Gasteizko PPko kide Gustavo Antépara: obra “klandestinoak” legez kanpoko pisu turistikoetan ikerketa erreportajea argitaratu zuen esklusiban ARGIAk apirilaren 25ean. Hainbat hedabidek jaso zuten bere edukia hurrengo egunetan. PPk Antépararen errugabetasuna defendatu du, eta hori frogatu nahian Antéparak berak alderdiaren eskutan utzi dituen dokumentuak erakutsi dizkie horrela eskatu duten kazetariei, tartean ARGIAri. ARGIAk, bere aldetik, Antéparak emandako informazioa faltsua dela frogatzen duten dokumentuak erakutsi dizkio PPri. Alderdiak, hala ere, Antépara babesten jarraitzeko hautua egin du.
Apirilaren 27an deitu zuen ARGIAk PPren Gasteizko egoitzara, eta alderdiaren komunikazio arduradunarekin hitz egin zuen. Komunikazio arduradunak Antéparak alderdiari eman dizkion azalpenak helarazi zizkion ARGIAri, ustez PPko politikaria errugabetuko luketenak. Bi dira argudio nagusiak.
Batetik, PPk eta Antéparak diote Luxury enpresari irekitako hiru espedienteen ardura osoa udalarena dela, dagokion departamentuak “txarto” komunikatu omen dituelako notifikazio guztiak (Baieztapen horren faltsutasuna hurrengo artikulu batean jorratuko dugu, dokumentuekin eta espedienteak ireki dituen udal departamentuaren langileen lekukotasunekin lagunduta).
Bestetik, Antéparak Luxuryrekin duen lotura bakarra “zenbait partizipazio” direla dio PPk. ARGIAk zabaldutako informazioaren aurka, komunikazio arduradunak ziurtatu zuen Antépara ez dela Luxury enpresako presidentea, eta ez dela inoiz izan. Horrez gain, ziurtatu zuen Antéparak ez zuela utzi enpresaren administratzaile bakar kargua 2022ko uztailean, ARGIAk argitaratu moduan, baizik eta 2019an (hau da, Luxuryk “obra klandestinoak” egin eta legez kanpo hainbat pisu etxebizitza turistiko bezala esplotatzeari hasi aurretik). Azken hori frogatzen duten bi dokumentu dituela azaldu zion ARGIAri, eta horiek erakusteko prestutasuna agertu. Maiatzaren 3an ikusi zituen dokumentu horiek ARGIAk, Gasteizko PPren egoitzan. Ordurako, PPk dokumentu horiek erakutsiak zizkion gutxienez aferagatik interesa agertu zuen Gasteizhoy-ri, eta hedabide digitalak ARGIAren informazioa zein PPren dokumentuak aipatu zituen berri batean.
ARGIAk zabaldutako informazioaren aurka, PPk ziurtatzen du Antépara ez dela Luxury enpresako presidentea, eta ez dela enpresaren administratzailea 2019tik (Luxuryk legez kanpoko jarduerak egin aurretik)
PPren eta Antépararen dokumentuak
Bi idazki erakutsi dizkio PPk ARGIAri (kopiak egiteko edo argazkiak ateratzeko baimenik eman gabe). Batetik, 2019ko uztailaren 1eko data duena, Ángel Fernández-Reyes notariokoa. Idazkian jasotzen dira ordura arteko administratzaile bakarraren kargugabetzea (Gustavo Antépara) eta berriaren izendapena (Pilar Perosanz, Arabaturreko presidentea). Komunikazio arduradunaren arabera, idazkia 2019an egin arren ez da merkataritza-erregistroan aurkeztu 2022ko urrira arte. Hiru urteko atzerapenaren zergatiari buruzko azalpenik ez du eman PPk.
Bigarren dokumentua, hain zuzen ere, 2019ko idazkia 2022an merkataritza-erregistroan aurkeztu zenekoa litzateke. PPk esandakoaren aurka, ordea, bigarren dokumentu horrek ez du 2019koarekin loturarik: beste notario bati egiten dio aipamena, eta zehazten du Luxuryren administratzaile aldaketa 2022ko uztailaren 1eko batzar orokor batean erabaki zela, ARGIAk argitaratu zuen moduan. ARGIAk ziurtatu dezake 2019ko notarioaren idazkia ez dela inoiz merkataritza-erregistroan erregistratu.
ARGIAren dokumentuak
ARGIAk Luxury enpresaren merkataritza-erregistroko memoria eskuratu du, publikoa dena, eta PPren baieztapenak ukatzen ditu erabat. Erregistroko dokumentuen arabera Antépara izan da enpresaren administratzaile bakarra 2000ko hamarkadan sortu zenetik; ardura hori Antéparari kendu eta Pilar Perosanzen eskutan utzi zuen Luxuryren Batzar Orokorrak 2022ko uztailaren 1ean; eta erabakia urte bereko urriaren 17an erregistratu zuen María Concepción Granado notarioan (ikusi albistea irekitzen duen argazki-dokumentua).
PPk aurkeztutako bigarren dokumentuarekin bat egiten du erregistrokoak beraz, baina lehenaren balioa ezeztatzen du. ARGIAk Ángel Reyes-Fernández notarioari eskatu dio 2019ko dokumentu hori ikustea, edo ikusi ezean existitzen dela baieztatzea. Notarioan azaldu diote datuen babeserako legeak ez duela horrelakorik baimentzen, baina, dokumentua 2019an erregistratu izan balitz ere, ez lukeela baliorik merkataritza-erregistroan aurkeztu ez bada, eta erregistroan ez dago bere arrastorik.
Merkataritza-erregistroan Luxuryk aurkeztu dituen dokumentu ofizialek PPren eta Antépararen baieztapenak ukatzen dituzte erabat
Bada faltsukeria agerian uzten duen bigarren dokumentu bat ere. 2020ko maiatzean, hau da PPren esanetan Antéparak administratzaile kargua utzi eta urtebetera, enpresak izena eta helburu soziala aldatu zituen, egun mantentzen duen Luxury izena hartzeko: erabakia Gustavo Antéparak sinatu zuen, “Sozietatearen izenean eta ordezkari gisa arituz, Sozietatearen Administratzaile Bakar bezala” (ikusi beheko dokumentua).
Azkenik, ARGIAren galderari erantzunez, PPk ziurtatu du Antépara ez dela Luxuryren presidentea, eta ez dela inoiz izan. 2023ko martxoan 2020 eta 2021 urteetako kontuak aurkeztu ditu Luxuryk merkataritza-erregistroan. Horrela dio ziurtagirietako batek: “Sozietatearen akta liburutik, legalki nire ardurapean, hurrengoa ondorioztatzen da: 1.- 2022ko ekainaren 30ean Sozietatearen Ohiko Batzar Orokorra bildu zela (...) 3.- Aho batez hartu ziren honako erabaki hauek: a) Gustavo Antépara Benito presidente izendatzea, eta Pilar Perosanz Lozano idazkari”. Ziurtagiriak 2023ko otsaileko data du, eta Pilar Perosanzek sinatua dago (ikusi beheko dokumentua). Finean, Antépara 2022ko ekainaren 30ean izendatu zuten Luxuryren presidente, eta egun bat beranduago utzi zuen administratzaile bakarraren kargua, Pilar Perosanzek hartu zuena.
Frogen gainetik PPk Antépara babesten jarraitzen du
Dokumentu horiek guztiak paperean erakutsi zizkion ARGIAk PPko komunikazio arduradunari maiatzaren 3an, eta honek informazioa “alderatu” behar zuela adierazi zuen. ARGIAk azaldu zion bere eskutan duen informazio hori argitaratuko zuela hurrengo egunetan, eta bi egunen epean PPk ARGIAri bestelako posizio bat helarazi ezean, ulertuko zuela alderdiak Antéparak emandako argudio eta dokumentuak ontzat ematen jarraitzen duela. PP ez da ARGIArekin harremanetan jarri ordutik.
PPk baloratzen ez duena
ARGIAk argitaratutako informazioaren zati batez informazio faltsua eman dute PPk eta Antéparak. Baina aspektu garrantzitsuenen inguruan ez dute adierazpenik egin.
ARGIAk hainbat aldiz galdetu zion PPri ea Antéparak azalpenak eman dizkion alderdiari hainbat etxebizitza pisu turistiko bezala esplotatzeagatik derrigorrezko lizentzia izan gabe. “Ez dugu baloratuko”, adierazi zuen azkenik komunikazio arduradunak.
ARGIAk argitaratutako informazioaren zati batez informazio faltsua eman dute PPk eta Antéparak. Baina aspektu garrantzitsuenen inguruan ez dute adierazpenik egin
ARGIAk galdetu zion ea PPk ez duen interes gatazkarik ikusten Antépararen jardueran: 21 Zabalguneko administrazio kontseiluko kide da PPren ordezkari bezala (bertan hartzen dira Gasteizko hirigintza arloko erabaki nagusiak); etxebizitza turistikoen araudia aldatzeko lobby lana egiten ari da Arabatur elkartearen bitartez; presidente den enpresak etxebizitzak turistikoak legez kanpo esplotatzen ditu. “Ez dugu baloratuko”, erantzun zuen.
Azkenik, ARGIAk galdetu zion ea PPk baloratu duen aukera Antépara 21 Zabalgunetik ateratzekoa, edo maiatzeko hauteskundeetako zerrendetatik kanpo uztekoa (zazpigarren postuan doa Gasteizen, hamalugarrenean Araban). Ezetz erantzun zuen PPko komunikazio arduradunak.
Munduko bigarren gizonik aberatsena, Elon Musk, gezurrak eta mezu sektarioak hedatzen, propaganda egiten ari zaio Donald Trumpi, inkestek gero eta gehiagotan diotenean Kamala Harris izango dela AEBetako hurrengo presidentea.
Kataluniako erkidegoko azken hauteskundeetatik eta Europako Parlamenturako bozen emaitzetatik abiatuta, presio turistiko handiena bizi duten Herrialde Katalanetako herrietan eskuin muturraren botoak nola egin duen gora aztertuko dugu artikulu honetan.
Martxoaren 5ean zabaldutako auto batek armarria “kentzea edo ezabatzea” agindu zuen, “jarrera politiko baten aldeko posizionamendua” dela eta “neutraltasun politikoaren aurka” egiten duelako. UPNk jarri zuen salaketa, eta Atarrabiako alkate... [+]
UPNk mozioa aurkeztu du Tafallako udalbatzan gobernu taldeari eskatzeko bertan behera utz dezala Raimundo el Canastero musika taldearekin zuen kontratua jaietan kontzertu bat egiteko. Lizarrako jaietan izandako polemikaren ondoren etorri da zentsura eskaera. PSN batu zaio... [+]
Kultura eta Hizkuntza Politikako sailak nagusiki gaztelania darabilten hedabideetan "euskarazko albisteak areagotzeagatik" diru-laguntzak banatu ditu beste urte batez. Ia milioi bat euro banatu dute Noticias, Gara eta Vocento hedabide taldeen artean, artikulu batzuk... [+]
Ertzaintzak ertzain bat atxilotu du, hiru pertsona hiltzen saiatzea egotzita. Agentea lan orduetatik kanpo zegoen, eta deklaratu zuen bere buruaren defentsan egin ziela tiro furgonetan zihoazen ustezko hiru lapurri. Ertzaintzaren ikerketaren arabera, gezurra da deklaratu duena.
Venezuelan dauden Askapena talde internazionalistaren brigadistekin hitz egin du ARGIAk, hauteskundeen osteko egoeraz eta etorkizunaz.
“Herriaren eta beren familien alde” jartzeko eskatu diete Edmundo Gonzálezek eta María Corina Machadok adierazpen bateratu baten bitartez. Maduroren gobernuak erantzun egin die, eta erabaki dute dokumentuaren sinatzaile biei “ikerketa penala... [+]
Protestak uztailaren 29an Southport-en izandako erailketen ondorioz piztu ziren, hilketa leporatu dioten gazteaz informazio faltsua zabaldu ondoren. Erresuma Batuko lehen ministro Keir Starmer-ek “krimen antolatua” izan dela salatu du, eta atxilotutakoek... [+]
Espainiako Poliziaren sindikatu nagusiarekin egindako akordio baten arabera, eskuin muturreko taldeak "defentsa pertsonaleko formakuntza" eskainiko die 30.000 agenteri.
Bakio, Laida, Lekeitio, Mutriku, Orio eta Donostian egin dituzte Etxeratek urtero antolatzen dituen hondartzetako mobilizazioak. Aurten Sare Herritarra batu da aldarrikapenera.
Xabier Zabaltza Perez-Nievas historialaria, idazlea eta EHUko irakasleak 'Euskal Herria heterodoxiatik' izeneko liburua plazaratu berri du. Bertan dio Euskal Herria ezinbestean euskara eta euskal kulturaren bidez eraiki behar dela eta horretarako funtsezkoa dela euskara... [+]
Udaltzaingoak ostegunean deklaratzera deitu du Raimundo el Canastero taldeko abeslaria, Lizarrako jaietan txosnak debekatzearen aurka sareratu duten abestiagatik. Ondoren, aske utzi dute, baina ikerketak aurrera jarraituko du. Sarean zentsuraren aurkako eta elkartasun mezuak... [+]
Txosnen eledun Eider Castañedaren hitzetan, Marta Ruiz de Alda alkate erregionalistak "autogestioarekin, jai herrikoiekin, euskararekin, feminismoarekin zerikusia duen espazio oro debekatu nahi du".
Urriaren 7tik azaroaren 4ra bitartean, milaka profil eta eduki ezaba zitzatela eskatu zieten sionistek hainbat plataformari. Eskaeren %60 izan ziren Meta taldeari, eta horien %94 bete zituen enpresak.