Espainia eta Frantziako Estatuen Barne Produktu Gordina (BPG) edo, gauza bera dena, ekonomia % 3,3 eta % 2,8 haziko da, hurrenez hurren, Banco Bilbao Vizcaya Argentariaren Azterketa Zerbitzuak 2000. urterako argitara emandako aurreikuspenen arabera. Halaber, Espainiako Estatuko Kontsumo Prezioen Indizea (KPI) % 2,5era iritsiko da eta Frantziako Estatukoa % 0,9koa izango da. Gogoan izan beharra dago euskal finantza-entitatearen zerbitzu horrek ospe eta izen handia duela bere azterketen zorroztasunagatik, ia beti errealitatearekin bat etorri ohi direlako.
2000. urterako aurreikuspenen arabera, Espainiako Estatuan industri produkzioak «

» bat izango du, kanpoko eskariaren neurri bateko hobekuntzari esker; eta eraikuntza eta zerbitzu sektoreen hazkundea baretu egingo da. Horrela, industriako produkzioa 1999ko % 1,8tik aurtengo % 2,4ra igoko da, eraikuntza % 10,7tik % 7,3ra jaitsiko da, eta zerbitzuek ere behera egingo dute, % 3,6tik % 2,9ra. Banco Bilbao Vizcaya Argentariaren «Situación» aldizkariaren azken zenbakiak biltzen ditu arestian aipatu datuok.
BBVAren Azterketa Zerbitzu horren iritziz, hazkunde ekonomikoa % 3,7koa izan da 1999an, industriaren gorakada jaitsi egin delako aurreko urtearekiko –% 1,8 % 4,8ren ordez–; era horretan eraikuntzaren eta zerbitzuen jarduera hobetzearekin orekatuz.
Nazioarte mailan, BBVAren Azterketa Zerbitzuak nabarmentzen duenez, Ekonomi Lankidetza eta Garapenerako Erakundeko (OCDE) herrialdeen jarduera geldotu egingo da, 1999ko % 2,8tik 2000n izango duten % 2,6ra igaroz. Hain zuzen ere, Frantziako Estatuak, Iparraldea horren menpe dagoelarik, Europako batezbestekoaren gainetiko hazkundea izango du, % 2,8koa. Ipar Ameriketako ekonomia, euskal finantza taldeak dioenez, % 3,8tik % 3ra eroriko da

Ekonomi Lankidetza eta Garapenerako Erakundeko (OCDE) txostenak bat datoz euskal erakunde guztiekin 2000. urte honetako hazkundearen aurreikuspenetan. Baina nazioarteko erakunde honen aurreikuspenak askoz ere harantzago doaz. Munduko ekonomiak hazten jarraituko du 2020. urtera bitartean. Ekonomi Lankidetza eta Garapenerako Erakundeak munduko herrialde aberatsenak biltzen ditu. Mundu mailako sistema kapitalistaren azterketa eta honen propaganda egiteaz arduratzen den nazioarteko erakundea da. Beraz, haren iritziak ondo oinarriturik daude, baina ez digu garbi esaten hazkunde ekonomiko horrek herrialde pobreenen hobekuntza ere ekarriko duen ala ez, nahiz eta jakin badakigun pobreenak izaten jarraituko dutela eta bertako lehengaiek herrialde aberatsenen esplotazioa jasan beharko dutela.
Aurreikuspen hauek OCDEk Sarean (Interneten) jarritako «The future of the global enconomy» (Ekonomia globalaren etorkizuna) izeneko azterketan ageri dira. Lan horretan munduko hazkundearen hedapena iragartzen du, eta % 3tik gorakoa izango dela eta mendearen lehen bi hamarkadak hartuko dituela. Beste garai batzuetan ez bezala, badirudi hobekuntza mundu osora zabalduko dela, nahiz eta maila ezberdinean izan, eta horri esker desorekak txikiagoak izango direla.
Txostenaren egileek Kondratief zikloen metodologia ekonomikoa berreskuratu dute. Honela deitzen zaie iraupen luzeko ekonomia-zikloei, 40 urtetik 60ra bitartekoei, Errusiako Nikolai Kondratief ekonomilariaren ohorez, bera izan baitzen ekonomiaren uhin luze horiek aztertu zituen lehenengoa. Kanpoko merkataritzaren, prezioen eta makroekonomiako beste aldagai batzuen bilakaeraren ondorioz, orain artean lau Kondratief ziklo bereizten ziren: 1790etik 1850era (guztira 60 urtekoa, 24 urteko hedapena eta 36 urteko atzerapena), 1850etik 1896ra (guztira 46 urtekoa, 23 urteko hedapena eta 23 urteko atzerapena), 1896tik 1940ra (guztira 40 urtekoa, 20 urteko hedapena eta 20 urteko atzerapena), eta laugarrena 1941ean abiatzen dena, 32 urteko hedapena izan duena (1973ra arte) eta duela gutxi arte atzerapen aldi bat izan duena. OCDEren ustez, orain, 2000. urtean, beste ekonomi ziklo bati ekingo zaio.
OCDEren azterketak munduan bost esparru handi hartzen ditu kontuan: Estatu Batuak, Europako Batasuna, Japonia, azaleratzen ari diren herrialdeak eta herrialde pobreak. Estatu Batuei buruz dio hazkundeko bederatzigarren urteari ekingo diola. Europako Batasunak aurreko urteetan baino hazkunde handiagoa izango omen du, batez ere Alemaniak abiatu duen gorakada indartsuagatik. Europaren barruan, Espainiako Estatuari beste herrialdeena baino hazkunde handiagoa aurreikusten zaio. Japonian datuak kontrajarriagoak gertatzen dira, azken bi hiruhilekoetan geldotasun adierazgarri berriak sumatu baitira. Azaleratzen ari diren herrialdeetarako aurreikuspenaren arabera, azken hilabeteetan jasan behar izan duten atzerapen sakonaren ondoren, bere onera etortzen hasiko dira, eta ihes egindako kapitala berriro itzultzen hasiko da. Azkenik, herrialde pobreei dagokienez, txostenaren arabera, beren lehen jardunbidea kanpo-zorra barkatzearen ingurukoa litzateke, hazkundearen eragozle baita