Aurtengo ardo uzta jasotzear dago. Sektore honek garrantzi handia du Hego Euskal Herrian. Horren erakusle dira dauzkagun bi jatorrizko izendapenak: Errioxakoa eta Nafarroakoa. Bi ardook geroz eta estimatuagoak dira, bai Euskal Herrian eta bai munduan zehar. Eta urtetik urtera ardo gehiago eta hobea esportatzen dute. Mahastiak heldutasunera iritsi bitartean izandako klima gorabeherek, Arabako Errioxan batez ere, zalantzak sortarazi dituzte aurtengo ardo kantitateaz nahiz kalitateaz. Uzta erabat amaitu bitartean itxaron beharko da baina zantzu guztien arabera, iaz baino uzta txikiagoa izango dela dirudi; eta kalitatea ona edo oso ona izango dela, bikainera iritsi gabe. Ardoaren inguruko euskal historian gutxitan lortu izan da kalitate bikaina.
Gogoan izan beharra dago apirilean zehar izotzak gogor jo zuela eta kalte handiak eragin zituela Araba eta Nafarroako mahastien % 100ean. Une hartako gehiegizko ezkortasunagatik eta hondamendi hots interesatuengatik, urteko uzta iazkoaren erdia izango zela aipatu zen. Egia da Aste Santuko beroen ondorioz mahastietako kimuak ohi baino lehen atera zirela. Une hartan, nekazariek, laster biltzeko aukera emango zuen uzta iragarri zuten. Baina, gero, apirilean zehar, termometroak behera egin zuen, bost gradu zero azpitik ere izan zen, eta haren ondorioak guztiz suntsigarriak gertatu ziren. Baina aste batzuk geroago ñabardura gehiagorekin eman ziren datu horiek, eta 1999ko uztaren azken emaitzei buruzko berriak ez ziren hain larriak.
Errioxako Kontseilu Arauemaileak mahatsa biltzeko arau batzuk jarri ditu. Kontrol handiagoa ezarri du eta 32 kontrolatzaile edo mahats bilketarako laguntzaile gehiago jartzea aurreikusi du, 186 kontrolatzailera iritsiz. Kopuru honek bikoiztu egiten du duela lau urtekoa. Kontrol horrekin erabat ziurtatuko da uztaren benetako kopurua.

Errioxa jatorrizko izendapenezko 98ko uzta oso ontzat har liteke, bai ardoen kalitate mailagatik eta bai Errioxako historian eman den uztarik ugariena izateagatik. 1998ko uzta 391 milioi kilokoa izan zen, eta hortik 273,5 milioi litro ardo atera ziren. Horrek % 8ko igoera esan nahi du aurreko uztarekiko.
Mahastien zikloa klima baldintza ezin hobean igaro zen; uztari buruzko aurreikuspen oso baikorrak egin ziren eta, neurri handi batean, egiaztatu egin dira. Orokorrean, mahatsa heldutasun maila onean eta oso egoera onean sartu da upelategietan; oso graduazio egokiko ardoak lortu dira, kolore intentsitate onarekin eta 1997an baino kalitate handiagoarekin.
Nahiz eta produkzio kopurua dagoen eskaera baino handiagoa izan, azken ekitaldietan gertatu ohi denez, jatorrizko prezioak, mahatsarenak nahiz ardoarenak, goraka jarraitu zuten eta maila guztiz harrigarrietara heldu ziren.
Merkataritzaren ikuspegitik, 1998ko urtea ona izan da Errioxa ardoarentzako, azken urteetako salmenten gorakada berretsi duelako, barne merkatuetan nahiz nazioartean. Azken urteotako salmenten igoera guztiz ikusgarria izan da, batez ere nazioarteko merkatuetan (azken bost urteetan bikoiztu egin da). Bilakaera honen zergatia, sektoreko iturrien arabera, Errioxak kalitatezko ardo gisa merkatu guztietan duen irudi onaren ondorio da.
Baina 1999ko urte honen lehen sei hilabeteetan salmentak behera egin du % 6,82an. Aipatzen diren arrazoi garrantzitsuenen artean, ardoak izan duen prezio igoera nabarmentzen da, kanpoko merkatuetan beherakada eraginez. 1998an, urtarrila-maiatza bitartean, 96,3 milioi litro saldu ziren, eta 1999ko epe horretan bertan 89,7 milioi litro saldu dira. Arazo larriena kanpoko merkatuetan dago, salmentek % 21,68 egin baitute atzera, 30,7 milioi litrotatik 24 milioi litrotara jaitsiz. Nolanahi ere aurtengo bigarren sehilekoan salmentak hobetu eta bere onera etortzeko itxaropena dago, Errioxako Kontseilu Arauemaileko iturriek adierazi dutenez