Herri Batasunako Mahai Nazionaleko kidea eta azken hauteskunde hauen ondoren Gasteizko Legebiltzarreko partaidea, ezker abertzalearen aurpegi gogorra erakusten du Olarrak. «Behar bada garbi hitz egiteko dudan moduagatik ezarri didade komunikabideek fama hori» erantzuten du berak. HBn abenduan hasi behar duten barne eztabaidaren prestaketan harrapatu dugu eta bere erantzunetan azaltzen dira prozesu horren hariak... eta seguruenik polemikarako esaldiak ere bai.
Ardanzak ez zaituzte deitu gobernu osaketaren kontsultetara.
Kanpainan mezu bat landu du EAJk, denon artean lan egin behar dugula normalkuntza garatzeko. Hauteskundeen ostean, baina, HB zokoratu asmo zutela argi geratu da. Nahiz eta ondo iruditu ez, pozten gaitu ez deitzeak. Deituta ere ez ginatekeen joango. Alderdiek jasotako botoekin trafikatu egiten dute, eta gu horretan ez sartzea balore politiko garrantzitsua da. Guk beste proiektu bat defenditzen dugu, nazio eraikuntzarena.
Parlamentuan aurreko politika bera mantenduko al duzue?
Oraingoz interbentzio maila bera planteatuko dugu. Gure ildo politikoaren eztabaidaren ondorioek kokatuko dute gure politika instituzionala.
Ildo politikoaren eztabaida hori zertan da?
Lau urtean behin geure zilborrari begiratzen diogu, eta gure ildo politikoek azken lau urteetan nora jo duten eta hurrengo lauretan nora joan behar duten aztertzen dugu. Europako hauteskundeen ondoren, irakurketa kritiko baten beharra ikusi genuen: proiektu taktikoari begira, gure masa borrokaren baldintzei eta programari begira...
Azterketa hori ez du zuzendaritzak soilik egingo, baita base guztiak ere. Orain epe horretan sartzear gaude. Ildo politiko hori egin arte, HBren politika orain arteko berbera izango da.
Zuk zeuk zer aldaketa egingo zenuke?
Lan egiteko era aldatu beharra dago, zuzendaritzatik hasita militantziaraino. Kalera begira lan gehiagoren premia dago. Komunikabideekiko politikari dagokionez, komunikabideek jauzi koalitatibo handia eman dute gure aurkako jarreran eta guk ere jarrera aldatu beharko genuke.
Iparraldeko ezker abertzalearekiko politika ere gehiago jorratu beharko genuke batasunaren aldeko proiektuan. Bestetik, HB gure proiektu independentistarekin identifikatuta dago, baina ez hainbeste gure proiektu ezkertiarrarekin. Hori ere gehiago jorratu behar dugu.
Komunikabideekin zer egingo duzue, bada?
Komunikabideekin xaloegiak izan gara. Gizarteari adierazi behar zaio argi eta garbi komunikabideek une honetan herri honen proiektua eta politika baldintzatzeko jokatzen duten zeregin faktikoa.
KASek HB harrapatuta daukala dirudi...
HBn HBk agintzen du soilik, KASen agintzen du KASek eta ziur naiz ETAn ETAk agintzen duela. HBn KASek agintzen duela esatea oso iritzi interesatua da.
Ajuria Eneko Hitzarmena mezu bat garatzen ari da, nola zatitu HB `gogor' eta `biguinen' artean. HBn KASeko kideak badaude, baina hemen ez du inork inor dominatzen. HBko zuzendaritzan zerbait nagusi bada, hori aniztasuna da.
Baina egon badago ikuspegi ezberdinik funtsezko gaien aurrean. Posible al da HBren barruan kontsentsua mantentzea?
Batzuek alderdi politiko bat eta herritar batasuna zer den nahastu egiten dute. Alderdi politiko batean, teorian bederen, halako homogeneitate bat egotea normala da, baina herritar batasunaren kontzeptua argi izanez gero, sentsibilitate ezberdinak daudela esan behar da. Batzen gaituzten jarrera eta nahiak asko dira zorionez, eta horregatik gaude denok Herri Batasunaren barruan. Eta HBn gaudenok, funtsean, proiektu eta planteamendu taktiko berdinak ditugu.
Zergatik dago ETA isilik?
Horri ETAk erantzun beharko lioke. Orain bezala, azken hamar urteotan ETAk teknikoki isilune luzeak izan ditu. Ez dut uste tregua taktikoa dagoenik. Azken komunikatuetan argi azaldu zuen ETAk fronte guztiak zabalik dituela, eta Espainiako Gobernuak ez badu aurrerapausoa ematen negoziazio prozesua irekitzeko, ez dago tregua bat dagoela pentsatzeko arrazoirik.
Gainera, treguaz hitz egitean, beti gauza bera diot: zergatik ez diogu tregua Estatu espainiarrari eskatzen? Treguaren aldekoa naiz, baina Estatuaren treguaren aldekoa. ETAren borroka beste bortizkeria baten aurkako defentsa da. Estatua da herri honen aurka borroka armatua inposatzen duena.
HB barrutik Patxi Zabaleta ETAren treguaren aldeko agertu da.
Gai honi dagokionez, Patxirekin ez nago ados. ETAri tregua eskatuz hemen ez dago distentsiorik. Estatuak berdin jarraitzen baldin badu, zertarako behar da ETAren tregua? Hemen zerbait egiteko borondatea azaldu behar da. ETAk adierazi zuen borondate hori, eta hor da bere interlokutorea, beraz oso erraza da Santo Domingora joan eta hitz egiten hastea.
Ni bakearen alde nago, eta bakea modu batera ulertzen dut: herri honen oinarrizko eskubideen alde egunero borrokatzea, herri honen autodeterminazioaren alde eta lurralde batasunaren alde.
Horrela lortuko da distentsioa. Bestela errenditzea da. Eta errenditzearen alde ez dago inor ezker abertzale barruan.
Zer gertatu zaizue Elkarri-rekin?
Elkarri-rekin arazoak egon dira eta egongo dira, ikuspegi ezberdinak baitauzkagu. Azken urteotan, sasibakezale gehiegi sortu da. Elkarri ez dut Gesto eta Bakea Orainekin parekatzen, badakit ezberdina dela, baina sekulako hankasartzea egin dute. Bakearen nahia edukiz hustu eta desideologizatzen ari dira.
Ez dut ulertzen nola den posible herri honetako subjektu aktibo bat, Elkarri alegia, bitartekari moduan erdian jartzea. Ematen du borroka ETA eta Estatuaren artekoa dela, eta hori ez da horrela. ETAk errepresentatzen du ezker abertzalearen erronka eta defentsa bat, eta jakin badakigu Estatuak zer errepresentatzen duen. Hortxe erdian kokatzea, Estatuaren estrategia indartzea da.
Elkarri enfrentamenduaren erdian jartzen ari bada, horrek zuei zer pentsatua emango dizue.
Guk ahalegin handia egin beharko dugu jende hori ideologizatzeko. Elkarri-k bakea nahi baldin badu, eta ziur naiz nahi duela, Estatua presionatu behar du, eta ez gu.
Zer espero duzu EAJtik?
Zoritxarrez, epe laburrera inolako aldaketarik ez. Estatuak EAEn duen morroi nagusiena da. Estatuaren kolaboratzaile baino, Estatuaren parte da. Erdian jartzea edota beste estrategia batekin ezker abertzalearen aurka egotea errespetagarria da, baina beste bestelakoa da Estatuarekin bat egitea. Estatuak dituen ahulezia guztiak EAJk osatzen ditu. EAJk bere beso armatua den Ertzaintza legeztatu eta Estatuarekin batera ezker abertzalearen aurka jo du.
Zuen bakardade hori ikusita, ezker abertzaleak eutsiko al dio?
Zalantzarik gabe. Ezker abertzalea borrokarako grina berreskuratzen ari da. Azken urte t'erdian gazteria barra-barra sartzen ari da ezker abertzalean, eta ez soilik borrokarako, baita egituretan ere. Ezker abertzalea sendotzen ari da.
PELLO ZUBIRIA / MIKEL JAUREGI
8-10

Gaiez\Politika\Euskal Herr\Taldeak\Alderdiak\HB
Pertsonaiaz\OLARRA2
Egileez\ZUBIRIA2\Politika
Egileez\JAUREGI5\Politika