Nola ikusten duzu aurten Jaizkibel konpainia?

Urtetik urtera gero eta konpainia handiagoa gara, osasuntsu eta bizirik dagoen konpainia den seinale, gero eta jende gehiago biltzen duena. Eta konpainia ez da bakarrik barruan goazenak, kanpoan daudenak ere osatzen dute konpainia eta aurtengo entseguetan ikusi dugu bizi dagoela kalea, irailaren 8 potentea aurreikusten dugu.

Alarde tradizionalaren baitatik sortu dira bai Guztion Alardea elkartearen proposamena, bai Saindua taldearena, alardean emakumeen parte-hartzea eskatuz.

Ikusten dugu gero eta leku ezberdin gehiagotatik ondorio berera iristen garela: emakumeek festetan gizonen pare hartu behar dute parte. Beti dira positiboak halako ekarpenak, nahiz eta desadostasunak ditugun aurkezturiko proposamen horiekin, baina oinarria dira konponbidearen bidean aspalditik eskatzen dugun elkarrizketa bideratzeko eta espazio partekatu bat sortzeko. Ikusten da gaiaren inguruan gogoeta egiten duen oro konturatzen dela zein den errealitatea: emakumeek ezin dugu berdintasunean parte hartu eta horri amaiera eman behar zaio.

Gutxietsita ikusi duzue Jaizkibel konpainia, Sainduaren planteamendutan?

Argi dago ez dela Jaizkibeletik sortutako proposamena, are, Jaizkibelen kontrako jarreretan egon ahal izan diren pertsona batzuek sortua da, baina ez dugu sentitzen Jaizkibelen kontrako, mintzakidetzarako eragile gisa aitortzen delako Jaizkibel. Esan bezala, proposamenak bide ematen du elkarrizketarako, iritzi ezberdinei tokia egiteko, eta garrantzitsuena, ikusarazteko batzuek uste izan duten iritzi monolitikoa haien artean ere aldatzen ari dela.

Baina “haien artean” aldatzen ari diren iritzi horiekiko Alarde Fundazioak ezezko borobila eman du…

Gako inportantea da: nor dira agintean diren horiek? Nork erabaki du haiei legitimitatea ematea alardearen inguruan herri guztiaren ordezkari gisa azaltzeko, gutxi batzuen iritzia denean? Nor dira haiek, guztiona den ondarearen inguruan herri osoaren izenean hitz egiteko? Taldetxo bat da, aitortza txikiagoa edo handiagoa merezi duena, baina taldetxo bat. Jaizkibel askoz demokratikoagoa da zentzu horretan, asanbladan egiten dugu lan, gardentasunez, gure espazioak zabalik egon dira beti… Eta beste aldean opakotasun handia dago.

Horregatik uste dugu elkarrizketa prozesua eta lidertza udalari dagokiola, festak herriarenak direlako eta inork legitimoki ordezkatzen bagaitu udala delako. Aurten, Hondarribia Berdintasuna Hiria Saria Antzuolako alardeari eman diogu, eta aipatu dute Antzuolan emakumeek parte hartzen ez zutela eta gatazka konpontzeko Eusko Ikaskuntzara jo zutela, prozesu bat egiteko. Herritarren parte-hartzea gako inportantea izan zela nabarmendu dute. Hemen zer izango dira, hamar bat pertsona? Arazo bat daukagu, gardentasuna eta parte-hartze egokia udalak bermatu beharko luke.

Hondarribiko Udalak, aldiz, urtetan ez dio gaiari heldu.

Ostrukarena egiten ibili dira, edo hobe esanda, garbi posizionatu dira Alarde Fundazioaren alde, neutraltasun itxura eman nahi izan badute ere. Alde bati eman diote legitimitate eta botere osoa. Aurten udal berria daukagu [Abotsanitz] eta hainbat keinu mahaigaineratu ditu, adibidez festetako programan Jaizkibel agertzen da, programaren amaierako argazkia, denok elkarrekin, oso esanguratsua da. Hori bai, behin festak amaituta, martxan jarri behar da prozesu bat konponbide baten bila; alkateak berak adierazi du elkarrizketa prozesu baten beharra.

Horri lotuta, Alarde Fundazioaren botereaz aritu gara, eta elkarrizketa prozesua aurrera ez ateratzeko azken urteetako aitzakietako bat izan da ez dutela eseri nahi, ba eseri gaitezen nahi dugunok, herritar eta eragile asko eta asko gaudelako alardeaz zerbait esateko dugunak, ez dadila izan oztopoa haiek eseri nahi ez izatea, prozesua aurrera eramateko.

Eider Mendoza Gipuzkoako ahaldun nagusiak astearte honetan iragarri du harrera egingo diela alarde tradizionalari eta Jaizkibel konpainiari. EAJko aurreko ahaldun nagusiek ez ziren Hondarribira gerturatzen.

Akatsa da gatazka bat bizitzen ari garenean bi errealitateak maila berean jartzea. Emakundek edota Arartekoak orain arte egin duten moduan, berdintasunaren alde kokatu beharko litzateke diputazioa ere [Jaizkibeli babesa ematera gerturatu ohi dira Emakunde eta Arartekoko ordezkariak, urtero], zeren ahaldun nagusiaren jarrerak hauspotzen du herritar oso gutxik partekatzen duten ideia, bi alardeen ideia, bi aukera posible eta legitimoren ideia, eta ez, hemen ez daude bi alarde, gu ez gara alarde bat, alardearen parte izan nahi duen konpainia bat gara.