Udazken honetarako Euskal Telebistaren bigarren kateak bi lehiaketa berri pantailaratuko ditu, "El Juego del Gran Parchis" batetik eta "Numeros Rojos" bestetik.
Bietan ere lehiakideen asmoa ahalik eta diru gehien irabaztea izango da, baina bada biak zeharo desberdintzen dituen ezaugarri bat, hots, Partxisaren jokoan diru hori poltsikoratuko dutenek nahi dutenerako erabili ahal izango dutela, baina zenbaki gorrien kasuan irabazitako sosak lehiakideek aurretik duten -eta demostratu beharko duten- zor bati aurre egiteko erabili beharko dituztela.
Partxisaren Joko Handiak, bere izenak argi eta garbi uzten duen moduan, partxisaren jolas ezagunean du oinarri, FORTAk edo Estatuko Telebista Autonomikoen Federakuntzak telebistarako egokitu duena. Izan ere, saio hau, Euskal Telebistan ez ezik, Estatuko gainontzeko kateetan ere aireratuko da. Horrenbestez, lehiakideak ere hainbat autonomiatakoak izango dira nahiz eta astero-astero Euskal Autonomia Erkidegoko lagunen batentzako lekua utziko duten. Partehartzaileak Goyo Gonzalez aurkezlearen gidaritzapean eta astelehen eta ostiral bitartean ordu erdi lehiatuko dira.
Lehiakideok ezagupen, estrategia eta, noski, zortea ondo baino hobeto nahastu beharko dituzte aurrera egin nahi badute, helmugara iristeko dadoak ematen dizkien zenbakiekin zortea izateaz gain hainbat galdera zuzen erantzun beharko baitute, aurkezleak esango dizkien lau erantzun posibleen artean.
Partxis berezi honek 28 atal izango ditu, horietatik lau ziurrak izango dira, hau da, ezin izango dira bertan dauden fitxak jan (edozein partxisetan bezala helburuetako bat beste partehartzaileen fitxak jatea da), eta lehiakide bakoitzak kolore bat ordezkatu eta bi fitxa izango ditu, aurkezleari zentruko lekua eta dadoa botatzeko ardura utziko dizkiotela.
Galderei dagokienez, erantzun posibleak aurkezterakoan (baliteke bat ere ez izatea zuzena) pulsadoreari azkarren emango dion lehiakideak izango du erantzuteko aukera, asmatzen badu berak aukeraturiko fitxaz aurrera egin eta dirua irabazteko parada izanez. Kale eginez gero, berriz, errebotea izango da.
Fitxak jan ezkero, aldiz, saria sei leku aurrera egin eta dirua izango da, baina norberaren fitxaren bat jana izan bada zigorra ere ez da makala, lekuaz gain ordura arte irabazitako diru guztia galduko delako.
Azkenik, egun bakoitzeko finalera bi partehartzaile helduko dira eta irabazleak hurrengo saioan parte hartzeko parada izango du.
Beraz, dirua irabazi nahi, partxisa gustukoa izan eta gainera kultura orokor pixka bat kontrolatuz gero hona hemen arduradunekin kontaktuan jartzeko telefonoa: 906 42 45 85.
Bestalde, ETB-2k udazken honetarako bestelako lehiaketa bat ere eskainiko digu, baina, lehenago komentatu dugun bezala, honen berezitasuna bere izenak ere aurreratzen duen ezaugarri batean datza: zor bat izan eta irabazitako dirua zor hori ordaintzeko erabiltzea.
Izan ere, "Numeros Rojos"en parte hartzeko Euskal Herrian bizitzeaz gain bat eta hiru milioi arteko zor bat izatea demostratu beharko da.
Horren ostean, lau lehiakideek hainbat kanporaketa gainditu beharko dituzte, azkenean bakarra geratu arte. Kanporaketa bakoitzean lehiakideak puntuak batzen joango dira eta puntu gutxien lortzen duenak saioa utzi beharko du. Azkenik, finalera heltzen dena milioi erdi gehiago lortzeraino ala bere zorra erabat estaltzeraino hel daiteke. Ez bada helmuga horretara iristen hurrengo saioan itzultzeko aukera ere eskainiko zaio.
Lehiaketa honetan ikuslegoaren partehartzea ere ezinbestekoa izango da, dirua irabazteko parada izango baitu. Horrela, hasi baino lehen ikusleek partehartzaile baten alde apustu egingo dute, eta aukeratutako lehiakidea finalera helduz gero froga bat berarekin batera egin eta irabazitako dirua banatu ahal izango dute.
Saioaren aurkezlea Patricia Gaztañaga bizkaitar kazetari ospetsua izango da, baina ardura hau hartzearren ez du katea berean daraman "Esta es mi gente" programa utziko, azken honen kontsolidazioa aprobetxatu eta biak batera aurkeztearen apustua egin duelako.
Lehenago aipatu dugun bezala, "Numeros Rojos"en lehiakideek hainbat kanporaketa eta froga gainditu beharko dituzte, eta horietako batek, adibidez, partehartzaileen kantatu eta marrazteko gaitasuna agerian jarriko du. "Tarari que te vi" frogan partehartzaileak hitzik gabe kantatu beharko du, eta bere taldeko batek abestia asmatu beharko du. Ahotsa distortsionatuta zailagoa izango da asmatzea. "Garabatos"en lehiakideak bi minututan 20 kontzeptu marraztu eta kideek asmatu egin beharko dituzte.
Badago, dena den, froga gehiago ere, hala nola, "Las Categorias" non parte hartzen duenak alfabetoko letra bat duen txartel bat aukeratu eta minutu batean sei kategoria ezberdineko galderei erantzun beharko baitie. Baita ere, "No me cuelgues por favor" izeneko frogan komunikatzaile ona izatea frogatu beharko da, solaskide ezezagun batekin ahalik eta denbora gehien hitzegiten saiatu beharko direlako, gehienez minutu eta erdi izango dutela.
Azkenik, "Los enigmas"en gakoa zera da: hainbat leku, pertsona animalia eta abarren argazkiak dauden harbel bati bizkarra erakutsirik partehartzaileak hiru enigma asmatu beharko ditu, bost laguntzailek egingo dizkioten keinuekin eta baita galdera-erantzunekin lagundurik.
Horrenbestez, udazken honetan lehiaketazaleek badute zer ikusirik eta, baita, zer jokaturik ere, programetan beraietan parte hartuz, ikuslegoaren zati bihurtuz, ala, zergatik ez, etxean partxisa lurpetik atera edota bakoitzaren zorrei errepaso emanez