Silesiako eskualde historikoa hiru herrialdetan banatuta dago: Polonia (lur eremu handiena hartzen duena), Txekiar Errepublika eta Alemania. Bertako herritarrak ordea ez daude talde etniko bereizitzat onartuak. Aitorpen hau ez izateak, Nationalian jaso dutenez, Silesiaren nazio eraikuntzaren alde lan egiten duten eragileak erregistratzea eragotzi eta hauen lana zailtzen du.

Poloniako parlamentariek Gutxiengoen Legea moldatzea beharrezkoa da talde etnikoaren onarpena eraginkorra izateko. Egun ondorengo talde etnikoak daude jasoak Polonian: Lemkoak, erromaniak eta tartariarrak Silesiarrak ez ordea, 850.000 pertsonak haien naziotasuna Silesia zela aitortu arren 2011ko erroldan.

Autonomiaren aldeko zortzigarren martxa

Iragan larunbatean 5.000 lagun atera ziren Katowiceko kaleetara, Autonomiaren aldeko zortzigarren martxan. RAS Silesiaren Autonomiaren aldeko mugimenduak deituta Poloniaren deszentralizazioa aldarrikatu zuten manifestariek, Silesia Garairako autonomia-estatutu bat eskatzearekin batera.

Autonomiaren aldeko martxa urtero egin ohi dute uztailaren 15era gehien hurbiltzen den asteburuan. Data horretan lortu baitzuen Silesia Garaiko eremu batek autogobernurako eskubidea 1920an. Katowice izan zen bertako hiriburua, eta Silesiako herrialde autonomoak parlamentu, lege eta zerga agentzia propioa izan zituen.