Goikom enpresaren Beasaingo egoitzaren leihoan kamera bat dago. Bertatik Usurbe mendia eta bere antena ikus daitezke. Horixe da hain zuzen gela bereko mahai gainean dagoen telebistatxoan ikusten den irudia, Goierri Telebistaren frogako emisioa. Arrate irratia ere entzuten da telebistatik, irrati honi baimena eskatu baitzioten euren soinua erabiltzeko. Hor dago ere behin behineko emisorea, froga garai hauetan oso potentzia txikiz (1 watt) ari dena. Alboan beste emisore bat, behin betikoa (100 watt), hemendik gutxira Ordiziako industrialdetik emitituko duena.

Izan ere, Goiekik Goierri 2005 Ideia Berritzaileen V. saria emateaz gain, Ordiziako industrialdean egoitza eskaini dio Goierri Telebistari, Gipuzkoako eskualde honetan aurrerantzean ikus ahal izango den euskarazko telebistari.
Goikom-eko (Goierri Komunikazioak) arduradun Jabier Txurrukak urte asko daramatza telekomunikazioaren munduan lanean eta urte asko dira, halaber, Goierrik bere telebista izateko eta euskarari beste medio bat emateko ilusioa buruan bueltaka zuela. Goikom abian jarri zuenean, denbora gehiago eskaini zion telebistaren proiektuari. Enpresa honek erredaktatu zuen proiektua baina, Jabier Txurrukaren esanetan, «jende askoren ezinbesteko laguntzaz».
Joan den hilean proiektuari azken bultzada Goiekiren sariak eman zion, baina telebistan ez da Goikom bakarrik arituko lanean. Profesional askorentzat irtenbidea suposa dezake eta lanpostuak sor ditzake. Hori izan da sari jasotzeko aldagairik garrantzitsuenetakoa.


Goierri Telebistak ez die goierritarrei, gautik egunera, programazio osatua eskainiko. Euren bidea apurka-apurka pausoak ematea izango da. Hasieran bi lagun arituko dira lanean: Xabier Txurruka eta Nuria Perez kazetaria. Bezeroak erakartzeko lanetan, publizitatean, instituzioekiko harremanetan, diru laguntzetan... arituko dira. Eusko Jaurlaritzari ere behin betiko frekuentziaren eskaera egingo zaio. Oraingoz 37. kanalean eta potentzia gutxiz emititzen ari baitira, baina kokapen honek beste kateren bati arazoak sorraraziz gero, beste frekuentzia bat emango baitzaie. Xabier Txurruka semearen esanetan, «ez dugu inolaz ere baztertzen gu edozein unetan errelebatuak izatea. Bakoitzaren balioaren arabera, profesional onak bilatzen saiatuko gara Goierri inguruan». Javier aitak ere oso garbi du: «Kalitatezko telebista egin nahi dugu». Eta proposamenik behintzat ez zaie falta; dagoeneko kazetari, irudi eta soinuaren inguruko profesional eta bestelako pertsona ugariren eskaintza jaso dute.
Euren programazio propioarekin udaberri honetan hasi nahiko lukete, Beasaingo festetan-edo. Telebistak inplantazio epe bat izango du, urtebete edo bi urtekoa. Teknikoki garatzen joango da epe honetan, ekipamenduetan, unitate mugikorretan, emisioan... Hasieran Usurbe tontorreko antenari esker Goierriko %80ak jasoko du emisioa eta aurrerago Ataun, Zegama... inguruko itzalak betetzeko errepikatzaileak ezartzea dute xede.
Programazioa zehazteke badago ere, garbi dute edukiek lokalak izan behar dutela, eskualdeko jendeari eskualdeko informazioa eskaini behar zaiola. Haurrak ere kontuan hartu nahi dituzte. «Ustiatu gabeko harrobia dugu», dio Javierrek eta Urdaneta edo Murumendi ikastolek dagoeneko euren bideo eta audio praktikak egiten dituztela. Orain egiten dituzten saiotxoak eskualde guztira zabaltzeko aukera emango lieke telebistak. Hasiera batean irudi eta soinu enpresen produktuak erosi edo lortu eta emitituko dituzte. «Doan uzten badizkigute askoz hobe», dio Xabierrek. Javierrek aldiz jendearen aportazioa «denek apur bat jartzea» beharrezkoa dela dio «produkzio propioa egiteko egitura lortu artean».
Publizitatearen bidez dirua lortzeko asmoa badute ere, instituzioen laguntza izango da nagusi finantzaketan: Eusko Jaurlaritza, Gipuzkoako Foru Aldundia eta bereziki, eskualdeko udalak. Lortzen dena lortzen dela, inbertsioak egiteko orduan malgu ageri dira telebista berriko arduradunak. «Asko badugu, inbertsio fuerteekin hasiko gara, bestela oraingoz profesionalen soldatak ordaintzeko adina besterik ez dugu behar».
Inbertsioetan, aurrekontuetan, programazioan, epeetan... xehetasun gutxi eman digute, eurek ere ez baitakite ziur zein izango den Goierri Telebistaren erritmoa. Ederki dakiguna hasi berri dugun 2002 honetatik aurrera Goierrik euskarazko telebista izango duela da