernegatzen eta nahasten ditu abangoardiak eta dogmatikoak.
PANAMAKO PUEBLA PLANA.
Lehen esan duzunez, ekonomia da zapatismoaren arazo larriena.
Zapatistek, ezkerreko gehienek bezalatsu, besteen makurrekin eta porrotekin hazi behar izan dute; beren kasuan, 80ko hamarkadan Chiapaseko garapenaren erantzule barrukoek nahiz kanpokoek utzitako ondarearekin. Legezko eta kontrabandoko inportazioak zirela kausa, abere-hazkuntzako krisia gertatu zen, eta baserritar indigenen ekonomia erasan zuen. Berebat, abeltzain handiei basoa ustiatzeko ezarri zieten debekuak ere kaltetu zuen indigenen ekonomia, sasia garbitzeari eta lurra erretzeari utzi behar izan baitzioten, eta bide horretatik lortzen zuten lehen lurra hobetzea eta etxeko egurra egitea. Bestalde ez zen berritu Kafearen gaineko Nazioarteko Hitzarmena (1989), eta produktu horrek ziurtatzen zien soldata denboraldiko milaka langileri eta hamaikatxo baserritarri. Ez berritzearen ondorioz, %50 beheratu zen kafearen prezioa 89tik 92 arte. Baserritar indigenentzako zartada edo jipoi handiena, hala ere, 1992an Konstituzioaren 27. artikulua aldatzetik etorri zen, ziur aski. Erreforma horrek itxi zizkien laborantzako lur-sail gehiago izateko ateak.
Zapatismoak bazuen ekonomiako planik?
Zapatismoak, matxinaldien garaia zetorrela eta, gerrako ekonomia ezarri zuen, bizi-iraunekoa, dagoeneko hainbat urte egin dituena. Denbora igaro da, eta salaketak ezin du estali ekonomiako plan baten beharra, zeina noraezekoa eta presazkoa baita ekimen politikoari eusteko. Egin ezean, litekeena da zapatisten baseek, egonlekuak utzita, Panamako Puebla Planaren arabera Mexikoko hego-ekialdean izango diren errotetara alde egitea. Mexikoko Bankuaren datuetan ageri denez, populazioaren %60 txiroa da Mexikon eta %40 guztiz behartsua, eta gogoan izan behar dugu Chiapas dela Mexikoko lurralde behartsuenetakoa.
Zer jasotzen da plan horretan?
Megaproiektu bat da. Neurri batean, Erdialdeko Amerika osoari erasaten dio; bete-betean, berriz, Chiapasi, Mexikon. Estatu Batuek Panamako Kanala utzia dutenez gero, punta-puntako balio geoestrategikoa dauka Chiapasek PPPren barruan. PPPan ageri denez, Atlantikoa eta Pazifikoa komunikatzeko kanala egin nahi dute, Coatzacoalcos eta Salina Cruz portuak konektatuz. Proiektuaren neurriak ikusita eta Estatu Batuak geografikoki hurbil daudela jakinik, Pazifikora irteteko bide errazena izango litzateke nazio horrentzat. Beraz, AEBri interesatzen zaio gehien proiektua, eta plana ezarrarazteko modua badu, jakina. Planaren abal-emaile dira, dagoeneko, AEB, FMI, Munduko Bankua eta Garapeneko Banku Interamerikanoa.
Zer interes ekonomiko daukate AEBek plan horretan?
Izugarria. 1973ko Ekialdeko Gerraren ostean, LPEE erakundeak petrolio-enbargoa ezarri zien Estatu Batuei, Israeli laguntzeagatik. Orduan, Mexikora begira jarri zen AEB, petrolio-kontuetan. CIAk aztertu zituen Chiapaseko hidrokarburoen eta gas naturalaren erreserbak: ugariak zirela eta geografikoki hurbilen zeuzkatenak zirela frogatu zuen. Handik aurrera, Mexikoko liderren «lagun» egiten hasi zen AEB, gasa eta petrokimika kontrolatzeko. Prozesua geroago burutu zen, 1994an, NAFTAren gaineko akordioa izenpetu zutenean (AEBren interesen mendeko Mexikoren integrazioa). Orduan utzi zizkien Mexikok AEBei, Lacandona oihanaren inguruan, bere ekonomiako sektore estrategiko batzuk; hala nola, petrolioarena, gasarena elektrizitatearena eta biodibertsitatearena, eta orduan bihurtu zen lehengaien, nekazaritzako eta abeltzaintzako produktu fabrikatu gabeen eta esku-langile merkeen hornitzaile.
Zer ondorio izan ditzake plan horrek zapatisten mugimenduan?
Arras larriak. Lacandona oihanak erreserba potentzial handiak dauzka berez. Tehuantepec istmotik gertu dagoenez, gero eta interes geopolitiko handiagoa dauka Chiapaseko espazio guztiak. Eta, hain zuzen, espazio horretantxe jarduten du mugimendu zapatistak ere. NAFTAko akordioek zuhurtasunez jokatzera behartzen zituzten AEBetako eta Mexikoko gobernuak, eta, horregatik, mugimendu zapatista suntsitzeko neurriko plana diseinatu zuten, drogaren kontrako borroka mozorro hartuta. 1994ko lehen hamar egunen ondoren, bi norabidetan jardun zuten: batetik, zapatistak inguratu eta xaxatu egin zituen armada militarrak; bestetik, gatazkaren irtenbidea negoziatzen aritu ziren (San Andrés de Larraizarreko elkarrizketak). Orduz geroztik, gerra lehengo kontua dela dio Gobernuak, eta bake duinaren eta iraunekoaren bidetik doazela. Gerra edo bakea izan, ordea, baliabideak bakarrik dira ezberdin; zapatismoa suntsitzeko nahiak gogor dirau. Propagandak, errealitatea ezkutatzeak, hondamen ekonomiko sozialak, kontrol militarrak... erakusten dute arma-hotsik gabeko gerraren jarraipena