Industri Sustapen eta Eraldaketarako Baltzua (SPRI) EAEk 80ko hamarkadan bizitako industria-krisialdi larriaren urterik latzenetan sortutako erakundea da. Elkarte hau EAEko industria birmoldatzeko eta sustatzeko tresna gisa sortu zen. Sozietate publiko bat da eta kapitalean Eusko Jaurlaritzako Ogasunak eta EAEko hiru aurrezki kutxek parte hartzen dute. Elkarte honek krisialdiak jotako urteetan zehaztu zituen bere helburuak. Helburu horiek hein handiagoan edo txikiagoan beteko ziren, era guztietako iritziak baitaude, eta une honetan garai berriotara eta industriaren egoera berrira egokitzen saiatzen ari da.
Eusko Jaurlaritzako Industria Sailaren menpekoa den SPRIk aurreranzko jauzia egin nahi du oraingo honetan, eta industriaren birmoldaketaz kezkatu beharrean, euskal enpresak sustatzea du helburu Industria, Merkataritza eta Turismoa bultzatuz. Xede horretan, Sustatze, Nazioarteratze eta Teknologi Batasun arloak landuko ditu.
Merkataritza eta Turismoa Industria sailera bildu ondoren, SPRIren menpeko sozietateek (Sprilur, Parke Teknologikoak, CEI-ak eta Arrisku-Kapitala gestionatzeko Sozietatea) lan gehiago izango dute, eta zentro logistikoen, hotelen eta atzerritik datorren turismoari harrera egiteko guneen sorrera bultzatuko dute.
SPRIk aurrera darrai inbertsioak sustatzen eta krisiak bereziki zigortutako eskualde bitan -Ibarrezkerrean eta Pasaiako Badian- inbertsioak finantzatzeko laguntzak bilatzen. Nolanahi ere, SPRIren Ekonomia Sustatzeko planaren baitan, Berrikuntzarekin eta Nazioarteratzearekin zerikusia duten jardunbide bi bultzatuko dira hemendik aurrera. Plan honen arduradunen aburuz, euskal enpresa batek nazioartera egiten duen heinean sendotu egiten du Euskal Herriko bere enpresa-egitura.
Kontestu honetan, Eusko Jaurlaritzaren menpeko erakunde honek atzerriko proiektuak bereganatzeko, atzerriko eta euskal enpresen artean elkarlanean jarduteko eta atzerriko herrialdeetan euskal enpresak irekitzeko akordioak lortu behar ditu. Europako Ekialdeko merkatuetan sarrera edukitzeko Poloniako plataformaren kasua SPRIk dauzkan plan eta helburu horien parte bat da hain zuzen.
SPRIk une honetan 32 agente dauzka mundu osoan zehar barreiatuta. Agente hauek proiektuak lotu nahi dituzte, "Euskadi" inbertitzeko leku erakargarri gisa aurkezten dute. Asian zazpi herrialdetan jarduten dute: Korea, Txina-Pekin, Txina-Hong-Kong, Txina-Xangai, India, Japonia eta Taiwanen. Europan zortzi herrialdetan: Alemania, Eslovenia, Hungaria, Italia, Frantzia, Polonia, Erresuma Batua eta Errumanian. Mediterranio aldean hiru herrialdetan: Maroko, Tunisia eta Turkian. Nafta eta Commonwealth elkarteetako hiru herrialdetan: Estatu Batuak, Kanada eta Mexikon. Ertamerikan eta Kariben sei herrialdetan: Venezuela, Kolonbia, Kuba, Ekuador, El Salvador eta Dominikar Errepublikan. Eta Hegoamerikan bost herrialdetan: Argentina, Brasil, Txile, Peru eta Uruguayen.
1998ko krisiak Asiako Hego-ekialdea eta Hegoamerika gogor astindu zituen arren, SPRIk lanean jarraitu zuen alde horietan euskal enpresen nazioarteratzeko xedean. Horrenbestez, urte horretan elkarlanean jarduteko 33 akordio itxi ziren, beste 80 lanpostu sortu ziren eta fakturazioa 1.000 milioi pezetako (40 milioi libera) kopuruan handitu zen. Akordio horietan aipagarri dira Kuban izenpetutako bi: Lázaro Ituarte enpresak BK-CETI enpresarekin batera balbulak egiteko izenpetutakoa eta LEIA enpresak CITMA enpresarekin batera berrikuntza teknologikorako proiektu batzuk garatzeko izenpetutakoa.
Gisa berean, Eusko Jaurlaritzaren menpeko elkarte honek beste bost kontratu handi gorpuzten lagundu zuen. Besteak beste, Alkargo enpresaren transformadoreen hornidura eta Washingtongo Metroarentzat bidaiarientzako 110 kotxeren eraikuntza aipatu behar dira. Bidaiarientzako tren-kotxe horiek CAF enpresan egin dira eta, horrenbestez, Beasaingo enpresak sarrera izan du Estatu Batuetako merkatuan. Bukatzeko, aipagarria da erakunde honek eskaintzen dituen laguntzak euskal enpresek atzerrian inberti dezaten. Garrantzitsuak dira Bellota enpresak Kolonbian eta Brasilen dauzkan proiektuak, Irizar enpresak Brasilen dauzkanak, Tavex Algodonera eta Artalde enpresek Marokon dauzkatenak eta Ulma enpresak Brasil, Argentina eta Txilen dauzkanak.
Azkenik, Kubako enpresari eta zuzendariei eskainitako prestakuntza da SPRIren egitekoan aipagarria den beste alderdi bat. Horretarako, aldez aurretik euskal enpresa txiki eta ertainetan aplikatutako Zuzendaritzaren Garapena programa erabili da. Egiteko hau bere garaian Eusko Jaurlaritzak eta Kubako Gobernuak izenpetutako hitzarmenen baitan jasotzen da