Alemaniaren tankera hartuta, han Olaf Scholz kantziler sozialdemokratak muga guzti-guztietan polizia-kontrolak ipini baititu, Erresuma Batuan ere ustezko ezkerrak jokoa erosi dio ultraeskuinari: migratzaileen aurkako sarekadak inoiz ez bezala ari da egiten, administratiboki egoera irregularrean daudenak atzeman eta herrialdetik kanporatu asmoz.

Keir Starmer lehen ministroak eta laboristek gainditu egin dituzte Rishi Sunaken eta kontserbadoreen aurreko gobernuak atxilo hartutako eta deportatutako migratzaileen zifrak; %38 igo dira, hori da datu esanguratsuetako bat. Baina garaiaren errepresentazio argiagoa egiten du Alderdi Laboristak atxiloketen eta deportazioen irudiak hedatu izanak. Bitxia da nola egin duten: sareetara igo ditu, iragarkiak balira bezala, Donald Trumpen estilora, guztia antzeztuta balego bezala. Hori da jarraitzen duten eredua: soilik esan egin ordez, erakutsi zertan ari zaren eta nola. 

Dena dela, Alderdi Laboristaren inolako bereizgarri edo errepresentaziorik erabili gabe sareratu dituzte bideoak; aldiz, Erresuma Batuko ultraeskuinaren ezaugarri den turkesa kolore printza batzuk erabilita. The Guardian egunkariaren arabera, Starmerren gobernuak ez du hitzez hitz esan irudiak berak hedatu dituenik, baina ezta ukatu ere. Damutu, behintzat, ez dira damutzen: Yvette Cooper Barne ministroa pozik agertu da atxilotutako migratzaileen kopurua handia izateagatik. Hori gutxi ez, eta aste honetan sarekada batean hartuko du parte Cooperrek.

Sei hilabetetan, 4.000 atxiloketa

Datu gordin eta gizagabeak garaipen gisa saldu dituzte Keir Starmer eta Alderdi Laboristak, ikusi besterik ez dago zabaldu duten prentsa-oharra. Datuak emateko eran, balirudike langabeziaren jaitsieraz-edo mintzo direla.

Horra datu sorta. Iazko uztailaren hondarrean agintera heldu zirenetik, Rishi Sunak eta Alderdi Kontserbadorearen ondotik, ia 4.000 migratzaile atxilotu dituzte; aurreko gobernuak epe berean baino 600 gehiago, %38ko igoera. Bereziki, Starmerren gobernuak nabarmendu duenez, joan den urtarril honetan indartu dituzte sarekadak: Sunaken agintaldiko iazko urtarrilarekin alderatuta, ia bikoiztu egin dituzte atxiloketak –609–, eta 800 gune baino gehiago miatu.

Gobernu berriak, prentsa-oharrean dioenez, sarekadak sistematizatu egin ditu jatetxe eta tabernetan, apaindegietan, estankoetan, autoa garbitzeko lekuetan eta bestelako merkataritza eremuetan. Guztira, ia 5.500 establezimendu miatu dituzte.

Erresuma Batuko gobernuak zera esan du justifikazio gisa: "Egoera irregularrean etortzen diren migratzaileei amets faltsuak egiten zaizkie, lanpostua lortu eta bizi ona izango dutela esaten zaie, baina hori gezurra da, eta bidaia arriskutsuetan murgiltzen dira, talde kriminalek bultzatuta (...) Pertsona gehiegi etorri dira irregularki hona, eta enpresa asko aprobetxatu egiten dira haietaz, egoera zaurgarrian daudelako, esplotatu egin dituzte, eta ilegalki egin dute lan hemen (...) Aurrekari arriskutsuak ezartzen dituzte eta amaitu egin behar da".

Eskuin muturrarekin lehia

Hainbat egunkari britainiarrek diote "frakzioa" dagoela Alderdi Laboristaren barruan, batzuek uste dutela gogorrago jokatu beharra dagoela "migrazio irregularraren aurka", eta beste batzuek, aldiz, "eskuinaren terrenoa" dela hori.

Eskuin muturra ari da bizitzaren kaskartzea kapitalizatzen Erresuma Batuan (ere). Iazko uztaileko hauteskundeak heldu arte, ultraeskuineko politikari puru-purutzat jotzen den Nigel Faragek ez zuen ordezkaritzarik parlamentuan, eta, orain, Reform UK alderdiarentzat –Brexitaren alderdia– ari da botoak biltzen. 

Azken inkesta baten arabera, hiruko berdinketa legoke alderdi bozkatuena izateko laborista, kontserbadore eta eskuin muturraren artean; botoen laurdena jasotzekotan legoke Reform UK. Ez da hauteskunde orokorrik espero 2029ra arte, baina bestelako hauteskunde batzuk badira lehenago eta hor ikusi daiteke lehia.

Sareetan hedatu dute gorrotoa

Ez da kasualitatea Erresuma Batuko eskuin muturreko alderdiaren igoera handia iazko udan abiatzea: uztailaren 29an, Southport hirian, 17 urteko gazte batek hiru neskato hil zituen labankadaz, jaialdi batean, eta une batetik bestera biderkatu egin ziren diskurtso arrazistak eta xenofoboak bereziki sare sozialetan. Magrebtarra omen zen hiltzailea, legez kanpoko egoeran emigratutakoa, han eta hemen zabaldu zuten gerora hiltzailetzat jo ez zen pertsona baten irudia... Hala, abuztuaren lehen astean, milaka pertsona atera ziren kalera, aspaldian ikusi gabeko diskurtso arrazistekin, etorkinen aurkako gorrotoa hauspotzera. Meskitei egin zieten eraso, hainbat etorkin bizi ziren tutoretzapeko etxe eta eraikinei, baita zuriak ez diren bestelako norbanakoei ere. Gerora jakin zen Southporteko hiltzailea ez zela magrebtarra, ezta etorkina ere; baina horrek, ordurako, bost axola izan zuen.

Eskuin muturra pastela jaten ari zaio ezkerrari, eta sare sozialek badute eragina. Esaterako, X-ren jabe Elon Musk publikoki lerratuta dago Reform UK alderdiaren alde. Ez da kasualitatea.

Southport hiriko gertakaria eta gorroto arrazisten oldarraldia abiapuntu, sare sozialei eta eskuin muturrari buruzko LARRUN monografikoa argitaratu genuen urrian. Jarraian, irakurgai: