Eusko Jaurlaritzak eta, zehazki, bere Industria Sailak, ekimen pribatuarekiko lankidetzak babesten ditu, eta horien artean sartzen dira aurreko orrietan aipatu diren energiaren esparruko proiektu elektrikoak, hau da, Bizkaiko Badia, Petronorren IGCC planta eta ziklo konbinatuko Santurtziko zentrala. Halaber, Irlandako ESB enpresa publikoak 2001. urterako Zornotzan eraiki nahi duen ziklo konbinatuko planta elektrikoaren ahalegina ere bultzatuko du.
Eusko Jaurlaritzak oso garbi du proiektu horiek bultzatzeko asmoa, eta, Iberdrolak Bizkaiko Badia Gasa eta Bizkaiko Badia Elektrizitatea proiektuak utziko balitu ere, dagokien ekimen pribatuei bere laguntza eta babesa eskaintzen jarraituko luke. Horrela, Endesak eta Iberdrolak bat egiteko asmoa iragarri ondoren, Iberdrola proiektu horietatik atera zitekeela jakin zenean, Industria sailburu Josu Jon Imazek garbi adierazi zuen gorabeherak gorabehera, proiektu horiek aurrera egingo dutela. Nolanahi ere, Imazek argitu zuenez, Eusko Jaurlaritzak Bizkaiko Aldundiarekin eta Endesa-Iberdrolarekin harreman estu eta zuzenean jarraituko du proiektu hauen inguruko lanetan, talde honen jardueren garapenak "Euskadin finkatutako ahalik eta negozio eta jarduera gehienak" ahalbidetu ditzan.
Jakina denez, Iberdrolak %25eko partaidetza du Bizkaiko Badia Gasa eta Bizkaia Badia Elektrizitatea bi konpainia hauen kapitalean. Era berean, euskal enpresa elektriko honek, Petronorrekin batera, bakoitzak %50 jarriz, Piemsa enpresa eratu zuen 1998. urtean, IGCC izenez ezagutzen den plantaren bideragarritasuna eta industri proiektua aztertzeko.

Aipatu diren proiektu horiei Eusko Jaurlaritzak eskaintzen dien laguntzaren helburu nagusia, Industria sailburuak adierazitakoaren ildotik, EAEk dituen energi premien %82 hemen bertan ekoiztea lortzea da. Horretarako, gaur egun erabiltzen den bertako eta kanpoko ekoizpen kopurua irauli egin beharko litzateke, sei urteko epean. Beti gerta ohi zaigunez, oraingo honetan ere ezin dugu Euskal Herria bere osotasunean hartuz aztertu, zeren Nafarroa eta Iparraldea EAEko gobernuaz kanpoko beste erakunde batzuen menpe baitaude.
Eusko Jaurlaritzak 415.000 milioi pezetako (16.600 milioi libera) kopurua aurreikusten du 3E-2005 Plana berraztertu ondorengo energiaren garapenerako helburuak lortzeko behar diren inbertsioetan. Inbertsio horren zati nagusia energia elektrikoaren esparrurako xedatuko litzateke, 166.000 milioi pezetatik (6.640 milioi libera) gorako inbertsioak beharko baititu.
EAEko energia esparruaren egoerari dagokionez, 1999ko eta aurreko urteetako datu ofizialak ditugu soilik, 2000ko datuak urte honetan emango baitituzte. EAEko energia eskaera 6.067 Ktep.koa izan zen 1999an (tep bat petrolio tona bat da), beraz, 1998an baino %7 gehiago. Eskaeran sartzen diren energia mota ezberdinen artean, erregai solidoen gorakada da nabarmenena, iaz %95an igo baitziren. Gehikuntza horren funtsezko arrazoia Pasaiako zentral termikoaren jarduera handian aurkituko genuke, %246an igo baitu aurreko urteko jarduera eskaera.
Bestalde, petrolioaren deribatuek %5 egin zuten gora, eta gas naturalak %12. Energia elektrikoarena, berriz, kasu berezia da eskaeraren ikuspegitik. Emaitzek, bere horretan, hotz-hotzean, %13ko murrizpena adierazten dute; baina, benetako premia elektrikoa, hau da, azken kontsumitzaileek duten premia, eskaera baino askoz handiagoa da. Horrela nabarmentzen du Energiaren Euskal Erakundearen 1999ko Memoriak. Energiaren ekoizpenak, 1999an zehar, 1998ko bidetik jarraitu zuen, 300 ktep-eko igoera txikia izan zuen.
Benetako egoera hori izanik ere, 1999an zehar energiaren sektorearen jarduerak %2 egin du behera EAEn. Fintzearen azpisektoreak, eraldatutako energiari dagokionez EAEko garrantzitsuenak, %5eko jaitsiera izan zuen bere jardueran. Elektrizitatea sortzeko esparruan erregai solidoen eta gas naturalaren erabilera nabarmendu zen 1999an, %135 eta %14 igoz, hurrenez hurren. EAEn 1999an egin zen energia erabilera, guztira, 4.353 ktep-koa izan zen, hots, 1998an baino %4 gehiago, eta bertan amaierako jarduerako sektore guztiak sartu dira.
Azkenik, ezin da ahaztu energia berriztagarriek EAEn hartu duten garrantzi aipagarria. Eusko Jaurlaritzak lehentasunik handieneko helburu gisa bultzatu eta garatu nahi izan ditu. Energia berriztagarrien ekoizpenak nabarmen egin du gora 1990etik aurrera, nahiz eta 1999an ez zen 1998koa gainditu. Beraz, guztiaren %4an jarraitzen du, 228 ktep-ko azken eskaera bereganatuz. Horietako 28 energia hidroelektrikoari dagozkio eta euskal lurraldeetan sakabanatutako 100 zentral txikien artean ekoizten dira.