LA CARA OCULTA DEL BOSQUE
A. Arrarás
TXERTOA246 orrialde
2.000 pzta / 80 lib.
BIHOTZ TAUPADA LASTERRA ERAGITEN DUTEN IPUINAK
Antonio Arrarás Arratibelek idatzi ditu "La cara oculta del bosque" liburuan agertzen diren narrazio zirraragarriak. Jatorri nafarreko donostiarra dugu egilea, eta Euskal Herrian kokatu ditu bere kontaketa labur hauek guztiak, Nafarroako mendi eta hutsik utzitako herriska zoragarrietan asko, Donostia eta honen inguruetan beste batzuk. Hala ere, lekuek izan dezaketen edertasuna ahaztera derrigortzen duten gertaera ikaragarriak eta fenomeno harrigarriak jazotzen dira Antonio Arrarás Arratibelen istorioetan, irakurlearen gogoa asaldatu eta haren bihotz taupaden lasterra areagotuz. Duela hilabete batzuk Txertoa argitaletxearen bidez plazaratu zuen "Peña y otros relatos extraños" ipuin bilduman agertzen ziren ipuinetan bezala, "La cara oculta del bosque"ko narrazioetan ere ezustean azalduko zaizkie herioaren hatzaparrak, berdin lasai eta patxada onean harat-honat dabilen hiritarrari, gailurrera igo eta inguruaren zoragarria gozatzen ari den mendizaleari, lagunartean tabernaz taberna basoerdiak hartzen dabiltzanei, edota haurra etxean lo utzi eta une batez kanpora ateratzen direnei. Istorio asaldagarriak dira, benetan, Antonio Arrarás Arratibelen hauek.
BISEAN BIS BERBETAN
Batzuen artean
ARABERA79 orrialde
1.000 pezeta
40 libera
"GASTEIZERA" PLATAFORMAREN IDAZLAN LEHIAKETA
Presoei elkartasuna adierazteko bide berriak irekitzen saiatzen da "Gasteizera" Plataforma. 2001eko martxoan, "Bisean bis berbetan" literatur lehiaketa antolatu zuen, preso daudenen sentimenduei eta haiek bizi behar izaten duten egoerari bizkar ematen ez dioten pertsonen bihotzetan gorderik dauden irrika, atsekabe zein itxaropenei hitza ematea helburu. Erantzun ona izan zuen asmo honek, berrogeitik gora idazlan jaso ahal izan baitzituzten "Gasteizera"koek, hau da, Gasteizko presoen eskubideen defentsan lanean ari diren herri talde eta erakundeek. Eta hain zuzen ere, Arabera argitaletxearen eskutik kaleratutako "Bisean bis berbetan. Palabras para un vis a vis" liburuan daude bildurik, lan horietatik epaimahaikoek aukeratu zituzten ipuin, narrazio labur eta poemak.
INDIA HARRIGARRIA
Gotzon Garate
ELKAR227 orrialde
2.200 pezeta
88 libera
GOTZON GARATEK ATZEMAN AHAL IZAN ZUEN INDIA
Indian zeruaren ederra eta infernuaren latza elkarturik aurkituko dituzu". Hala dio Gotzon Garatek "India harrigarria"n, Elkar argitaletxearen bidez kaleratu duen azken liburuan. Hindi hizkuntza indoeuroparra ikasteko asmoz joan zen Gotzon Garate Indiara. Eta han egin zituen bi egonaldietan, Indiako gizartea aztertzen saiatu zen. Jakina, bertako hainbat bazter eta makina bat jende ezagutu zuen, hezur-haragizko gizon-emakumeak, eta horien guztien poz eta atsekabeekin, ohitura eta gorabeherekin osaturik dago bere liburu hau. Ikus ahal izan zituen egoerak, bere bertako lagunek emandako argitasunak jaso ditu Gotzon Garatek "India harrigarria"n, non batik bat Indiako alderdi arrotzak, bakanak eta bitxiak bakarrik biltzen saiatu den, lurralde sakratu eta misteriotsu hark duen alderdi argia pixka bat bazterrean utziz.
SUTRA LIBURUA
Sutrek
EUSKAL ZEN 49 orrialde
500 pezeta
20 libera
BUDHAREN IRAKASBIDEA EUSKARAZ
Xabier Mendiguren Bereziartuk euskaratu du "Sutra Liburua", hau da, sutrek pali eta sanskritoz jaso zituzten Budharen irakaspenak. Geroztik makina bat hizkuntzetara itzuliak izan dira: Chan eskolakoek txinerara itzuli zituzten; Zen eskolakoek, berriz, japonierara. Eta Euskal Zen Elkargoak plazaratu berri duen liburu honen mamia, ingelesezko eta alemanierazko itzulpen baimenduetan oinarritu da. Sutra eta dhanari-errezitazioa goizaldean egiten da, jaiki bezain laster, eta gero, arratsaldean berriz, eta gauean lotara joan aurretik. Errezitazioa diafragmatik burutzen da, tonu ahal bezain apalean. Gorputz eta gogamen osoz, nork bere burua soinu gisa agertzen du. Jarduera horretarako beharrezko da zazen jarreran esertzea, lurzoruan edo aulki garai batean, sutra-liburua begien parean dela, bizkarrezurra zuzen edukiz.
HIZPIDE
Batzuen artean
HABE196 orrialde
1.550 pezeta
62 libera
HABEREN ALDIZKARIA KALEAN
Batik bat helduen euskalduntze-alfabetatze lanetan ari diren irakasleei zuzendua dagoen lau hilabetekaria dugu "Hizpide". Bere azkenengo zenbakian, besteak beste, honako gai hauek ukitzen dituzte: Lan-munduaren euskalduntze-alfabetatzea, Euskararen erabilera-planak, Hizkuntza prozesuen ingeniaritza, Hizkuntz heziketa erakunde eta enpresetan, "Catalá a mida", lanpostuen hizkuntz eskakizunetan oinarritutako heziketa-proiektua; Euskalduntze eta alfabetatze curriculuma irakasleen beharretara egokitua, HAEEren hizkuntza prestakuntza: administrazioko euskara zabaldu eta gaurkotzeko ikastaroak; "Nire bulegoan" profesionalentzako lan programa, Haur hezkuntzako haurren guraso erdaldunentzako murgiltze programak eta Xede Berezitarako Hizkuntzaren kontzeptua eta horren inplikazioak hezkuntzan.
EUSKAL HERRIKO BALIABIDE PEDAGOGIKOEN III. GIDA
hik hasi
XANGORIN167 orrialde
600 pezeta
26 libera
HAMAIKA PROPOSAMEN, GIDA BAKARREAN
Hona hemen Euskal Herriko baliabide pedagogikoen bilduma eskaintzen duen gida. Duela lau urte martxan jarri zen egitasmoa dugu, talde eragileari zenbait irakaslek eginiko iradokizunetatik sortua. Geroztik bi gida plazaratu zituzten. Orain kaleratutako hirugarren honek aurreko biak dauzka oinarri, baina osatuagoa eta gaurkotuagoa dago. Irakaskuntza lanerako interesgarri eta baliagarri izan daitezkeelakoan, Euskal Herrian zehar jadanik martxan dauden hamaika ekintza eta proposamen jaso dute bertan. Zazpi ataletan banaturik dago gida: Historia eta artea, zientzia eta ingurugiroa, kirolak, nekazal prozesuak eta aterpetxeak, zerbitzuak, irakaskuntzako erakundeak, eta ikasmaterialak. Gainera, gida honen erabilerari ahalik eta etekin handiena ateratzeko era ere eskaintzen dute.
KOFI ITSASORA BIDEAN
Javier Cillero
Goiriastuena
AIZKORRI43 orrialde
695 pezeta
27 libera
MUTIKO AFRIKAR BATEN AMETS ARRISKUTSUA
Kofi, itsasoa zeharkatzearekin amesten duen mutiko afrikarra da Javier Cillero Goiriastuenak idatzi eta Aizkorri argitaletxeak zortzi urtetik aurrerako irakurleei eskaintzen dien narrazio honen protagonista. Afrikako hiri handi batean bizi da. Itsasoa ez du inoiz ikusi, eta hura ezagutzeko amorratzen dago, batik bat Europako itsasaldean bizi diren lehengusu batzuk bisitan etorri zitzaizkienetik. Arrantzaleak izaki haiek, geroztik berak ere arrantzan ikasi nahi du, eta lehengusu horiek bizi diren lekua ezagutu. Horrela bada, bere hiriko azokara sardinak ekartzera datorren kamioi baten atzealdean ezkutatu eta itsasorantz abiatzen da. Eta bere helburua kamustu eta azkenean etxera itzuli behar badu ere, asko ikasiko du Kofik bere bidaia horretan: Europan gauza asko izan arren, ez direla horregatik zoriontsuak, kasu.
