Sexualitatea haurtzaroan hasi, eta bizitza osoan zehar,hil arte, daukagula oroitarazi digu: “Gaur egun batez ere hankartearekin edo eta jenitalekin lotzeko joera dugun arren, gorputz osoan daukagu, eta ideia hau nabarmentzea dugu helburuetako bat, honela askoz ere zabalagoa eta anitzagoa bihurtzen delako sexualitatearen kontzeptua, plazera eta ongizatea gorputz osora hedatuaz: Denok gara gizaki sexuatuak, ezin dugu ez izan. Gure harremantzeko modu guztiak sexualitatea dira”, adierazi du. Pandemia dela-eta hartu diren neurriek sexualitatean ere eragina izan dutela dio. Batetik, nerabezaroan sexu hutserako harremanak orokortu direla azaldu du, distantzia sozialak eta jende berria ezagutzeko mugek sare sozialen erabilera azkartu baitute harremanak abiatzeko eta ligatzeko: “Sare sozialen bidez geratzen dira, sexu harremanak izateko soilik. Eta hor amaitzen da harreman hori. Ez dira harreman landuak. Lehen ere baziren horrelakoak, baina orain unibertsalizatzen ari dira, ia guztiak horrela harremantzen dira. Instagram bidez geratu, bideodei bidez sexu harremanak izan...”.

Sexu beharra denok dugula eta pandemian harremantzeko moduarekin “deskarga” bilatzen dela azaldu du: “Orgasmoa bilatzera mugatzea, azkartasuna, hori ari gara sustatzen. Baina gorputzak azala behar du, sexualitatea hori ere bada, ez da sarketa bakarrik. Eta hori falta da, harreman hori, ligatzeko modu hori, lasai hitz egitea, partekatzea...”.

Pandemian pantailen erabilera neurriz kanpokoa izanik, pornografia ikusteko joera ere asko hazi dela azaldu du. Ume askok ere egunero kontsumitzen du pornografia, eta helduen begirada behar dutela oroitarazi du: “Ez gaude pornografiaren aurka, baina hobe da gurasoek hitz egitea ikusten ari direnaz, hor agertzen dena ez dela egia azaltzeko eta kritikoki ikusteko”.

Bi muturrak, hipermasturbazioa eta asexualitatea

Masturbazioa areagotzen ari dela azaldu du: “Gure tailerretan, mutil batek galdetu zigun egun batean hamahiru aldiz masturbatzea ‘normala’ al den. Guk argi esaten dugu ‘normala’ hitza ez dagoela sexualitatean. Normala dela haur eta nerabe bat masturbatzea, eta ez masturbatzea ere bai. Zergatik bilatzen du nerabe batek egun batean behin baino gehiagotan masturbatzea?” galdetu du Ziarsolok, eta jarraian bere erantzuna eman du: “Ez dagoelako lasai. Tentsioan dagoelako. Gorputzak distentsioa bilatzen du eta masturbazioaren bidez lortzen dute. Ez da plazera, deskarga bat da. Galdetzen diegu ea zergatik masturbatzen diren egunean 3-4-5 aldiz, eta batek bota zidan erantzunak hotz utzi ninduen: ‘Triste nagoelako, bakarrik ordu asko nagoelako, ez dakidalako zer egin, besterik gabe... a! eta plazerra ematen didalako’”.

Klasea bukatzean ikasleak beren kezkekin etortzen zaizkie eta ikasturte honetan askotan asexualitatearen gaia agertu zaiela esan du Ziarsolok: “‘Ez daukat gogorik ez neure buruarekin ez beste batekin’ esaten digute nerabeek, orain arte ez zaigu agertu eta aurten bai. Desio sexualik ez. Apatia da, besteekin ezin dudanez egon, eta ez harremantzeagatik, bada ezta nire buruarekin ere”. Familiarekin denbora asko egoteak ere bere eragina izan dezakeela azaldu du: “Behar bada ez dago intimitaterik etxean, eta nerabe batek behar du bere gelak pestilloa izatea. Ez badu hori, ez du esploratzeko momenturik, ez bakarrik egotekorik”.

Sexualitatea ere higienizatzen

Garbitasun ohiturak handitu ditugu aurten, batetik eskuak etengabe gel hidroalkoholikoz garbituta, bestetikk ukitutako oro desinfektatuz... Ziarsoloren arabera, “sexualitatea higienizatzen ari da. Ez diogu uzten gure buruari ilerik edukitzen, ezta genitaletan ere. Bai gizon eta emakumeetan gorputz osoko depilazioa gero eta ohikoagoa da. Zergatik? Geldetzen dugu eta ‘ilea anti-higienikoa delako’ erantzuten dute. Alderantziz! Ileek genitaletan duten funtzioa babestea da!”.

Nazka fluxuekikoa ere bada: “Gorputzeko fluxuak, adurra, izerdia... gauza zikin bat bezala ikusten dira. fluxu bajinalaz, hilerokoaz... hitz egitean nazka agertzen da. Oso esterilizatuak ari gara bihurtzen. Gure gorputzari eta gurekin dagoen pertsonari eskatzen diogu guztiz aseptiko izatea. Harremantzeko modu hori ari gara ikusten”.