Zinealdeak ekoiztetxeei ikus-entzunezko produktuak osatzeko zerbitzu guztiak eskura jarriko dizkie. Horrela, ez dute zertan urrats bakoitza aurrera eramateko alde batetik bestera ibili beharko. Eta beraz, produktua bertatik mugitu gabe ekoizteko aukera izango dute. Oarsoaldea Garapen Agentzia eta Sarobe arte eszenikoen eskola dira proiektuaren sustatzaileak. Ideia Saroben sortu zen, bestalde, bertako Enrique Santiago zuzendariak dioen bezala, Oarsoaldearen esku-hartzerik gabe Zinealdea ez zen gauzatuko. Oarsoaldea Garapen Agentzia Oiartzun, Pasaia, Lezo eta Errenteriako Udalek osatzen dute. Egitasmoaren lehen aurkezpenean lanak, agian, 2000ko irailean hasiko zirela esan zuten, gero 2001eko maiatzera atzeratu ziren. Baina, orduan ere lurrarekin arazoak zeudela batetik, eta parte hartuko zuten enpresak zeintzuk izango ziren zehaztu gabe zegoela, bestetik, lanak ez ziren hasi. Azkenik, hasi dira Zinealdea kokatuko den Lintziringo lursaila prestatzen. Horrela, 2002ko amaierarako lehen zatia eraikia izatea aurrikusten da eta, hortaz, zenbait enpresa bertan lanean hasteko gai izango dira. Proiektuaren inbertsio kostua 1.000 milioi pezetatik (40 milioi libera, 6,01 milioi euro) gorakoa izango da.

Dekorazioa, makillajea, 35 mm-ko kamerak, telebistarako kamerak, platoak, telebista postprodukzioa, diskoak grabatzeko estudioa, soinu teknologia, argiztapena… Metalurgia industrialde bat izango balitz moduan, Zinealdean zerbitzu hauek guztiak toki berean bilduko dira. Arduradunek ez dituzte parte hartuko duten enpresen izenak aurreratu, izan ere, oraindik zenbait gauza lotu gabe daude. Dena dela, proiektuaren lehen urratsean hamar bat enpresa izango direla esan zuen Enrique Santiagok. Lintziringo gaineko 100.000 metro koadro egokituko dituzte proiektua aurrera eramateko eta kudeatzaileen helburua, besteak beste, lursail guztia ikus-entzunezko enpresez betetzea da. Horrela, leku berean zerbitzu eta baliabide guztiak izatean ekoizpen kostua merkeagoa izango da eta bezeroak Zinealdeatik ikus-entzunezko produktu amaitua eskuan dutela irtengo dira. Sarobe arte eszenikoen eskolako zuzendari Enrique Santiagoren iritziz, atzerritik Euskal Herrira film bat grabatzera etorriz gero, enpresa horrek ez du zertan, adibidez, Madrilera joan beharko posprodukzioa egitera, baliabide guztiak Zinealdean izango baititu. «Euskal Herriko edozein puntutatik bi orduko bidaia dago Oiartzunera, eta Euskal Herria esaten dugunean Nafarroa eta Iparraldea ere hartzen dugu kontuan». Zinealdean egongo diren enpresa gehienak Euskal Herrikoak dira, baina kanpoko konpainiak ere izango dira. Santiagoren arabera, proiektua ez da Euskal Herriko merkatura mugatuko, «Euskal Herria promozionatzeko dago, baina merkatua merkatua da, hemengo ekoiztetxeak daude, Estatukoak, New York-ekoak…». Datorren urterako, esate baterako, Frantzian 700 ekoizpen proiektu daude eta Zinealdea guztiekin negoziatzen ari da. Egitasmoaren xedea ikus-entzunezko industriaren bezero kopurua handitzea eta lehiatzeko aukera ematea da. Oarsoaldea Garapen Agentziatik adierazi digutenez, bideragarritasun plana bukatuta, orain azken xehetasun eta mugimenduak zehazten ari dira guztia martxan jartzeko. Europa eta Espainian ikus-entzunezko merkatua aztertu ostean, sustatzaileek handitzen doan merkatua dela ikusi dute. Horrez gain, egitasmoa «nahiko neurtua» dagoela uste dute, Espainiako beste proiektuekin erkatuz «txikia» baita. Lintziringo 100.000 metro koadroko lur eremuaren aurrean, Valentzian, adibidez, bi milioi metro karratu baliatuko dituzte antzeko proiektu baterako.

Arestian esandakoez gain, 800 metro koadroko plato bat, 2.000 metro koadroko beste bat, kanpoaldeko plato bat eta hotela izango ditu Zinealdeak. Guztia kudeatzeko helburuarekin koordinazio enpresa bat egongo da eta, ziur asko, "Zinemaldea" izenaz bataiatuko dute. Bere xede nagusia Zinealdeako enpresek ahalik eta lan gehien izatea izango da eta urte amaieran ahalik eta okupazio handiena lortzea. Platoak bertan kokatuko dira eta ekoiztetxeek alokatzeko aukera izango dute, hori bai, handik kanpo baino merkeago. Hortaz, bere funtzioa guztia kudeatzea eta bertako enpresek lan egiteko espazioa eskaintzea da.
Oarsoaldea Garapen Agentziaren arabera, egitasmoak hiru xede nagusi ditu: lanpostuak sortzea, ikus-entzunezko alorrak potentzialtasun handia duela uste baitute; azpiegitura egoki bat eskainiz ekoiztetxeak suspertzen laguntzea; eta euskaraz egin daitezkeen ekoizpen lanak bultzatzea.
Lintziringo gaineko lursaila urbanizatzeko orduan proiektuak instituzioen laguntza jasoko du. Bestalde, Enrique Santiagok dioenez, beste edozein industrialdek dituen erraztasunak izango ditu. Gerora, bertan kokatuko diren enpresek guztia ordaindu beharko baitute. Santiagoren iritziz, «Zinealdean kokatuko diren enpresei inork ez die ezer oparituko, lurra beraiek ordainduko dute, beste industrialde batean kotxe konpainia batek egiten duen moduan". Hortaz, instituzioek jarritako diru guztia berreskuratuko dute, egitasmoa pribatua izango baita. Sarobe arte eszenikoen eskolako zuzendariaren ustez, ikus-entzuteko industriak, beste industriek bezala, gobernuaren laguntza jaso beharko luke. «Industria honek lanpostuak sortzen ditu, Euskal Herria saltzen du paisaiekin, eta ekonomia aberasten du, hortaz, turismoarentzat, kulturarentzat, hezkuntzarentzat eta Euskal Herriaren garapenerako oso garrantzitsua da".


ikus-entzunezko enpresez osatutako industrialde bat izango da Zinealdea. Bestalde, etorkizunean mundu horretan lanean arituko direnak prestatzeko eskola bat ere egongo da bertan. Sarobe arte eszenikoen eskolatik sortutako ideia da eta "Zinemaldea" koordinazio enpresaren eraikinean kokatuko da. Zuzendaritza, gidoilaritza, errealizazioa, telebista posprodukzioa eta kamera operadoretza dira, besteak beste, bertan egin ahal izango direnak, guztiak ikus-entzuteko medioekin lotuta. Zentro honetako ikasleek Zinealdeako enpresetan egingo dituzte praktikak. Enrique Santiagoren esanetan, norbaitek eskola horretako matrikula ordaintzen badu, eta ikasketak behar bezala burutzen baditu, arlo horretan lan egiteko %90eko aukera izango du.
Egitasmoa diseinatzerakoan ez dute inolako eredurik jarraitu. Alde bateko eta besteko ideiak hartu dituzte. Enrique Santiago, Sarobe arte eszenikoetako eskolako zuzendaria eta bere lan taldea alde batetik bestera ibili dira bidaiatzen: Valentziako Hiria proiektua ikusten izan dira, Hollywooden izan dira, telebista kate ezberdinak bisitatu dituzte, zinegileekin elkarrizketak izan dituzte… Oarsoaldea Garapen Agentziakoek esan digutenez, Ingalaterran bada antzeko proiektu bat, baina tamainaz askoz handiagoa. Haien ustez, Zinealdearen ideia industriako beste sektore batzuekin pareka daiteke. Ontzigintzan, kasurako, antzeko proiektu bat dago toki berean ontzigintzaren zerbitzu guztiak biltzen dituena. Egitasmoaren sustatzaileek ikus-entzunezkoa industria esparru berritzailea eta interesgarria dela ikusi dute. Eta horren arabera, poliki-poliki Zinealdea diseinatu dute