Iazko urte amaieran 200.000 ordenagailu inguru omen zeuden Euskal Autonomia Erkidegoko etxeetan. Eusko Jaurlaritzak hiru urteren buruan kopuru hori bikoizteko asmoarekin, «Konekta Zaitez» kanpaina jarri zuen abian. Bigarren helburua, internetdun partikularren kopuruak bost bider handitzea zen. Hasiera batean, Eusko Jaurlaritzak 25.000 pezetako (1.000 libera, 150,25 euro) laguntza eskaini zien ordenagailua erosi eta internetera konektatzen zirenei. Aldi berean, Eusko Jaurlaritzak Vital Kutxa, BBK eta Gipuzkoako Kutxarekin egindako akordioaren ondorioz, hiru aurrezki kutxek, maileguetan erraztasunak emateko konpromisoa hartu zuten: 11 urterako maileguak, komisiorik gabekoak…

Jaurlaritzak finantzaketarik gabe ere erosi zitekeela ordenagailua azaldu zuen. Horretarako, kanpainarekin bat egin duten banatzaileetara jo, gutxieneko baldintzen barruan ordenagailua hautatu eta konexioa lortzeko Euskal Autonomia Erkidegoko biztanlea zarela frogatzea nahikoa izan da. Deskontua ere, automatikoki egin izan dute banatzaileek.
Finantza erakundeen laguntza jasotzeko, lehenengo pausoa dendara joan eta saltzaileari salmenta agiria eskatzea izan da kanpainan zehar. Gero, hori hartu eta banketxera joan beharra izan du jendeak, Euskal Autonomia Erkidegoko biztanlea dela frogatuz. Gehienezko kreditua 180.000 pezetakoa izan da Jaurlaritzak eta finantza erakundeek emandako 25.000 eta 20.000 pezetako laguntzak alde batera utzita. Kreditua ordaintzeko eperik luzeena, berriz, 11 urtekoa da.
Kanpainaren berri eman bezain laster, erakunde berriak sartu ziren zakuan, hala nola, Euskadiko Kutxa. Honek 45.000 pezetako diru laguntza eskaini zuen ordenagailua erosteko, eta hilero 2.000 pezetatik behera ordaindu beharreko kreditu errazak. Luze gabe, akordio berria sinatu zuen Eusko Jaurlaritzak 11 finantza erakunderekin: Banco de Vasconia, Banco Guipuzcoano, Banco de Vitoria, Banco Popular, Bankoa, Vital Kutxa, BBK eta Gipuzkoako Kutxa. Azken horien eskaintza hauxe izan zen: 200.000 pezetako ordenagailua erosten zuten herritarrei, 6 urtetan hilero 2.500 pezeta kobratuko zitzaizkien.
Hainbeste erraztasun eman ondoren, itxarotekoa zen jendearen erantzuna itzela izatea. Hitzarmena sinatu ostean, Juan Jose Ibarretxe lehendakariak berak aitortu zuen "konpetentzia piztea" zutela helburu. Izan ere, horrela operadoreek tarifak merketu eta interneterako lotura hobeak eskainiko zituztela uste zuten. Azken egunotako berrien arabera, finantza erakundeetako batzuek hilabete gehiagoz luzatuko dute 20.000 pezetako diru laguntzaren hitzarmena eta beraz, urtarrilaren 31 arte laguntza horri probetxua ateratzeko moduan izango gara.
Ordenagailua erosteko, maneiatzen jakitea ezinbestekoa da. Arazo horri ere aurrea hartu zion Eusko Jaurlaritzako Justizia, Lan eta Gizarte Segurantza Sailak: internet eskolak antolatu zituen. 16 eta 80 urte bitarteko Euskal Autonomia Erkidegoko edozein herritarrek izango zuen internet erabiltzen ikasteko aukera. 16 orduko ikastaroak antolatu ziren, eta horietatik 10 praktikoak. Beharrik gabeko pertsonentzat antolatu ziren ikastaroak, eta urtero 20.000 ikaslek parte hartzea zen Jaurlaritzaren aurreikuspena.
Azkenean, programak emaitzak eman zituen: lehenengo astean 2.000 ordenagailu saldu ziren. 2001eko urtarrilean, 460 milioi pezetako (2.764.655 euro) diru laguntzak zeuden emanak. Kontuan hartuta ordenagailu bakoitzerako 25.000 pezetako laguntza eman zuela Jaurlaritzak, ordenagailu mordoa direla kalkula dezake edonork. Eskaeraren aurrean, Eusko Jaurlaritzak enpresetara zabaldu zuen kanpaina, eta Miramon, Miñao zein Zamudioko teknologia parkeetan teknologia berrien sustapenerako bulego bana jarri zuen.
Hiru urterako finkatutako ordenagailu kopuruaren herenak salduta zeuden dagoeneko, 2001eko uztailean. Orduan pozik agertu ziren Eusko Jaurlaritza eta SPRIko zuzendaria (Eusko Jaurlaritzak SPRIren bitartez bideratu izan ditu «Konekta Zaitez»erako diru laguntzak).
doña kasilda parkean nabigatzen. Kanpaina amaitzera zihoala-eta, joan den udazkenean hainbat ekintza antolatu zuen Eusko Jaurlaritzak. Bilbon, Donostian eta Gasteizen «Konekta Zaitez»eko karpak jarri zituzten urrian. Asteburu oso batez izan dira karpak hiriburuetan, eta jendeak bertara joan eta interneten ibiltzeko aukera izan du.
Begiraleek lagunduta, bakoitzak gehien interesatzen zaion gaiak begiratzeko aukera izan du kalean bertan. Abenduan Durangoko Liburu eta Disko Azokan ere jarri zuten «Konekta Zaitez» gunea, eta batek baino gehiagok liburu eta disko artean baino gehiago disfrutatu zuen «Konekta Zaitez» gunean.
«Azken finean, jendeak jakin behar du internet ez dela txarra. Neurrian erabiliz gero, eguneroko gauzetan lagundu egiten digula ulertu behar du jendeak», azaldu zuen Bilboko karpako begirale batek. Ordenagailuen artean zebilen neska-mutil koadrila batek ez zuen zalantzarik izan, "etxean ez daukagu, baina eskatu egin behar dugu", esateko orduan.
Bilboko karpa, Doña Kasilda parkean jarri zuten. Adineko lau emakume zeuden hirugarren lerroko ordenagailu batean, eta eurek adierazi zutenez, "nork pentsatuko zuen, lekutik mugitu gabe horrelako gauzak ikusi ahal izango zirenik!". Haiek behintzat bidaia laburra egiteko aukera izan zuten, eguneroko kafetxoa betiko lekuan hartu ordez.
Gainera, «Konekta Zaitez» Legebiltzarkide subprograma jarri zuten abian Gasteizko legebiltzarrean. «Bulego Mugikorra» izeneko ekimenaren barruan, legebiltzarkideei ordenagailu eramangarria zelan erabili irakatsi zitzaien. Eusko Jaurlaritzan jarritako programa berriei esker, legebiltzarkideek etxeko euren ordenagailutik eman ahal izango dute edozein ekintza parlamentario egiteko proposamena zein baimena.


Nafarrek ere izan dute konektatzeko aukera. 2001eko uztailaren 8a izan zen diru laguntzadun ordenagailua eskuratzeko azken eguna. 6.009 nafarrek erosi zuten ordenagailua Foru Gobernuak bultzatutako «e-hogar» kanpainari esker.
Kanpainarekin bat egin duten gehienak Iruñea eta inguruko hiri handietakoak dira. Estatistiken arabera, beste hainbat hiritan, % 10era ere ez da iritsi konektatu kopurua, nahiz eta hiriak izan eta egunerokotasunean hiriko bizimodua egin. Kasurik aipagarrienen artean, Tafalla herria dago Lizarrarekin batera

Milaka eta milaka euskal herritar izan dira etxerako ordenagailua eskuratu dutenak Eusko Jaurlaritzak sustatutako "Konekta Zaitez" kanpainaren bidez. Aparatu berri gehienekin gertatzen den bezala hasieran asko erabiliko dira, interneten eta CD-ROMetan saltseatzen batez ere, baina hilabete batzuen bueltan erabiltzaile bakoitzak erabilera-tamaina hartuko dio.
Malda handi samarreko aldapan abiatu naiz eta nik neuk ere internet ia egunero kontsultatzen dudala aitortzen diot nire buruari, nik ere nire erabilera-tamaina hartu baitiot. Lanean informazioaren kudeaketa elektronikoari buruz informazioa bilatzen edota posta elektronikoa erabiltzen igarotzen dut denbora puska bat; eta etxean, egunkari elektronikoak, bidaien eskaintza edota lagun batek komentatutako gai baten inguruan aritzen naiz. Posta elektronikoan euskara nahikoa erabiltzen dut, baina interneten aritzean erdara da hein handian kontsulta-hizkuntza; ideia honek aldapak eragindako izerdi beroarekin izerdi hotza aldi berean jariatzea eragiten dit eta hau beti nire barrenak aurreratzen didan "sos"seinalea izaten da.
Izerdi hotzak zerbait analizatu behar dudala adierazten dit, nire neuronek nik baino lehenago ulertu dute disfuntzioa alegia, eta nik horren kontzientzia izan arte izerdia jariatzen segituko dut. Guadalupeko bidera ailegatu naiz eta zer egin? Edo bideari segitu Jaizkibel hego aldeko hegitik zeharkatuz, edota hogei minutuko beste izerditxoa egin eta Jaizkibel gaineko bideari jarraitu. Gorputzak Guadalupeko bidean abiatzea eskatzen dit, baina neuronek hogei minutu beranduagoko plazerra gogorarazten didatenez halaxe egiten dut, nekatuta eta izerditan, baina berriro gora.
"Konekta Zaitez" kanpainarekin euskal gizartea munduko pelotoi handian aurrera samarrean kokatzea lortu da, baina pelotoi horretan bereiztuko al gaituzte? Edota marka jakin gabeko elementuak izango gara? Zer behar dugu interneten euskaldunok euskaldun, gure begien aurrean eta besteenean ere, izaten segitzeko? Izerdia berriro beroa da eta ondo sentitzen naiz korapiloa ikusi dudalakoan bainago. Hala, Jaizkibel gaineko bidera ailegatu naiz eta nekea ia bat-batean joan eta lehen aldiz, goiz honetan, izerdi tantak gustukoak ditut.
Ordu-pare bateko bidea dut Jaizkibel gainean Guadalupera heldu arte, baina plazerreko bi ordu izango direla badakit, ezkerrean itsasoa eta barkuren bat edo beste eta eskuinean Lezo, Errenteria, Aiako Harria, Irun, Hendaia... ikusteaz gain, buruan "Kokatu euskara webean" kanpaina baitaukat; nahi duenak dakiena edo garatuta duen jolasa, hala nola, Australiako kanguruen ezaugarriak edota ARGIAren tribial elektronikoa, era erraz batean webean kokatzerik izatean datza kanpaina hau. Bururatutako ideia hau lagunarteko elkarrizketa batean entzun nion lehen aldiz euskaltzale bati eta ona iruditu arren buruko beste pultsu elektriko bilakatu zen, Jaizkibeleko aldapak berriro analogiko bihurtu didan arte.
Guadalupera ailegatu naiz eta begien bistakoaz gozatzea erabaki dudanez "Kokatu euskara webean" kanpainari jai eman diot gaurkoz