Egunotan, alegera eta pozik egoteko arrazoirik badute basauriarrek, euskara hutsezko "El Social" herri aldizkariaren bosgarren alea kaleratu baita.
Herri aldizkari honen ibilbidea heldua baizen gorabeheratsua izanik ere, tinko iraun izan du lehen urratsa eman zuenetik, nahiz eta ordurik hona zenbait alorretan aldaketak izan dituen: hizkuntza, kasu. Hastapen urratsak herriko hiruzpalau kazetaritza ikaslek eman zituzten, Basauri herriko informazioa ardatz harturik, hedabide idatzietan landu barik lotzen zen informazioa herritarrei helarazteko gogoak eta ikasketak bukatu osteko euren lanbidearekiko egoerak nahiz irrikak bultzaturik. Berba bitan, prestakuntza zein lan beharrei eta behar sozialari erantzun gurak eraginda ipini zen abian "El Social". Urteek aurrera egin duten heinean, informazio lokala ere nagusi da, eta molde honetako aldizkariek ohiko duten egiturari eutsi zaio: herriko gazte eta nerabeek aldizkarirako beren beregi idatziriko albisteak, herriari buruzko berriak, kirola, kultura, iritzia, agenda, azken azala eta azala (azken biak eta erdiko orria koloretan argitaratzen dituzte). Aldizkaria, bestalde, dohain partitzen da eta hilero bost mila ale plazaratzen dituzte, inoiz ale kopurua gaurkoarekin alderatuz gero, urriagoa izan den arren.
Hizkuntzarena izan da, zalantza apurrik gabe, aldizkariak jasan duen aldaketarik nabariena, duela bost urtera arte gaztelera hutsean idazten baitzen aldizkaria, baina 1996. urterik aitzina euskaraz izkiriatutako "Berbaz" gehigarria argitaratzen hasi ziren aldizkariarekin batera. Hala ere, gehigarria hiru urtez kaleratu zen, garai hartan Basauri herrian euskaraz idatziriko "Bost Axola" aldizkaria -urte gutxiren buruan tamalez desagertu zena- plazaratzen hasi baitzen. Urteek aitzina egin dute eta "El Social" aldizkariko arduradunak euskara hutsezko herri aldizkaria kaleratzen hasi ziren iragan urteko abenduarekin batera, gaztelaniazko herri aldizkarien errealitatea zein "Bost Axola" aldizkaria eta "Berbaz" gehigarriak izaniko abantaila eta aferak aztertu eta kontuan hartu ostean. "Orain dela bost urte ezinezko ikusten zen eman dugun pausoa ematea, asmoa bidea egitea zen eta 'Berbaz' gehigarriarekin hasi ginen, nahiz eta bidean gelditu. Baina, azkenean lortu dugu euskara hutsezko aldizkaria", adierazi digu aldizkariko arduradun den Asier Lejarzak. Ordu arteko lan metodologia, zenbait alorretan bederen, aldatu behar izan dute; hartara, orain arteko kolaboratzaileek gaztelaniaz idazten bazuten, egun euskaraz egiten dute, hizkuntzaren ezagutza ez delarik gaurdaino oztopo izan, erredakzioan argi baitute euskara denon hizkuntza dela eta euskaldun ez direnak ere euskararen aldeko lanera ekarri behar direla. Haatik, horrelakorik suertatzen denean gogotsu itzultzen dute gaztelaniazko artikulua euskarara.
Bestenaz, egoitza eta baliabide teknikoek ere, hamalau urteren buruan, aldaketa asko izan dituzte, denak aldizkariaren onerako ziurrenera. Egitasmoari lotu zitzaizkionean egoitza kultur etxean zuten, eta harrezkero, harat-honat ibili dira lokalez lokal iragan urte bukaera arte; urri inguruan, apur gorabehera, Basauri erdialdeko lokal bat alokatu, atondu eta egoitza berria bertan ireki baitzuten. Egoitzak bezalatsu, maketazio lanak ere, goitik behera berritu dira; izan ere, hasierako urteetan maketazio eta inpresio lanetarako egunak behar ziren, baina gaur, informatika nagusitu den honetan, burutu beharreko lanak arin baten egiten dituzte.

"El Social" aldizkariaren erronka handia izan da, inongo dirulaguntzarik gabe nekez egin daitekeena. Gainera, euskaraz idazten hasi zirenetik arteragoko iragarle zenbait galdu dituzte, baina berriak hurreratu zaizkie. Horrela bada, udaletik eta aldunditik jasotzen dituzten laguntzak biziki garrantzitsuak izateaz gainera, aurrera begirako erronkei erantzuteko Eusko Jaurlaritzaren laguntza ere eskatzekotan dira. Izatez, horrelako aldizkari bat eusteko, publizitatea ez eze, diru laguntzek ere berebiziko garrantzia dute. Oraintsu, harpidetza kanpaina abian ipini dute, eta jendea animatuta dagoela jakinarazi digute. Aurrera begira, berriz, arlo askotan lan egiteko gogoa dute; hala nola, herrietako euskara aldizkariekin duten harremana estutu, aldizkaria eta harpidetza sendotu, eta aldizkariaren itxura berritu.