Interneten negozioak dagoeneko badu oihartzuna Euskal Herrian. Negozioa Internetera zabaltzeko apustuaren erakusgarri gisa euskal enpresa biren bi proiektu zehatz aukezten ditugu orriotan: bata, BBVA finantza enpresarena eta, bestea, Iberdrola energia enpresarena, azken urteetan negozioa anizteko politika bideratzen ari baita. Erakunde biak dagoeneko zeharo murgilduta daude sarearen mundu honetan. 26. orrialdean , halaber, Interneten munduan "Kristina" izenaz ezagutzen den eta dagoeneko 1.000tik gora milioi pezetako (40 milioi libera baino gehiagoko) inbertsioak eskatu dituen Iberdrolaren proiektuaren berri duzu. BBVAren proiektua edo, hobe esan, errealitatea da Uno-e.com izena duen ziberbankua. Soilik Internet bidez lan egingo duen aurreneko bankua da Espainiako Estatuan.
BBVAk ziberbanku hau sortzeko hartu zuen erabakiak Argentariarekin eginiko Bategitean du jatorria. Francisco Gonzalez buru duen Argentaria banku espainiarra mota honetako banku baten sorrera bultzatzen hasia zen. Gauzak horrela, BBVAko arduradunek bere egin zituzten banku espainiarrean zentzu honetan eginiko urratsak, eta ziberbanku berri honekin negozio-arlo berri bat sortzeko erabakia hartu zuten. Honenbestez sortu da bategindako banku berriaren hamargarren negozio-arloa.
Negozio-mota hau sendotzeko eta zabaltzeko, BBVAk aliantza estrategiko bat izenpetu du iragan otsailean Telefonicarekin. Horrela, leku ezin hobean daude aurrenekoak izateko Interneten negozioak, merkataritza elektronikoa, sakeleko telefonia eta banku-kontuak bideratzeko bide berriak kontrolpean edukitzeko orduan. BBVAk, xede horretan, Telefonicaren %10 erosi du eta operadore honek euskal bankuaren %3. Bankuak proiektuak garatzeko bilioi erdi inguru pezeta inbertituko ditu, eta Telefonicak beste 400.000 milioi pezeta aurreratuko ditu. Enpresa biak Hego Amerikan ondo kokatuta daudenez, izugarria izango da munduko alde horretan izango den negozioa. Eta mundu hori da enpresa bien funtsezko apustuetako bat.

Banku tradizionalentzat hil ala bizikoa izaten hasia da Interneten egotea. Eta ez da soilik erabiltzaileek zerbitzu eta bide mota gehiago eskatzen dituztelako, bankuentzako abantailak ere handiak direlako baizik. Kostuak zeharo murrizten dira. Transakzio mota desberdinen prezioa ezagutzea besterik ez dago. Sybase konpainiak kaleratutako txosten baten arabera, ohiko transakzio batek 1,07 dolar balio du banku batean eginez gero, 55 zentabo telefonoaren bidez eginez gero, 27 zentabo kutxazain automatikoetan egiten bada eta zentabo bakar bat Interneten bidez burutuz gero.
Gainera, bankuarentzat gutxitu egiten dira kostu finkoak, langile eta lokal gutxiago behar ditu. Euskal finantza erakundeak emaniko datuen arabera, bulegoetako langileek beren denboraren %52 baino ezin diote salmentari eta bezeroarekiko arretari eman, gainontzekoa barne gestio eta administrazio-lanei eman behar baitiete. Bulego zibernetiko berri honetan, denboraren %20 baino ez dute eskatuko betebehar automatikoek. Ondorioz, salmenten %20ko hazkundea eta kostuen %5eko murrizketa aurreikusten dira.
Banku tradizionalek, gainera, beste errealitate bat izan dute kontuan. Gaurko egunean, sarearen bidezko finantza zerbitzuek 374 milioi dolar (60.000tik gora milioi pezeta, 2.400 milioi libera inguru) mugitzen dituzte. 2003. urterako aurreikuspenen arabera, hirukoiztu egingo da erabiltzaileen kopurua (9,4 milioi), eta negozioa, aldi berean, ehun aldiz handiagoa izango da.
Gauzak horrela, BBVA sarera bildu da soilik Interneten bidez lan egiten duen aurreneko bankua sortu ondoren. Horretarako, Telefonicaren filiala den Terra Networks enpresaren %3 erosi zuen 2000. urte honen hasieran; 81.500 milioi pezeta inbertitu zituen. Operazio honen bidez aliantza estrategiko bat garatu dute konpainia biek, eta hitzarmen horien arabera, hasiera batean Telefonicaren filialak ziberbanku berriaren %20 edukiko du kontrolpean.
Ziberbanku berria iragan otsailaren 14an gauzatu zen, 10.000 milioi pezetako baliabideekin, eta hasiera batean Espainiako Estatuan jardun ondoren, Frantzian, Portugalen, Estatu Batuetan eta Hego Amerikan (batez ere Mexikon, Brasilen, Argentinan eta Txilen) egin nahi du sarrera. Banku berriak urtearen amaieran 90 langilez osaturiko plantila eta 2003. urterako milioi bat bezero edukitzea ditu helburu nagusi. Bezero kopuru horrek bankuak jardungo lukeen lurraldeetako merkatu-kuotaren %13ko batez bestekoa islatuko luke. Espainiako Estatuari begira, berriz, ziberbanku berri honek 275.000 bezero bereganatu nahi ditu datozen hiru urteetan, merkatu kuotaren %25era iristeko xedean.
Argentariatik datorren Manuel Galatas ziberbanku honetako lehen kontseilari ordezkariak eginiko aurreikuspenen arabera, ziberbanku berri honek aurreneko bi urteetan 2.500 milioi pezeta galduko ditu urtean, eta 2002. urtean 700 milioi pezetako mozkinak izango ditu.
Bukatzeko, azken asteotan Banco Guipuzcoanok egin duen iragarpen ofizialaren arabera, banku honek Interneten beste banku bat sortzeko erabakia hartu du. Banku berri honetan gestio independentea bideratuko da (www.bancogui.es) BSCH eta BBVA Uno-e ziberbankuarekin egiten ari diren ildo beretik.
Banco Guipuzcoanok martxoaren amaieran jakinarazi zuen Guay.com atari arabarrarekin bat egin duela. Gipuzkoar bankuak atari honen % 10 erosi du, sarearen bitartez finantza zerbitzuen prestazioak bat eginik garatzeko xedez. Operazioaren zenbateko ekonomikoa ezagutzera eman ez duten arren, adituek diote gipuzkoar entitateak 150-200 milioi pezeta ordainduko dizkiola arabarrari %10 horren truke