Blogerako artikuluak, eztabaidatzeko foroa edota euskaraz elkar txiokatzeko Twitter zerrendaz gain, saskibaloiaren inguruan topaketak antolatuko dituela kontatu digu.

Euskarazko kazetaritzan saskibaloiaren alorrean hutsune handia dagoela nabaritu duzu?

Bai, hala da. Altxor ezkutu batzuk izan arren, Danel Agirreren “Saski da” esaterako (Berria egunkarian), saskibaloia sakontasunez jorratzen duen hedabiderik ez dut aurkitzen. Gaztelaniaz hamaika solasaldi entzun daitezke eta egunkarian bi orrialde egunero irakurgai ditugu, baina euskaraz horrelakorik aurkitzea oso zaila da.

Zerk bultzatu zaitu “Baskonia en vena” ekimenari buelta bat eman, eta Baskonia Zainetan sortzeko?

“Baskonia en vena” bloga 2006an ireki nuen, gaztelaniaz. Garai hartan sare sozialak ez zeuden horren garaturik eta blog formatua oso ona zen eztabaidak sortu eta elkarri eragiteko. Gaur egun egoera guztiz aldatu da. Saskibaloia euskaraz bizitzeko aukera eskaintzen dituzten hutsune horiek jorratu nahi ditut.

Zein da zure ekimen berriaren hasiera bateko helburua?

Helburua ez da blog bat edo foro bat sortzea soilik. Nahiko apala naiz, baina helburua anbizio handikoa da. Gasteizen euskara maitatzen dutenetariko askok, Baskonia, Araski edo Araberri taldeak jarraitzen dituzte astero. Helburua komunitate berri bat sortzea da, non saskibaloia eta euskara bateragarriak diren. Komunitate horri ikusgaitasuna eman nahiko nioke.

Sare sozialetan komunikatzerakoan euskaldun ugari gaztelania erabiltzera beharturik ikusten diren inpresioa duzu?

Bai, zalantzarik gabe. Euskaraz idazten duten zale asko ez ditugu ezagutzen, eta beste askok euskara badakite, baina guk ez dakigu beraiek badakitenik. Baina hori ez da larriena. Euskaraz idatziz gero jarraitzaile gutxiago izango dituztela uste dute zale askok, egia ez bada ere.

Zein aukera eskaintzen ditu Internetek saskibaloiaz informatzeko, ohiko komunikabideek  ez dituztenak eskaintzen?

Internet McDonalds bat bezalakoa da. Gose bazara, sartu eta erraz asetzen zara. Mugikorrean bertan aurki ditzakezu azken berriak, fitxaketak edo denetariko iruzkinak. Baina lasaitasunez eta sakon irakurtzeko edo entzuteko ez du balio. Internetek eskaintzen duena azkartasuna da, batzuetan zerbait gehiago beharrezkoa da gauzak behar bezala ulertzeko.

Zein iritzi duzu komunikabideek saskibaloiari eskaintzen dioten arreta urriaren inguruan?

Futbolak dena estaltzen du, baita Euskal Herrian ere. Hedabideek beti daukate denbora futbolari buruz eztabaidatzeko, eta horrek oso leku gutxi uzten die beste kirolei. Saskibaloia gaizki dago, baina ezin gara kexatu. Begira ezazu nola dauden beste hainbat kirol, eskubaloia, errugbia edo boleibola esaterako. Hala ere, saskibaloiak hedabideetan eta kalean merezi duen tokia izateko borrokan jarraituko dut.

Saskibaloiaren inguruan informazioa euskaraz zabaldu eta elkarbanatzeko erreferente izan nahi duzu, beste batzuek ohitura horiek aldatzeko asmoarekin?

Erreferentea izatea handiustekoa litzateke. Baina bai, nire alea jarri nahiko nuke eraldaketa horretan. Etorkizunean euskararen erabilera asko haziko delakoan nago, baita saskibaloi munduan ere.

Araski, Araberri eta Baskoniaren berri emango duzu bereziki, baina nola ikusten duzu Arabako saskibaloiaren osasuna gaur egun?

Osasunez oso ongi dago. Baskonia talde itzela da. Urte batzuetan hobeto eta beste batzuetan okerxeago, baina beti dago talde handienen artean. Araskiren kasuan, egitasmo sendoa eraikitzen ari da, Livia Lopez kudeatzaile bikainaren eskutik. Emakumezkoen lehenengo mailan finkatu dela dirudi. Araberrik aldiz, zailtasun handiagoak ditu. Oso talde gaztea du eta taldea aurrera ateratzeko zailtasun ekonomikoak gainditu behar ditu urtetik urtera. Hala ere, urrezko LEB ligan mailari eutsiko diola uste dut.

Talde hauen komunikazio sailetan sustatzen al da euskararen erabilera sare sozialetan?

Zoritxarrez, oso gutxi. Bakarrik Baskoniak du euskarazko Twitter erabiltzaile berezi bat, baina gaztelaniazkoarekin alderatuta oso mezu gutxi bidaltzen ditu. Gaur egun, gaztelania eta ingelesa dira nagusi, baina datozen urteetan gauzak aldatuko direlakoan nago. 

Emakumeen saskibaloi taldeak bultzatzen dira?

Bai, eta asko gainera. Nire adibide gertukoena Araski bera da, baina gure alboan Lointek Gernika (sare sozialetan euskara bultzatzen asko saiatzen da) eta IDK Gipuzkoa ere badaude erreferente bezala. Emakumezkoen saskibaloi taldeen olatua bultzatzeko euskal hedabideek zer esana badutelakoan nago. Aurten Gasteizen jokatuko den Erregina Kopan esaterako, euskarak paper garrantzitsua izatea espero dut.

Araskiren orain arteko denboraldia nola kalifikatuko zenuke? Eta Araberrirena?

Araskirena, oso ona. Askotan ez gara objektiboak talde honekin. Ez dugu barneratu oraindik, duela bi urteko igoera balentria latza izan zenik. Jokalari kopuruz talde motza dauka, baina oso ondo hasi zuen denboraldia. Binta Drammeh jaurtitzailearen fitxaketa berriarekin pausu bat aurrera ematea espero dut. Araberrik aldiz, sufrituko du. Taldearen xedea mailari eustea da, eta zaila izan arren, helburua gauzatzea bere eskura du.

Lauko Finalaren lehian ikusten al duzu Baskonia?

Zoritxarrez, ez. Talde ona du eta Top-8aren lehian ikustea nahiko nuke, baina Lauko Finalean egoteko ez dauka aurrekontu nahikorik. Orain fitxaketa bat behar du ezinbestean, baina berandu helduko den beldurra dut. Hala ere, Baskoniarekin, batek daki!

Baskoniaren azken urteetako denboraldi garrantzitsuenean, fitxaketak egiteko diruz eskas daudela dirudi. Nola daramazu fitxaketen behar larrian izanik, inor ez dela iristen ikustea?

Egia esateko, ez dut ongi ulertzen. Denboraldia aurrera doan heinean, gero eta talde laburragoa dugu eta taldeko zuzendaritzak ezer egin gabe jarraitzen du. Ziur asko azalpen bat (edo gehiago) egongo da, baina zaleak urduri jartzen ditu horrek. Azkenean fitxaketaren bat etorriko da, baina denboraldiko helburuak betetzeko beranduegi izan liteke.

Etxeko jokalariak lehen taldeetara igotzeko aukerak ikusten dituzu?

Oso zaila izan da betidanik eta Baskoniaren kasuan bereziki. Lehenengo taldera heltzeko, oso ona izatea ez da nahikoa. Agian Ilimane Diop izan da Baskoniara heldu den etxeko azken jokalaria eta ez dut besterik ikusten jauzia emateko prest. Araberrik Baskoniak duen hutsune hori bete zezakeen, baina hauek ere atzerritar ugari ekartzen dituzte. Araskik ordea, aukera gehiago eskaintzen ditu. Horra hor, Laura Pardo, Cristina Molinuevo edo Made Urieta adibidez.