Barrutik kiskaltzen nauen suari ezin diot eutsi, eta hitz trakets hauek idaztea dut bide bakarra etsipenak guztiz mendean har ez nazan.

Zurikeria gorroto dut; zuriak gorroto ditut. Arazoa hau da: zurikeria nonahi dagoela; denok garela zuriak.

Gauza jakina da erakunde guztiak zurikeriaz baliatzen direla lortu nahi dutena erdiesteko. Esaten duten gehiena (dena) gezurra da, eta badakite. guk ere badakigu. Hala ere, zurikeriari etekin handia ateratzen jarraitzen dute, denok zuriak garela badakitelako. Badakitelako prest garela edozer gauza sinesten dugun itxura egiteko, bai baitakigu gezurra dela eta sineste-plantak egiten ditugula komeni zaigulako, benetan erakundeek eskaintzen diguten hori delako guk nahi duguna.

Ba omen daude erakundeak, elkarteak, alderdiak... bestelakoak direla esaten dutenak: ezkertiarrak, aurrerazaleak... Ez dira beste batzuk bezalakoak: ez dira xenofoboak, ez dira arrazistak, guztion eskubideak babestearen aldekoak dira, eta, horretarako, horrelakoak direla garbi gera dadin, besteak beste, eskaerak egiten, salaketak jartzen, manifak deitzen dituzte... Horiei guztioi erantzuteko, horiekin guztiekin bat egiteko ba omen da ezkertiarra eta aurrerakoia omen den jendea, eta hori erakusteko eta aldarrikatzeko prest dagoena. Horretaz harro sentitzen dira; bestelakoak dira, hobeak, mundu hobea, bidezkoagoa nahi dutelako eta haren alde borrokatzen direlako.

Orain gutxi Trumpen kontrako atentatua (horrela deitu behar diot saltsa zikinetan sartu nahi izan ezean) eta Mendebaldeko demokrazia (bis) guztietako presidente guztiek ozen salatu eta atxikimendu beroa eskaini diote. Belarrian zauritxo bat baino ez zeukan arren (ziur bizarra egiten larriagoak egin dizkiola bere buruari).

Egun gutxira, bi adingabe hil ziren kayuko batean Kanariar Uharteetara heldu nahian. Hain justu ere, Espainian adin txikiko etorkinei buruzko afera puri-purian dagoela. Horren kontura, ezkertiar omen direnen jarrera bakarrik aipatuko dut: umeak besterik ez dira, eta babestu beharra daukagu. Gutxi gorabehera hori diote.

Nork salatu du bi ume horiek hil izana? Nork gogoratu ditu? Nork egin du zerbait haiek gogoratzeko? Haiek bezala beste ehunka, milaka umek (baita umeak ez direnek ere) jasaten duten tragedia salatzeko eta berehalakoan neurri eraginkorrak jartzeko eta ez hitz hutsaletan (beti bezala) gelditzeko?

Nork antolatu du ezer hilketa (bai, hilketa) horiek salatzeko? Berriz gerta ez dadin neurriak aldarrikatzeko?

Inork ere ez. Inork ere ez!

Zurikeria ez dago oporretan. Gurean ere ez. Hamaika aitzakia izan ditugu gure zurikeria zuritzeko eta bidegabekeria guztien aurkako borrokalari sutsuenak garela garbi uzteko. Jakina, ezkertiar omen direnei, udako oporrak direla eta, ezin eskatu borrokan jarraitzeko, horretarako iraila helduko da-eta.

Barrutik suak kiskaltzen nau, amorruak, haserreak, eta ezin dut jasan. Ezin dut jasan, besteak beste, ezer egin ezin dudalako su hori itzaltzeko, bidegabekeria guztiak salatzeko eta haien aurka egiteko. Ezin dut ezer egin? Ezer gutxi, baina ezkertiar eta aurrerakoi guztien zurikeria ozen salatu ahal dut, agerian eta aurrez aurre jarri haien azal beltzaran bizi-bizia eta ume horien guztien azal beltzaran hila.

Beste hainbeste esan behar da palestinarren tragedia dela-eta. Asteburuan (egunero), Israelek ia 150 hamar palestinar hil ditu. Ukrainian, garaitsuan izan zen sarraskia Mendebaldeko erakunde guztiek gogor salatu zuten, eta Errusiaren aurka sutsu egin. Norbaitek gogoratu ditu Israelek eraildako palestinarrak? Norbaitek salatu du Israelen jarrera hiltzailea, Palestina osoa suntsitzea beste helbururik ez duena?

Non ote daude ikasturtea amaitzear zela Palestinaren alde eta Israelen aurka kanpaldiak egin zituzten ikasle borrokalari sutsuak? Oporretan.

Non ote daude hiri eta herri askotan helburu berarekin manifak behin baino gehiagotan deitu zituztenak? Oporretan.

Amaitzeko, ezin aipatu gabe utzi kiskaltzen nauen beste zauri lazgarri bat. Palestinaren alde eta Israelen aurka omen dauden eta Espainiako Gobernuari babesa ematen dioten ezkertiar aurrerazaleek Israeli armak saltzeari ere eman diote babesa (1.000 milioi euro ez da ahuntzaren gauerdiko eztula). Zurikeriak ez die hori salatzen utzi ala?

Beste aipu bat egin beharrean nago. Zer esan aspaldion palestinarren aurka Israelek daraman sarraskiaz ezer aipatzen ez duen egunkari horri buruz? Ez dago oporretan. Ba ote dauka hori (a: ez dut erabaki kolorea ote den) zuritzeko arrazoirik? Esan ote dezakete zer dela-eta egiten duten? Izan ere, nahita harturiko erabakia da; ezin zaio ahanzturari horren errudun egin. Egunero-egunero aipatzea merezi duen zerbait baldin bada, palestinarren egoera tamalgarria eta mundu osoaren zurikeria dira. Ezin gara –sarri egiten dugun bezala– beste norabait begira izan, horrela amaierarik ez duen hilketa ikusiko ez dugulakoan, horrela zer ziztrinak garen erakusten digun sarraskia ahaztuko dugulakoan.

Sentitzen dut, ikaragarri; negar egiten dut, askotan. Baina erabaki dut sentitzen dudan ezintasuna nire buruaren aurka bideratu beharrean oporretan dauden zuri guztien aurka oihurik ozenenean bihurtuko dudala, malkoak isurtzen zaizkidala, begi bistakoa ozen salatzeko: zurikeria ez dago oporretan.

Zuria behin izan denak betiko zuria izaten jarraituko du, eta egingo duen guztia zurikeria estaltzeko ahalegin antzua besterik ez da izango.

Gu guztiok hain..., hain... gara-eta.

– Pendejoak?

– Bai horixe!!

Maru