INTERNETEK EGUN DUEN eragina eta batez ere etorkizunean izango duena kontuan izanik, jarraian aurkezten ditugun aholku batzuk eman berri ditu Europako Batzordeak:
1.- Gazte europarrek Aro Digitalean sarrera izan dezatela sustatu behar da.
2.- Interneterako sarbideek merkeagoak izan behar dute.
3.- Merkataritza elektronikoaren garapena bizkortu behar da.
4.- Ikerlariek eta ikasleek sarbide lasterra izan behar dute sarera.
5.- Interneten sartzeko segurtasuna eskaini behar da txartel adimendunen bidez.
6.- Arrisku-kapitala erraztu behar zaie teknologia aurreratua erabiltzen duten enpresa txiki eta ertainei.
7.- Elektronikan inplikatu behar dira minusbaliotasunak dituzten pertsonak.
8.- Osasun atentzio elektronikoa bultzatu behar da.
9.- Garraio adimendunak antolatu behar dira.
10.- Gobernuak sarera bildu behar dira.

TELEFONICAREN FILIALA DEN TERRAREN kasu zehatzean, aurtengo lehen hilabeteetan guztiok ikusi dugu Espainiako Estatuan Internetek dituen baloreen bilakaera. Amerikako eta Europako burtsen munduan ez dabilena zeharo harritu du igoera horrek, burtsa horietan ugari baitira Terraren antzeko kasuak. Izugarria da Amerikako eta, une honetan, Europako burtsetan Interneten aurrean dagoen grina. Horrela, bi taldetan bereizi dira inbertsoreak eta adituak: batean hau guztia burbuila baino ez dela eta luzaroan iraun ez dezakeena diotenak daude eta, bestean, zeharo kontrakoa diotenak. Eztabaida zabalik dago, baina bizitzak aurrera darrai eta burtsek egunero irekitzen dituzte beren ateak; horra errealitatea.
Honenbestez, Internetek Europako burtsetan dituen tituluen balorea hirukoiztu egingo da 2000. urte honetan. Merry Linch enpresa espezializatuan lan egiten duten adituen esanetan, aurtengo ekainean 150.000 inguru milioi dolarreko balioa izango dute Internetek Europako burtsetan dauzkan baloreek, eta kontuan eduki behar da 1999ko irailean titulu horien balioa 50.000 milioi dolarrekoa zela. Hortaz, enpresa espezializatu horrek eskainitako aurreikuspenak betetzen badira, hirukoiztu egingo da Internetek Europako merkatuetan izango duen balorea.
Hala eta guztiz ere, oraindik oso zabala da EEBBetako merkatuen eta Europakoen burtsa-baloreen arteko arraila. Dow Jones Internet Indizea osatzen duten 40 baloreen burtsa-kapitalizazioak (240.000 dolar), lauz biderkatzen du Bloombergeko Beunet Indize europarra osatzen duten 79 burtsa-baloreen kapitalizazioa.
Telefonicaren filiala den Terra sozietatea Europako merkatura atera bezain laster, kapitalizazioaren buruan jarri zen %21,48ko merkatu-kuotarekin, eta ondotik datoz Freeserve britainiarra (%11,5) eta Intershop eta Consors alemaniarrak (%7,1 eta %5,8 hurrenez hurren). 1999. urte amaieran eta burtsan aurkeztu eta berehala, % 280 igo zen Terra, eta une horretan 2,2 bilioi pezetako kopurura iritsi zen burtsa-kapitalizazioan. Terrak Espainian duen balioa EEBBetako aitzindarienekin alderatuta esan beharra dago Amerika Online (AOL) enpresak, kapitalizazioaren arabera Interneten balio handiena duenak, 1999ko urte amaieran 200.000 milioi dolarreko balioa zuela, Terra enpresak halako hamasei!
Orain Internet enpresak Europako burtsetara noiz aterako zain gaude. Lerro hauek argitara ematerako agian burtsan izango dira World Online International talde holandarra, Lycos Europa, eta Deutsche Telekom, France Telekom eta Telecom Italia atariak. Eta grina hau Espainiako Estatura ere iritsi da. Izan ere, Baloreen Merkatu Batzordeak, estatu osoko burtsak arautzen dituenak, prest eduki nahi du maiatzerako teknologia aurreratuko enpresen merkatu berri hau, ez baitute irabazirik bermatu behar. Enpresa internauten talde txiki bat burtsara ateratzeko prestatzen ari da, horixe baita talde horren finantziazioa bermatzeko funtsezko urratsa. Txosten hau argitara ematen denerako, agian aditzera emana izango du baloreen batzordeak. Eta baliteke ordurako sukarra areagotzea enpresa mota honek berekin batera dakartzan arrisku guztiak kontuan izan arren. Batzuk sendotu ahal izango dira baina, agian, beste asko izango dira Interneten burbuilaren osagarri eta, beraz, desagertu egingo dira bihar-etzi.