Les Eaux-Bonnes herri termala iragan ondoren Gourettera, Pirinioetako eski estaziorik zaharrenera iritsiko gara, Aubisqueko lepo ospetsua igo aitzin. Biarno eta Bigorre arteko mugatik hurbil gaude, Pauetik Larunsera eraman gaituen Ossauko bailarako bidea jarraitu dugula.
Gouretteko hegoekialdean dagoen azken aparkalekuan kotxea utzita, oinez hasiko dugu ibilaldia, mundrunetik eta norabide berbera jarraituz. Tenis zelaietara iritsiz, ondoan dagoen zubitik Valentineko erreka igaroko dugu, Saxeko basoan barna eramango gaituen bidezidorra segitzeko jarraian.
Basotik ateraz eta erreka ezkerraldean dugularik, Pene Sarriereko magala zeharkatuz, Plaa du Batch-eko bordak aldera hurranduko gara. Coste de Gouako bordak errekaren bestaldean utzi ondoren igotzeari ekingo diogu. Orain arte jarraitu dugun bidea leuna izan bada ere, hemendik aurrera aldapa gogortuko da, Anglaseko lakuraino iritsi arte.
Gorago ikusiko ditugun burdin meategiekin loturiko eraikuntzen aurriak topatuko ditugu eta bidetik Anglaseko urjauziaren isatsa atxemanen dugu. Urrunago Uziouseko lakutik datozen urek sorturiko urjauzia begi bistan izango dugu.
Behin bidezidorraren azken bihurguneak eginda, Anglaseko lakua kokatzen den lautadatxora aterako gara. Pene Medaa, Geougue d'Arre, Sanctus, Pic de Louesque eta Pic Esquerrako gailurrek sortzen duten zirko antzeko honetan Anglas, Uzious, Lavedan eta Louesqueko lakuak daude. 2.068 metro itsasoaren galgaren gainean, inguruko bigarren lakurik handiena da Anglasekoa. Lakua ekialdetik inguratzen duten mendi mazeletan behialako burdin meategien aztarnak atzeman daitezke.
Lakutik hegoalderantz, meategien bidea jarraituz, Anglaseko gailurretik ipar-ekialdean dagoen leporaino igoko gara. Lepo honetatik ikusmira ederra izanen dugu, bai Anglaseko lakua eta orain arte igo garen bailaratxo aldera, bai Uzious eta Lavedaneko lakuak ixten dituen zirko aldera ere. Urrunean ikusten dugun Uziouseko lepoak zirko horren irteera bakarraren antza hartzen du hemendik. Hura iraganda, Bigorreko lurretan sartuko ginateke, Arenseko bailaran, hain zuzen ere, Biarno eta Bigorreko muga hantxe bertan jarrita baitago.
Gourettetik jarraituko dugun GR 10 izeneko bidea Hourquettte d'Arreko lepoa igarota, Soussoueouko goi-aranera doa, Ossauko bailaran sartzeko jarraian. Gure bidea hori ez denez, lepotik ekialderako norabidea hartuko dugu Uziouseko laku aldera jaisteko sobera gogorra ez den aldapatik.
Ossau bailarako Isabe lakuarekin batera, Uziousekoa Biarnon iparralderantz kokaturiko lakurik handiena da. Laku honek Anglas eta Sanctuseko gailurren artean sortzen den sakonune osoa hartzen du kasik, paisaje harrigarria sortuz.
Jaitsiera jarraituz eta lakutik datozen uren parera joanik, hodi zaharra ustiratzen duen bide zorabiagarria hartuko dugu, kasu handiz ez linburtzearren. Tarte bertikala igarota, harrizko kaos baten barna zigi-zaga eginez doan bidetik Uziouseko urek sorturiko urjauzi paregabea ederki ikusteko parada izanen dugu.
Bideak bailaratxoa zeharkatzen du, zenbait urjauziren albotik iraganez. Errekaren norabidea jarraituz berehala lotuko gara Anglaseko lakuraino iristeko hasieran hartu dugun bidearekin eta itzulerako norabidea eginez, Gouretteraino iritsiko gara