Hamasek su-etena onartuko zuela zioten ahotsen artean, Rafah bonbardatzen hasi da Israelgo Armada, eta Rafah-ko pasabidearen kontrola hartu du bart. Ordu batzuk lehenago Rafah ekialdea ebakuatzeko eta jadanik jendez lepo dagoen Khan Yunisera joateko agindua eman diete sionistek bertan dauden ehunka mila pertsonei. 1,4 milioi pertsonak hartu behar izan dute babesa Rafah-n azken hilabeteetan, 64 kilometro koadrotan, Gazako beste zonaldeetatik ihesi. Azken bonbardaketek hamarnaka palestinar hil eta eraikin ugari suntsitu dituzte.

Rafah ekialdea bereziki garrantzitsua da. Egiptorako igarobidea dago bertan, laguntza humanitario urriaren zati handi bat bertatik aritu da sartzen eta, bestalde, Rafah-ko ospitale nagusia eta osasun zerbitzu gehienak daude ekialdean. Astelehen gauean Israel indarrez sartu da, eta Egiptorako pasabidea ere tankeen kontrolpean geratu da, beraz, giza laguntzaren sarbidea itxi dute. Unicef Haurren Laguntzarako Nazio Batuen Funtsak ohartarazi du Rafah-n dauden 600.000 haurrek “ez dutela nora joan”, eta indarrez ez lekualdatzeko eskatu du.

Su-eten proposamena

Rafah-ren aurkako azken erasoa abiatu eta gutxira heldu da Hamasen onarpena. Qatar eta Egiptok egindako su-eten proposamena onartu dutela jakinarazi du Ismail Haniyeh Hamaseko buruak. “Orain pilota Israelen teilatuan dago”. Ez da ziurra akordioa lortuko denik, proposamen horrek su-eten iraunkorra aipatzen baitu, Israelek marra gorri gisa jarri izan duena azken asteetan. Estatu sionistaren ordezkariek adierazi dute Hamasek onartutako proposamena aztertzen ari direla, baina Israelgo iturriak hasi dira jadanik esaten onartezina dela. Hamasek onarpena jakinarazi ondoren, ehunka pertsona atera dira Rafah-ko kaleetara, erabakia ospatzera.

Khalil al-Hayya Hamaseko mahai politikoko kideak proposamenaren xehetasunak eman dizkio Al Jazeerari. Azaldu du Egipto eta Qatarren proposamenak hiru fase izango dituela, bakoitza 42 egunekoa. Lehen fasean, su-etena abiatuko litzateke. Bestalde, bitartekarien bidez preso eta bahituen trukea egingo lukete bi aldeek. Tropa israeldarrak Gazako zonalde batzuetatik aterako lirateke, iparraldea eta hegoaldea banatzen dituen Netzarim korridoretik, esaterako, eta lekualdatzera behartutako familien itzulera ahalbidetuko litzateke. Gainera, laguntza humanitarioa eta erregaia sartzeko bidea zabaldu beharko luke Israelek.

Bigarren fase batean, al-Hayyaren esanetan, su-eten iraunkorra onartuko litzateke, eta baita Israelgo indar armatu guztiak Gazatik ateratzea ere. Iturri batzuen arabera, hirugarren fasean Gazaren aurkako blokeoa ere amaitu beharko litzateke. Zaila dirudi Israelek proposamena dagoen moduan onartzea, ikusteko dago zer erantzuten duten.

Netanyahuri presioak Israelen

Gazan bahituta egondako sei pertsonak eta oraindik bahituta daudenen familiek eskutitz bat bidali diete Israelgo agintari batzuei, Netanyahu lehen ministroaren aurka eginez. Rafah-ko erasoak aginduta bahituak heriotzara kondenatu izana leporatu diote, eta su-eten negoziaketei buruz “egia” esateko eskatu diete agintariei. Azken asteetan, gainera, manifestazio jendetsuak izan dira Tel Aviven gobernuaren aurka. Presoak trukatzeko akordio bat exijitu diote gobernuari, eta baita hauteskundeak deitzea ere.

Baina Netanyahuk eskuineragotik ere izan du presioa. Itamar Ben Gvir Botere Judua alderdiko buru eta Israelgo Segurtasun ministroak, adibidez, mehatxu egin zion Netanyahuri, bere alderdiaren babesa galduko zukeela ez balitz Rafah-n sartzen eta Hamasekin su-eten akordio bat egingo balu. Lehen ministroak alderdi ultraeskuindar sionisten babesa ezinbestekoa du gobernuan jarraitzeko. Rafah kontrolpean hartuta, Ben Gvir-ek esandakoa bete dute.

Bigarren Mundu Gerratik eman den suntsiketarik handiena, NBEren arabera

Israelek Gazan eragindako sarraskiari buruzko txostena eman du argitara Nazio Batuen Erakundeak. Ohartarazi du Gazaren aurkako oldarraldia orain amaituko balitz, berreraikitze lanek hamasei urte iraungo luketela, 2040. urtera arte. Lurralde osoa berreraikitzearen kostua 40 mila milioi dolarretan kalkulatu du txostenak. 37 milioi tona hondakin dago Gazan, 300 kilogramo kilometro koadroko.

Urriaren 7tik etengabe jaurti ditu lehergaiak Israelek Gazako biztanleen aurka, eta 34.735 pertsona baino gehiago hil ditu, Al Jazeerak jaso dituen Gazako Osasun Ministerioaren azken datuen arabera. Hau da, Gazako biztanleriaren %5. NBEk salatu du “aurrekaririk gabeko heriotza kopurua” dela hori, hain denbora laburrean. 78.018 pertsona baino gehiago daude zaurituta, eta desagertuta daude 8.000 baino gehiago.