Apirilaren 29ko bazkalostean, Gaztetxearen 35. urtemugaren ospakizun betean, Udaltzaingoa etxe okupatura sartzen saiatu zen, adieraziz gauerako iragarrita zegoen kontzertua ezin zela egin, Gaztetxeak ez duelako horrelako jarduerak egin ahal izateko lizentziarik –35 urte dira lizentziarik gabe ari dela jardunean–. Gaztetxetik salatu zutenez, poliziekin hitz egitera hurbildu zen soinu teknikari eta asanbladako kidea “bortxaz lurrera bota eta jipoitu” egin zuten udaltzainek. Iragarritako kontzertuarekin aurrera egitekotan “guztiarekin sartuko gara eta eta zaurituak izango dira”, egin zuten mehatxu poliziek, Gaztetxearen esanetan. Erasoa salatzeko kontzentrazio jendetsua egin zuten arratsalde hartan bertan; aurreikusitako kontzertuak mantendu zituzten, eta Polizia ez zen bertaratu.

Apirilaren 28an, egun bat lehenago, Ertzaintzak auzoko Santo Domingo kaleko okin bat atxilotu zuen, Yaser izenekoa, ogia banatzeko furgoneta okindegi parean aparkatu zuenean. Poliziaren arabera, 22 urteko langile arrazializatuak “aurre egin” zien dokumentazioa eskatu ziotenean. Familiak, aldiz, ertzainen hasieratiko jarrera bortitza eta Yaserri emandako jipoia salatu zuen. Okindegi berean lan egiten duten Yaserren anaiak, aitak eta lehengusuak ere Poliziaren kolpeak jaso zituztela adierazi zuten. Ertzaintzaren zein Udaltzaingoaren hainbat patruila bertaratu ziren okindegira, eta kale osoa moztuta egon zen denbora batez.

 

Aspaldiko arazoa

Poliziaren jarduerarekiko kritikak aspaldikoak dira Gasteizko Alde Zaharrean, baina azken hilabeteetan presentzia eta esku-hartzeak areagotu direla adierazi diote ostiraleko mobilizazioaren antolatzaileek ARGIAri. Azaldu dute, adibide gisa, Udaltzaingoak “hilabeteak” daramatzala “Gaztetxearen jarduerak oztopatu nahian”, eta ez dutela etenik “Poliziaren erasoek, bereziki auzokide arrazializatuen aurka”. Ohikoa da Ertzaintzaren edo Udaltzaingoaren autoak auzoan zelatan ikustea, maiz zirkulazio arauak urratuta. Auzokide arrazializatuen elkargune nagusietakoa den Aldabe plazan etengabea da patruilen presentzia, eta ohikoak dira kontrol fenotipikoak –azalaren kolorearen araberakoak–.

Polizia eta segurtasun eza

Egoera berria ez bada ere, azken asteetan, hauteskunde kanpainaren testuinguruan, oihartzun politiko eta mediatiko handia hartu dute Poliziak Alde Zaharrean burutu dituen zenbait esku-hartzek, “segurtasunaren” eta Polizia gehiagoren aldarriek lagunduta. Antolatzaileek azpimarratu dute Alde Zaharra Poliziaren presentzia “handienetakoa” duen auzoa dela, eta Euskal Herriak jarraitzen duela izaten “biztanleko Polizia gehien duen lurraldea Europar Batasunean”. Segurtasunarekin ez, segurtasun ezarekin lotu dute Polizia: “Salatu nahi dugu Poliziak ez duela segurtasunik ekartzen Alde Zaharrera, eta, aldiz, auzokide askoren segurtasunik eza elikatzen duela”.

Deialdi zabala eta askotarikoa

Hamarnaka eragilek eman diote babesa manifestazioari, eta azpimarratzekoa da aniztasuna: Adurtzako Gazte Asanblada, Ariznabarra Berpiztu, ASME Asociación Sociocultural Mauritania Euskadi, Auzoan Bizi Etxebizitza Sarea, Batuta Elkarlaguntza Sarea, Ernai Gasteiz, Errekaleor Bizirik!, Errota Anitza, Errota Zaharra Auzo Elkartea, Gasteiz Txiki Auzo Elkartea, Gasteizen Inor Ez Etxerik Gabe, Gasteizko Askapena, Gasteizko GKS, Gasteizko Mugimendu Feminista, Gasteizkoak talde antimilitarista, Gasteizko Gaztetxea, Herrizoma Elikadura Sarea, Jardun Koordinadora, Judimendiko Gazte Asanblada, Kontseilu Sozialista Gasteiz, Kutxiko Taskeroak, Ongi Etorri Errefuxiatuak Gasteiz, SOS Racismo, SUmendi Espazioa, Txapa Ahotsa asanblada, Zaharraz Harro eta Zapateneo.