Demokraziaren kontzeptua aldakorra izan da. Historian zehar ez da beti berdina izan. Bere jatorrian, Grezia klasikoan, esaterako, emakumeek ez zuten parte hartzerik izan sistema politiko horretan, nahiz eta bere izaerari berdintasunaren ideia lotua egon, eta, demokrazia esaten zitzaion biztanleriaren erdiak bozkatzeko eskubiderik ez zuenean ere. Gaur egun, Europan, nekez onartuko luke inork emakumeen bozkatzeko eskubiderik gabeko demokraziarik, gizarteak aurrera egin du beraz, eta honekin batera demokraziaren kontzeptua garatuz joan da.
Bilakaera honetan beste aurrerapauso bat suposatu du erabaki guneetan emakumeen neurriz beherako ordezkaritzak demokrazia bukatu gabea bihurtzen duela ulertzeak, eta, aldi berean, parekotasuna eskakizun demokratikotzat onartzea.
Honela ulertu zuten 1999ko maiatzean «Emakumezkoak eta Gizonezkoak Agintean» izeneko Parisko Batzarrean Europako Batasuneko 15 gobernuek. Haiek hitza eman baitzuten parekotasuna aplikatuko zutela politikaren eta gizartearen arlo guztietan. Orduz geroztik, Frantzia izan da hitzarmen hau praktikan jartzen lehena; bere Asanblea Nazionalak hauteskunde zerrendetan egon behar duten gizon zein emakumeen kopuruaz onartutako lege-proiektuak bultzada eder bat eman dio eztabaidari.
Izan ere, esan beharra dago, erabaki prozesuetan emakumezkoen ordezkaritza indartzeko era guztietako neurriak beharrezkoak ditugula, polemikazko kuotak direla, subentzioak direla... guztien eta bakoitzaren eraginetik etorriko da irtenbidea, eta ez bakar baten erabilpenaren ondorioetatik.
Aipatu bezala, erabaki postuetan emakumeen eta gizonen partehartze orekatua lortzeko prozesua martxan dago. Euskal Autonomia Erkidegoari dagokionez, momentuan emakumezkoen ordezkaritza zertan den begiratuz, zera aurkitzen dugu: Legebiltzarrean, % 29,3 da emakumeen partehartzea, Batzar Nagusietan % 25,8 eta udaletan % 27,2. Datuek adierazten duten bezala, nahiz eta nolabaiteko aurrerapena izan den, hor ere bada oraindik defizit demokratikoa. Eta defizita gainditzeko nahitaezkoa dugu geure gizarteko alde guztien eskuhartzea, eta batez ere geure botere publikoena, parekotasunak eskatzen duen partehartze mugetara iristeko, hau da, sexu bakoitzeko ordezkaritza ez dadila izan % 40 baino baxuagoa eta % 60 baino altuagoa.
Emakumezkoen partehartzeak botere politikoan biztanleriaren erdiaren interesak kontuan hartzea ahalbidetuko du, gizon eta emakumeen baldintza, egoera eta beharrei erantzungo dielarik.
Erabakiak hartzerakoan partehartze orekatua gizarte-kohesio faktorea da. Giza-hitzarmen berri hau boterea, familia eta lana partekatzearen ideian oinarritzen da. Historikoki egin den lan banaketak gizartea bi eremutan zatitu egin du, arlo publikoan eta arlo pribatuan. Gizonezkoei publikoa eta enpleguaren mundua egokitu zaie eta emakumezkoei etxekoa eta pribatua. Egoera honek sortu dituen gizarte egitura eta baloreak gizonak eta emakumeak mugatu ditu, emakumeen kalterako, batez ere.
Gizarteak ezarritako oztopo hauen gainetik, helburua, pertsona bakoitza bere etorkizunaren jabe izatea da, mundu bi horiek uztartu, familia eta etxeko erantzukizunak eta enplegua guztien artean banatzeko.
Emakumeek agintean duten parte urria indartzearekin, emakume eta gizonen artean aukera berdintasuna lortzera bideratutako politikak eta estrategiak ezartzea lortu nahi da, lehen esan bezala, emakumeak eta gizonak mugatzen dituen gizarte sistema hau aldatzeko.
Hala eta guztiz ere, kontuan hartu behar da, erabaki guneetan emakumeen partehartzearekin soilik ez direla berdintasun politikak aurrera eramaten. Emakume zein gizonen borondatea behar da desberdintasunak suntsitzeko eta emakumeen eskubideak defendatzeko.
Mugimendu Feministaren lanak eta adoreak agintearen ateak zabaldu dizkietela onartzen den bezala, onartu beharra dago, emakume izateak ez duela halabeharrez gai honekin konprometitua bihurtzen. Jakina, hau auzi ideologikoa da eta ez biologikoa. Gaur egun, botere politikora iristen diren emakumeen artean, beste alorretan bezala, batzuk genero ikuspuntuarekin lan egingo dute eta beste zenbaitek ez du egingo, hau izanik, agian, prozesu honetan ordaindu beharreko peajea, aurrera begira beste emaitza batzuk jaso ditzagun. Edozein modutan, mundua begiratzeko ikuspuntua orekatuagoa eta pluralagoa izango da emakumeen partaidetzarekin eta, gizartea gizon eta emakumez osatua dagoen bitartean, botereak honen isla behar du izan, guztion mesederako