Euren egoitza soziala Euskal Herrian duten banku eta aurrezki kutxen 1999ko etekin gordina bilioi erdi pezeta inguruan ibili da. Hala diote azken hilabeteetan zehar finantza entitate hauek jakinarazi dituzten datuek. Etekin garbia, hots, zergak ordaindu ondorengoa, 415.478 milioi pezetakoa (16.620 milioi libera inguru) izan da, aurreko urtekoa baino %10 gehiago.
Euskal finantza entitateen artean BBVA eta BBK dira azpimarragarri. Lehenak, Argentariaren fusioaren ondoren, 290.481 milioiko etekin gordina izan zuen eta bigarrenak 38.743 milioikoa. Hego Euskal Herriko lau Aurrezki Kutxek (BBK, Kutxa, Vital eta CAN), Euskadiko Kutxarekin batera, 3,5 bilioi pezetatik gorako baliabideak kudeatu zituzten 1999an (pentsio planen fondoak alde batera utzita). Honek garbi erakusten du Euskal Herriko Aurrezki Kutxen sistemak duen pisua. BBK eta Euskadiko Kutxakren kasuan, bakoitzak bilioi bat pezetatik gora kudeatu zituen.

Euskal banku mapa, euren egoitza nagusia Hego Euskal Herriko lau hiriburuetako batean kokatuta duten bost bankuk eta lau aurrezki kutxa edo kreditu kooperatibek osatzen dute. Iparraldean bere egoitza soziala bertan duen entitaterik ez dago. Jakina denez, egoitza soziala euskal hiriburu batean kokatzeak etekin handiak ekartzen dizkie diru-kutxa publikoei, ekintza zerga Foru Ogasunetan ordaindu behar baita.
Honakoak dira Hego Euskal Herrian egoitza duten bost bankuak: BBVA Bilbon; Bankoa eta Banco Guipuzcoano Donostian; BSCH taldeko Banco Vitoria Gasteizen; eta Banco Popular taldeko Banco Vasconia Iruñean. Euskal jatorriko banku hauez gain, noski, badira Euskal Herri osoan lanean diharduten beste banku espainiar eta europar batzuk.
Aurrezki kutxa eta kreditu kooperatibei dagokienez, ondorengoak dira: Euskadiko Kutxa Arrasaten; BBK Bilbon; Kutxa Donostian; Vital Kutxa Gasteizen; Nafarroako Aurrezki Kutxa (CAN) Iruñean; Baserritarren Kutxa, Bilbon; eta Caja Rural Navarra, Iruñean. Kasu honetan ere Estatu Espainiarreko beste hainbat entitatek ere dihardu Hego Euskal Herrian, Kataluniako La Caixa, Caixa de Galizia gailegoa edo Madrilgo Caja de Madrid kasu.
BBVA da merkatuko entitate garrantzitsuena, batetik Estatu osoan diharduelako eta bestetik hainbat fusiok eraman duelako egoera horretara: Banco Bilbao eta Banco Vizcayaren artekoa lehenik eta duela gutxi Argentariarekin buruturikoa ondoren. Nazioarteko bokazioa duen megabankua da dagoeneko BBVA. 89.235 langilerekin, bezeroen baliabideetan 40 bilioi pezetatik gora kudeatu zituen eta zerga aurretiko 290.481 milioi pezetako etekinak izan zituen. Telefonicarekin aliantza burutzeko eta Europa eta Hegoa Amerikan hedatzeko plan berriekin, BBVAk 2002 urterako 500.000 milioiko etekinak bereganatzea du helburu.
BBVAren barruan, bere kartera industrial izugarria azpimarratu behar da; aurreko hamarkadan 467.000 milioi pezetako etekina ekarri zion horrek. Neurri handian kontrolatzen dituen enpresen artean ondorengoak nabarmentzen dira: Telefónica (9,17%), Repsol (9,54%), Iberdrola (9,02%), Iberia (7,30%), Terra (3%), Sogecable (10,39%), Acerinox (14,18%), Metrovacesa (17,32%), Acesa (5,36%), Bodegas y Bebidas (39,28 %). Horri guztiari atzerriko bankuetan duen parte hartzea gehitu behar zaio: Italiako Banco Nationale del Laboro, Frantziako Credit Lionnais edo Marokoko Wafabank. Hego Amerikan ere bere eragina zabaldu du azken hilabeteotan eta dagoeneko liderra da bertako bankan.
Banco Guipuzcoanok, hedapen prozesuan murgilduta, zer esanik eman du azken asteotan Banco Sabadell-eko partizipazioa (%10) BBKren esku uzteagatik. Azken honek, gainontzeko euskal kutxekin batera Aguirre Gonzalezen bankuaren beste %10 bat kontrolatzen zuen lehenago. Bestalde, bere garaian Credit Agricole-rekin aliantza prozesua aurrera eraman zuen Bankoak, bere sukurtsaletan desinbertsio prozesua jarri du abian eta, modu horretan, Levanten kokatutakoak saldu zituen iaz. BSCH taldearen barruko Banco Vitoriak bere ibilbidea indartu egin du, Banestoren inguruko arazoek eragindako krisia gainditu ondoren (Banesto taldearen barruan baitzegoen lehenago). Azkenik, Banco Popular taldeko partaide den Banco Vasconiak ere hazten jarraitu du azken urteotan