SP-RAKO TRANBIA
Unai Elorriaga
ELKAR153 orrialde
1.680 pezeta
67 libera
ZAHARTZAROAK AHITU DUENAZ, NOBELAGILE GAZTEA
Harribitxitzat joa izan da Unai Elorriagaren lehen nobela hau, "SPrako tranbia". Izan ere, maisutasun handia agertu du 28 urteko idazle bizkaitar honek zahartzaroak ahitu duenaren gorputzeko indargetze eta buru eritasunak era hunkigarrian deskribatzerakoan. Lau pertsonaia nagusi ageri dira narrazioan zehar. Lucas, ezina nagusitzen ari zaion adin handiko pertsona; umore eta sentiberatasun aparta agertzen duen bere arreba Maria; etxean sartu zaien gazte gitarra-jolea eta azken honen neska laguna. Halere, bada beste pertsonaia garrantzitsu bat, urte askotxo hilda daramatzan arren kontakizunean zehar beti present dagoena: Rosa, gorputzez makal izateaz gain burua ere nahasten hasia zaion gizonaren emaztea izandakoa. Lucasek une horretan gertatzen ari dena baino askoz hobeto gogoratzen du joandako denbora eta orduko jendea. Iraganeko irudi horiek eta zortzi mila metro inguruko mendien oroitzapenak laguntzen diote igarotzen etxe barruan geldirik pasa behar dituen orduak. Rosa gazte batekin tranbiara igo eta Shisha Pangmaren gailurreraino biak joatea nahi luke zaharrak. Eta ezinezko amets horiek mantentzen laguntzen dio bere arreba Mariak.
BIZKAIA XXI
Jose Ignacio Ruiz de Olabuenaga
BIZKAIKO FORU ALDUNDIA127 orrialde
BIZKAIA, HASI BERRI DUGUN MENDEAREN AURREAN
Bizkaiko Foru Aldundiko Ingurugiro eta Lurralde Ekintza sailak plazaratu berri du "Bizkaia XXI", argazki eder bezain adierazgarriz apaindurik datorren liburua. Jose Ignacio Ruiz de Olabuenagaren ardurapean egon dira bertan ageri diren testuak eta liburua osatzeko beharrezkoa zen guztiaren koordinazioa. XXI. mendearen hasiera honetan, Bizkaiak bizi duen errealitate itxaropentsua ezagutarazi nahi lukete lan honekin. Izan ere, lurralde hori indartsu dago, eta gero eta aukera gehiago eskaintzen dio bertan bizi direnei zein beraiekin etorkizuna partekatu nahi dutenei. Eta horixe islatu nahi du liburu honek, beti ere daukaten ingurumenetik hasita. Bizkaia ezagutu, sentitu, bizi, ukitu, dastatu, usaindu eta entzuteko tentazioa eragin nahi lukete lan honekin, Bizkaiko Diputazioko ahalduna den Josu Bergararen hitzetan.
EUSKAL ZIBILIZAZIOA
(5. EDIZIOA)
Alfontso Martinez Lizarduikoa
GAIAK163 orrialde
1.700 pezeta
68 libera
GURE HERRIAREN SUSTRAIEN BILA
Gaiak argitaletxeak bostgarren aldiz aurkezten digun Alfontso Martinez Lizarduikoaren lan honen izen zehatza "Euskal zibilizazioa (gure herriaren sustraien bila)" da. Euskararen, eta beraz euskaldunen historiaurrea arakatzen jardun du egileak, honako galdera hauei erantzuna eman nahian: Nondik ote datorkigu inguruko hizkuntzez arrunt bestelakoa den euskara? Zein zibilizaziok erabili ote zuen hizkuntza hori existentzia razionalizatzeko tresnatzat? Eta zein gunetaraino egin dezakegu atzera denboran, zentzuzko era zientifikoan, jatorburuen bila? Bada, besteak beste, honakoa ondorioztatu du Alfontso Martinez Lizarduikoak egin duen ikerketarekin: Garai urrun haietan bazela euskal erroak izan zituen kontinente linguistiko eta kulturala Europa osoan, eta baita Afrikako zenbait lekutan ere (Kanariar irlen kasua altxortzat jotzen du).
PLANTEAMENDU LEXIKALA: ELT-REN EGOERA ETA...
Michael Lewis
HABE 335 orrialde
MICHAEL LEWISEN ETORKIZUNERAKO PROPOSAMENA
Ana Isabel Moralesek euskaratua izan da HABEk plazaratzen duen liburu hau, Michael Lewisen "The lexical Approach: The State of ELT and a Way Forward", non aipatu adituak bi gai jorratzen dituen. Laburbilduz, batetik, lexikoaren izaera eta betekizuna, eta bestetik, gaur egungo hizkuntz irakaskuntzan erabilitako ohiko materialen eta metodologia ortodoxoaren ezaugarri askori Michael Lewisek antzematen dizkien hutsune larriak. Euskaraz "Planteamendu lexikala: ELTren egoera eta etorkizunerako proposamenak" izenburua daraman liburua, linguistika aplikatuko ikerketaren elementu ugariez baliatzen da, jakiteko, corpus lexikografiaz, hizketaldiaren analisiaz eta gramatika ingelesean egindako lan berriez. Alabaina, liburua metodologiako lana da lehendabizi, ez linguistika aplikatukoa.
BERO HEZEAK
Batzuen artean
TXALAPARTA229 orrialde
2.000 pezeta
80 libera
IPUIN EROTIKO LITERATUR LEHIAKETAREN UZTA
Basauriko Euskarabila Elkarteak, 1996an hasi eta gaur arte urtero-urtero antolatu du ipuin erotikoen lehiaketa. Bada ekintza horren uzta eskaintzen digu Txalaparta argitaletxeak "Bero hezeak" liburuan: hogeita hiru narrazio, Hilario Mozo Martinezen ilustrazioz apainduak. Narrazio horietatik hamasei sarituak izan dira eta beste zazpiak argitaratzea ondo merezia dutela diote arduradunek. Bilduma osoaren zuzendaria, Juan Martin Elexpuru izan da. Zerrenda luzea da, eta ezin bada aipatu ipuin erotiko hauen guztien egileen izenak. Hori bai, idazle hasiberriak zein ondo ezagunak direnak biltzen dira bertan, bakoitzak bere ikuspegia eskainiz. Izan ere, erotismoak aurpegi asko ditu: pertsonak ezberdinak garenez, nahitaez ezberdinak izan behar gure sexu-joerak, fantasiak, kitzikagaiak eta morboa eragiten diguten egoerak.
ALUSION A UNA SOMBRA
Roberto Botija
ONGARRIA98 orrialde
1.500 pezeta
60 libera
NERBIOI BILBON, ROBERTO BOTIJAREN IRUDIETAN
Roberto Botija argazkilari bilbotarrak bere hiria zeharkatzen duen Nerbioi ibaia hartu du gaitzat "Alusión a una sombra" izenburuarekin plazaratzen den liburu honetan. Javier Salazarrek gazteleraz egindako sarreran adierazten denez (euskarazko eta ingelesezko itzulpenetan ere irakur daiteke berea), Roberto Botijak argazki hauekin egin duena, Bilboko paisaje urbanoa Nerbioi ibaian deszifratu, aztertu eta birplanteatzeko giltza aurkitzea izan da. Lehenago izan zirenarekin jada antzik ere ez duten industria horiek hartu ditu argazkilariak gaitzat, Bilbok jasan duen hondamena, bertan eman ziren gatazken hondakinak, Naturak berea berreskuratuko duela antzematea baino ez dagoen etorkizun zalantzagarri baten aurrerapena... Eta hala ere, Roberto Botijak Bilbori dion maitasuna soma daiteke bere irudiotan.
OSTIELA!
Batzuen artean
PAPERZALEAK KULTUR ELKARTEA50 orrialde
400 pezeta
16 libera
OSTIELA! "JOANDAKO" KULTUR ALDIZKARIEKIN
Euskal kultur aldizkariei eskaintzen die bere omena "Ostiela!" kultur eta literatur hiruhilabetekariak bere azken zenbaki honetan. "Izan direlako gara" lematzat harturik, euskal idazlerik gehienak trebatu ziren "Igela", "Ustela", "Pott", "Oh, Euzkadi", "Xaguxarra", "Txistu y Tamboliñ", "Kandela", "Korrok", "Ttu-ttua", "Txortan", "Porrot", "Literatur Gazeta", "Mazantini", "Garziarena" eta "Zantzoa" haiek dakartza gogora "Ostiela!"k. Horrez gain, badu edukirik ere: Jon Aranok Bernardo Atxaga idazleari egiten dion elkarrizketa mamitsua, kasu; edota, besteak beste, Karlos Perales Zeberiok idatzitako "Rio de Janeiroko beste iñauteriak", non hango prostituzioa, politiko eta polizien ustelkeria eta abar aztertzen dituen; "Komuneko liburutegi" deitu saila; Bukowskyren poema "ineditoak", Txomin Peillenen "Txikitoak"...
