Nafarroan egina, hedabide eta tresna, bertze deusen gainetik euskaldunon topagunea izan nahi duen "Nabarra" aldizkaria ez da euskararen inguruko hilabetekaria izanen, honelako gaiak baztertuko ez badira ere, euskaraz bizi nahi dutenendako bertze baliabide bat baizik.
Hilero 52 orrialdeetan mota guzietako gai sozialak eta euskal kultura izanen ditu solasgai nagusi. Izenak berak dioenez, eta bertako euskaldunen interesgune eta zaletasunek kolore anitz hartzen duenez, horren ispilu izan nahi du, iritzi, albiste, eztabaidagai eta jakingarri guziak biltzearekin baterat. Izan ere, literatura, hedabideak, komikiak, iritzia, elkarrizketak, musika, internet, zinema, osasuna, bertsolaritza, mendia, umorea, soziolinguistika, erreportajeak, historia, nafar biografiak, agenda eta bertzek osatuko du kolore anitzeko aldizkaria, hasiera-hasieratik edukin politikoa baztertzea erabaki duena.
Koordinatzaile gisa ari den Gontzal Agote kazetariak azaldu digunez, Iruñeko Txantrea auzoko "Txantrean Auzolan" nahiz Alde Zaharreko "Aldapa" hilabetekari elebidunak plazaratu eta sendotu ondoren, horien gibelean den lagun taldeak Nafarroa mailan argitalpen euskalduna mahaigaineratzeko beharra atzeman zuen, Iruñerria baino haratago joko zuena. Honela, "Nabarreria" elkarteak Nafarroa Beherea ere hartu du berezko eremutzat, Bidaxune eta Kortes arteko euskaldun oro, mendialdekoak zein Erriberakoak, altxor kutxa berean sartuz. Beraz, Nafarroako lurraldetasuna bere osotasunean jaso dute, nortasuna aldarrikatuz, eta horregatik gaiak atalka landuko dira, ez eskualdeka, herrialdearen trinkotasuna indartzeko asmoz.
Asmo enpresarialik gabeko bi auzo aldizkariekin gertatzen den bezala, batzorde kultural batek kudeatuko du balizko hutsune komunikatiboa betetzeko jaio den "Nabarra". Ildo beretik, arduradunak hainbat talde euskaltzalerekin ere harremanetan jarri dira, esperientzia aberasteko. Aitortu digutenez, laguntzaile kopurua ere egunez egun hazten ari da, lasterketaren lehen urratsak ematen ari direlarik.
Apirilaren bian errealitate bilakatu zen proiektua, Korrikarekin baterat, alegia. Orduan 15.000 ale banatu ziren. Aldizkarian honelako gaiak irakurri ahal izanen dira: Juan Cruz Lakasta nahiz Gaizka Arangurenen iritzia, Erriberako Bardeei buruzko erreportajea, Eratsungo Julian Retegiri elkarrizketa, Aingeru Epaltzaren literatura tartea, Erlantz Urtasunen XIX. mendeko Iruñeko egunkari foruzale eta euskaltzaleen berri, Jose Joakin Arazuri iruinsemearen biografia, Jon Abrilen bertsolaritza saila edota Patxi Uharte zein Jokin Larrearen komikiak. Horrezaz landa, jite handikoak diren baina goitizenaz janztea nahiago izan duten partaideak ere hor izanen direla ziurtatu digu Agotek, txukun gelditzen ari den erredakzioan telefono deien hotsa baretu ezinean.
Iruñeko Alde Zaharrean egoitza duen aldizkariak, Nafarroako euskaldungoa nahikoa sakabanaturik dagoela kobentziturik, proiektu berritzailea, diseinu erakargarria eta testu arintasunaren bidetik gazteengana heltzea du xede, baita ARGIA edota "Euskaldunon Egunkaria" moduko komunikabide nazionalak iristen ez diren hurbileko irakurle potentzialarengana ere. Eta ez bakarrik Nafarroan, bertze herrialdeetan harpidedunak baititu jadanik.
Harpidedun sarea aldizkariaren oinarria izanen da. Urtebeteko harpidetza (12 ale) 5.000 pezeta kostako da. Bertzalde, ez dute diru laguntzen menpe bizi nahi, onartuko dituzten arren. Hortaz, autofinanziazioa helburu dute. Bertze euskal herrialdeetako zenbait liburudendetan ere salgai izanen dela jakinarazi zaigu, 500 pezetan.
Hemendik gutirat orrialde gehiago izan nahian, sortu aurretik jauzi handiagoak emateko borondate tinkoa, txirrinta izan duten sortzaileek adierazi dutenez, "apustu handia da aitzinean duguna, ez baita aldizkari sortze hutsa, baizik eta merezi duen kalitate mailari eustea. Hori gure eskuetan izanen da eta auzolanean egin beharko dugu egunez egun. Hilabetekaria jaio eta kultur eragile bihurtu. Erronka botata dago eta orain guzion artean eutsi behar diogu hordagoari. Nafarroan, euskaldunok, barra-barra" .