Urriaren 28tik azaroaren 5era pilotako beste munduko txapelketa bat izango dugu jokoan, 36 metroko ezker pareteko pilotalekuan jokatuko den 22 urtez azpikoentzako 5. Munduko Txapelketa, alegia. Bertan, azken orduko hutsegiterik ez badago, zortzi selekziok hartuko dute parte: Argentina, Uruguay, Estatu Batuak, Venezuela, Kuba, Espainia, Frantzia eta Mexiko. Azken lauak modalitate guztietan lehiatuko dira.
Dena den, Nazioarteko Federakuntzatik jakinarazi digutenez, baliteke azken orduko bajarik izatea: "kubarrak, adibidez, nahiz eta beren gastu guztiak gure kontura joan, barne arazoak direla-eta ez dira azkeneko Trinketeko Txapelketara agertu, eta Argentinan, krisi ekonomikoa pairatzen ari dira eta agian pilotariren bat ez da joango, lana galtzeko beldur, ez bailitzateke lehenengo aldia izango".
Hala ere, txapelketa hau berezia bihurtzen duena ez da titulua lortzeko lehia korapilatsua, izango diren edo ez diren selekzioen izenak, edota (beste behin) euskal selekzioak ez duela bere agerpena egiterik izango; taldeak eta pilotariak lehiatuko diren egoitzaren kokapena baizik. Izan ere, 2000ko txapelketa honen antolatzaileak, Frantziako Federakuntzak, ohiko egoitzaren bat aukeratu beharrean, Ipar Euskal Herria ala Paris bera kasu, hegoaldeko itsasoetara begira jarri eta Madagaskarreko ingururaino egin du ihes, Reunion uharteraino zehatz-mehatz.
Uharte hau, ia Kaprikornioko Tropikoan dago eta Frantziako Estatuko pilotaren munduan pixkanaka-pixkanaka indarra hartzen ari da. Nahiz eta pilotak bertan 31 urteko bizitza besterik ez izan jadanik zenbait txapelketa antolatu, hainbat lehiaketa irabazi eta munduko txapelketetan zilarrezko bi domina lortu ditu bere pilotariei esker.


Pilota paraje hauetara abade baten eskutik iritsi zen, Dattas abadearen eskutik hain zuzen, bere ekimenez eraiki baitzen irlako lehen pilotalekua, 1969an St. Denis-en. Hortik aurrera, bertako pilotaren garapena berehalakoa izan zen, bertako jokalarien bitartez zein metropolitik zetozenen bidez.
Bigarren frontoia, 36 metroko estalia, ez zen 1985. urtera arte eraiki baina, hori bai, handitasun osoarekin inauguratu zen. Bertaratuen artean, besteak beste, Alain Calmat Frantziako Kirol Ministroa eta Frantziako Batzorde Olinpikoaren lehendakaria zen Nelson Paillou izan ziren. Pilota uhartean bultzada polita jasotzen ari zen eta horrenbestez, bost urtetan beste bi pilotaleku eraikiko ziren, biak 36 metrokoak eta leku ezberdinetan, bata St. Leu-n eta bestea, Cilaos-en.



Munduko Txapelketa honi begira-edo, Dattas-ek inauguratutako lehenbiziko frontoia nazioarteko arauak betetzen dituen ezker pareteko 30 metroko frontoi bihurtu dute, eta mendebaldeko kostaldean trinkete bat eraikitzeko ekimena aurrera doa. Beraz, badirudi pilotak Ozeano Indikoko uhartean etorkizun polita duela. Hainbeste pilotaleku betetzeko pilotariak behar dira, eta arlo honetan ere zenbakiak gero eta borobilagoak dira Reunion-en: bost klub, 450 lizentzia, maila altuko 23 jokalari... Gero eta pilotari gehiago jokatzeko irrikaz da eta gogo hori uhartera hainbat txapel eta poz ekartzen hasi da. Frantziako 18 titulu lortu dituzte (maila ezberdinetan), bertako selekzioarekin 12 jokalarik hartu du parte eta Munduko Txapelketetan zilarrezko bi domina lortu dituzte.
Txapelketa honetan, euren ikusleen aurrean jokatzen dutela kontuan harturik (St. Denis-eko Ibarnegarai frontoian larruzko paleta eta pala motzean, eta St. Leu-ko udal pilotalekuan eskuz) antolatzaileek domina horiei besteren bat gehitzea espero izango dute, horrela pilotak paraje exotiko honetan izan duen garapenari beste bultzada garrantzitsu bat emanez.



Zortzi herrialdeetako jokalariak elkartu ko direla aipatu dugu. Segidan pilota egarria Reunionen zabaldu duen estatuaren, Frantziako selekzioaren, ekipoa zehaztuko dugu. Entrenatzaileak Armand Jaunarena (eskuz), J. Pierre Mitxelena (larruzko paleta), François Susbielles (pala motza), J. Claude Borja (xistera joko garbia) izango dira. Pilotariak berriz, eskuz Hervé Donelbeltxe, Alexandre Dubarry, Pascal Ezkurra, David Olaizola, Thierry Harismendi eta Xabi Poueyts arituko dira. Larruzko paletan Christophe Elizondo, Luciano Mahabo, David Basterot eta François Apte-ek osatzen dute taldea. Pala motzean Jerôme Bats, Hervé Belestin, Stéphane Harbustan eta Julien Vigeon arituko dira eta xistera joko garbian Fréderic Karrikaburu, Laurent Albistur, Joël Sistiague eta Olivier Laberdeske