Sohütako Eperra ikastola eraikitze lanetan zela, Irkus Robles Arangizek ikastolari laguntzeko beharra ikusi zuen. Bere inguruan, Bilbon, hasi zen lanean. Haurra zelarik, 1937an, familiarekin Beskoitzera bizitzera joan zenetik harreman estua izan du Roblesek Iparraldearekin eta bertako kultur munduarekin. Bada, ikastola horren inguruko kezka Bilbora ekarri, lagun taldea bildu, Bizkaiko Manexak izena asmatu, kamisetaren bat saldu eta Kafe Antzokian jaialdia antolatu zuten duela hiru bat urte Zuberoako ikastolaren alde dirua bildu asmoz.
Elkartea eta bere proiektua, hala ere, iazko Bilboko jaietatik aurrera hasi zen gorpuzten. Irkus Robles izan zen iazko pregoilari eta Bilboko kultur giroa gertutik ezagutzeko parada izan zuen orduan, euskal kulturari zein toki txikia uzten zitzaion ikusteko parada. Jai Batzordeko eta bestelako kultur elkartetako hainbat kide bildu zen orduan gaiaren inguruan. Bilboren irudia mundu guztira zabaltzen ari zela ikusi zuten; irudi kosmopolita eta modernoa, baina herri kulturari eta hizkuntzari lotua ez zegoena. Irudi horretan elementuok txertatzeko lehen pausoa izango da aste honetako Bizkaiko Udaberriko Euskal Jaia.
XX. mende hasierako tradizioak berreskuratzea erabaki zuten horretarako: lore jokoak, euskal jaiak... Eta lau egunetan zehar dantza, musika, bertsoa eta kirola uztartzen dituen programa eramango dute aurrera. Datozen urteetan jaialdi hau maiatzaren bigarren hamabostaldian burutzea da asmoa. Aurten, ordea, zertxobait atzeratzea erabaki dute data horietan dagoeneko ekitaldi mordoa izan delako (Dantzari Eguna, Ibilaldia...). Lehen jaialdi hau Bilbon egingo da, baina aurrerantzean euren ekintzak Bizkaia osoan zabaltzea dute xede. Bilbo aukeratu izanaren arrazoiak azaldu dizkigu Patxi Gaztelumendi elkarteko komunikazio arduradunak: "Kanpora esportatzen dugun itsasuntzia da Bilbo, horregatik Bilbo euskal kulturaz hornitu behar dugu". Kontuan izan dute gainera Bilboren 700. urteurrena ari dela ospatzen aurten eta ospakizun horietan euskal kulturak apenas duela presentziarik.

Udaberriko Jaien proposamenarekin hainbat ate jo du elkarte berriak. Eta harrera ona izan dutela esan digute, euren kezka beste tokietan ere bazela. Bizkaiko Foru Aldundiko Kultura Sailetik dirulaguntza jaso du jaialdiaren antolaketak eta finantza entitateetan ere erantzun ona jaso dute: BBKk eta Euskadiko Kutxak euren laguntza eskaini dute. Jaietako ekitaldietan sarrera kobratuko da, gainera, eta horrek ere lagunduko du finantzaketan.
Kafe Antzokiak, Arriaga Antzokiak eta Guggenheim Museoak erakutsitako jarrera positibotzat jotzen du, halaber, elkarteak eta egitarauak hiru espazio hauek uztartzea lortu duela azpimarratu. Gaztelumendiren esanetan, "Guggenheim egina dago. Orain lortu behar duguna euskaldunok bertan ahalik eta ekintza gehien egitea da". Bide horretatik, datorren igandeko lore jokoez gain, Gabriel Arestiri bere heriotzaren 25. urteurrenean egingo zaion omenaldia ere Guggenheimen burutuko da.
Aurrera begira, elkarlana bultzatu nahi dute Bizkaiko Manexak elkartekoek. Bizkaiko gainontzeko kultur elkarteei euren laguntza eskaini nahi diete (finantziazio kontuetan, adibidez) lurralde osoan ekitaldiak bultzatzeko.
Egun dozena erdi lagun inguru dabil euren borondatez (musutruk, beraz) proiektu honetan lanean. Baina taldeko komunikazio arduradun Patxi Gaztelumendik esan duenez: "Ilusioa pizten ari da eta bide lagun berriak topatzen ari gara". Datorren urterako elkartea handitu egingo dela espero dute. Oraingoz, datozen egunotako ekitaldietan parte hartzeko deia luzatu dute