Gasteizko muinorik gorenean topatuta aurkitzen den alde zaharreko jai autogestionatu eta parte – hartzaileak hurbil ditugula, hauen berri emateko aukera ederra da hau. Asko dira honen antzeko adibideak, baina zazpi egunetan zehar auzo honek hartzen duen kolore eta aniztasuna beste edonon ikustea ez da erraza.

Zaharraz Harroko jaiak, auzoko herri mugimendu eta bizilagun ezberdinen arteko asanblada batek bultzatzen ditu. Asanblada eta antolaketaren lan honetara, edozein auzokide dago gonbidatuta, eta beraz, urtez – urte, parte hartzaile berriek egiten dute topo, bakoitzak bere konpromiso mailarekin. Beraz, aurten ere, beste urte guztietan bezala, egitaraua alde zaharreko auzokideez edo berarekin nolabaiteko lotura duten pertsonaz zein kolektiboz osatuta dago.

Hala ere, maila honetako egitarau anitz hau osatzeko ezinbestekoa da auzoko taberna eta komertzio txikien laguntza. Besteak beste, 160 komertzio edota tabernen laguntza lortu dute Zaharraz Harrokoek aurtengo egitaraurako. Auzoko komertzio kopurua hartuta, ia gehienek laguntzen dute jaietan.

Honek guztiak, txosna eta kontzertu erraldoiekin lotutako jai eredua apurtzen laguntzen du, jai eredu tradizionala eta alkoholan oinarrituta dagoen parranda hautsi egiten du. Aurten ere, horrela izango da ekainaren 22tik 28ra bitartean.

Oztopoak oztopo, aurrera

Baina horrelako jai herrikoi batzuk aurrera ateratzeak baditu bere zailtasunak. Askotan hainbeste jende koordinatzea zaila izaten da eta erabaki askok bere denbora behar dute, norbaitek proposatzen duen unetik, guztiek onartzen duten arte. Hain egitarau zabala edukita, hitzaldi batek kontzertu batekin edo antzerki batek eskalada ikuskizun batekin topo egitea ez da batere arraroa, baina material nahikoa eta laguntza nahikoa esparru bakoitzean egotea bermatu beharra dago. Baina gogoekin eta parte – hartzearekin ez dago zeriginik.

Baina horri jazarpen politiko bat gehitzen badiogu, jaiak konplikatu daitezke, bai, baina gehiago batuko da auzoa, ziur. Hala gertatu zen 2012ko ekainaren 30ean, Zaharraz Harroko egitarauaren baitan, auzoko preso eta iheslarien egoera salatu eta hauen senideei babesa eman zien kalejira batekin. Ez zen polizia bertara agertu, baina publiko egindako bideo batzuekin zitazioak hasi ziren etxera iristen, guztira ia 20 urteko espetxe eskaerekin. Guztira hamaika lagun epaitu zituen Audientzia Nazionalak terrorismoa goratzea egotzita, eta bertan aurkitzen ziren, besteak beste, senideak, musika abeslariak edota bertsolariak. Azkenengo hauekin, “Bertsolariak Libre” dinamika sortu zen, zeinetan Euskal Herriko bertsolariek elkartasuna adierazi zieten Iker Pastor eta Jagoba Apaolaza bertsolariei. Azkenean, auzokide guztien babesa jaso ostean bai Gasteizen eta baita Madrilen ere, inputatuak libre geratu ziren.

Eta aurten zer?

Egitarauaz gain, berezitasun handi batekin datoz aurtengo jaiak: hainbeste urtetan zehar lapurtuta eta erabili gabe egon den Santa Maria plaza berreskuratu ahalko dute auzokideek jaietan. Bertan, besteak beste, ehunka lagun batzen dituen bazkari herrikoia egingo da, auzokide bakoitzak nahi / ahal duena eskainiz beste auzokideei bazkari honetan.

Sei esparru nagusi edukiko ditu egitarauak, eta ekintza bakoitza, hauetako batean egongo da kokatuta: dantza, musika, zinea, antzerkia, hitz egin eta eragin, umeentzako ekintzak.

Beste urteetan bezala, eguraldia lagun bada, kalean egingo dira ekintza gehienak, auzoko gune ezberdinak aprobetxatuz aldi berean: parte hartzaile ezberdinek uzten dituzten lokalak edo tabernak, Auzolana pilotalekua, Gaztetxea ..

Zaila da karaktere gutxitan jai hauek laburbiltzea… onena hauetaz gozatzea! Aukera ederra ekainaren 22tik 28rarte Gasteizen, alde zaharrean.

Info +: https://zaharrazharro.wordpress.com/