Zaintza eredua eraldatzeko ahalegin betean segitzen du Usurbilek. Horretarako dituen baliabideak Usurbilgo zaintza ekosistemaren baitan aurki ditzakegu, segidan duzuen argazkietako batean ikus dezakezuen moduan. Besteak beste, ekosistema horren egitura aurkeztu zieten Sutegira joandakoei larunbateko "Usurbil, herri zaintzailea" ekitaldiaren baitan, zaintza ekosistema horren arduradun eta udal gizarte langile Maider Irisarrik eta Usurbilgo alkate Agurtzane Solaberrietak. Egituraketa horrek helburu argi bat du Irisarriren esanetan. "Tresna hauen guztien helburua, pertsonen bizitza osatzen duten eremua guztiak kontuan hartzea da".

Zerbitzuak
Horretarako lantalde ezberdinak dituzte eratuak. Haietako bat, zerbitzuena da. Bertan, "herriko baliabide ezberdinetan eta etxeetan artatuak dauden pertsonen integrazio komunitarioa" lantzen dihardutenak elkartzen dira: Egurtzegiko eguneko zentroko koordinatzaileak, zaintzadun etxebizitzetako ordezkaria, esperientzia eskolako dinamizatzailea, udaleko eguneko arreta zerbitzuko ordezkaria, memoria lantzeko tailerretako dinamizatzaileak, udaleko etxez etxeko koordinatzailea... "Ekintza desberdinak martxan jarri dira; zerbitzuen arteko bisitak, sukaldaritza tailerra Oinarrizko Lanbide Heziketakoekin, udal baratzetara bisitak, "Goazen kalera" dinamika... "Zerbitzuetako taldea, modu paraleloan, zaintza beharra duten pertsonen langunearen lanketan ari gara".

Koordinazio soziosanitarioa
Koordinazio soziosanitarioan dihardu bestalde, herriko gizarte langileen, eta mediku eta erizinen lantaldeak, pertsonak artatzerakoan elkarlana eta koordinazioa bermatzeko. 2023tik hilero elkartzen da. Saio hauetan "artatzen ditugun pertsonen arretarako irizpide bateratuak adosten saiatzen gara", beharrezko informazioa trukatzearekin batera. "Oso garrantzitsua da elkarlanean ariko diren profesionalak elkar ezagutzea pertsonalki. Horrek elkarlana eta arazoak konpontzea errazten du".

Zainduen taldea
Zaintza behar duten pertsonen lantaldea ere badute. "Zerbitzu ezberdinetan arreta jasotzen duten" eta zaintza behar duten herrikideena da, "lanketa honen guztiaren protagonistak, eta beraz, beraien ahotsa entzutea eta beraien parte hartzea honetan guztian bermatzea ezinbestekoa da". Hala erakusten dute lantalde honetako bilerek. "Batu izan garenetan behintzat ikusi dugu beraien partetik parte hartzeko gogotsu daudela".

Zaintzaile profesionalak
Zainketa behar dutenak eta haien zaintzaileak ere lehentasunezko kolektiboa dira ekosistema honetan. "Ekosistemaren erronka handienetako bat, etxeetan arreta ematen duten zuzeneko langileekin harremantzea eta ekosistemaren logikara ekartzea dela ikusi dugu. Zaintzaile afektiboekin batera, beraiek dira pertsonen bizi-planak eta bizi proiektuak aurrera eramatea posible egingo dutenak", Irisarriren esanetan. Baina, noski, "hau ezin da egin zaintzaile profesionalen eskubideak eta bizi-baldintzak urratuz".

Horregatik, "gu guztion bizitzak erdigunean jartzen dituen zaintza eredu bat sortu nahi dugu, ikuspegi feminista eta antiarrazista batetik". Hala, lantalde hau elkartzeko, saretzeko eta ahalduntzeko Emakumeen Etxea baliatzen dute, bertara "erakarri nahi ditugulako eta haien gune ere egitea, hemen dauden baliabideen berri eman eta emakume hauen herriratzea eta haien arteko sareak sendotzea nahi dugulako". Iraunkortu asmo dituzten formazio saioak iragarri dituzte urte osorako. Autozaintza, gatazkak kudeatzeko estrategiak edota komunitatea eta zaintza harremanak izango dituzte hizpide hitzordu horietan.

Zaintzaile afektiboak
Zaintzaile afektiboekin ere beste bilgune bat osatu dute. Izan ere, "pertsona guztien bizitzak erdigunean jarriko baditugu, ezin ditugu ahaztu hainbeste lan egiten duten zaintzaile afektibo edo familiarrak". Hainbat formazio saio egin dituzte bizi-planen logikara ekartzeko eta baita beste lan guneetan egiten denaren berri emateko, eta honenbestez, "denok norabide berean indarra egiteko".

Lantalde komunitarioa
Azkenik, lantalde komunitarioa aipatu beharra dago. "Gaur egun, herriko lau emakumeek eta gizon batek osatzen dute", Irisarriren esanetan. Hileroko saioetan, "nekea gainditu eta elkar zaintzarako lanetan ilusioz jarduten dute beti", nabarmendu zuen Irisarrik larunbateko ekitaldian. Ondorioz, "egia da proiektuarekin jarraitzeko gogoak berpizten dizkidatela beti. Gainera, maila politikoan eta teknikoan dauzkagun ideiak eta diskurtsoak herriratzen laguntzen didate, jendeak ulertzeko moduan jartzera behartuz. Gauza txiki garrantzitsu horien balioa jabetuarazten didate, eta nola hauek pertsonen bizitzan aldaketa handiak eragiten dituzten. Eskerrik asko ekipo!".

Udalak lantalde hau osatzeko eginiko gonbitari erantzun zionetako bat da Sutegiko ekitaldian hitza hartu zuen Elena Rikondo herrikidea. "Herrian entzuten ari gara, begirada aldatzen saiatzen ari gara eta jasotakoa Maiderri helarazten diogu. Lana da baina erosoa da". Rikondoren esanetan, ez da kasualitatea boskotearen jatorria. "Denak egon gara gaztetatik bolondres taldeetan, batzuk jubilatu dira eta jarraitzen dute lan hori egiten".

Erronka argia dute; "nola lortu sentsibilizatzea, herrian konturatzeko zaintzaren gaiak zer garrantzia duen". Horretarako, azaldu zuenez, "bolondres zorro bat sortu nahi dugu Udalarekin, baina jakin behar dugu zer eskatu jendeari eta zenbat denbora eskatu",  bere esanetan, denbora gutxi baina eraginkorra eskatzeko. Jada zereginotan isilpeko lanean ari direnak eskertu nahi izan zituen. "Eskertu nahi dut isilean bolondres lanean dabiltzanak Egurtzegira joaten, esperientzia eskolakoak akonpainamendua egiteagatik... Isilean jende asko ari da". Taldera animatu zuen jendea. "Emakume asko gara, gizonak animatu nahi ditugu eta baita gazteak ere".