CPAEN/NNPEK-ek antolatutako Nafarroako VII Azoka Ekologikoa berriz ere Noaingo Zentzumenen Parkean ospatuko da. Naturaz inguratutako 25.000 metro koadroko ingurune apropos honetan, 30 ekoizle baino gehiago dituen merkatuaz gain, nekazaritza eta abeltzaintza ekologikoaz, gune ekogastronomikoaz, arraza autoktonoen abeltzaintza-erakusketaz, emanaldiez, tailerrez, zozketez eta haurrentzako guneaz gozatzeko aukera izanen da. Azoka “zero zabor” ekitaldia izanen da eta trantsizio agroekologikoaren inguruan informatu eta hausnartzeko aukera emango du, antolatzaileek gaur jakitera eman dutenez.

Nafarroako elikagai ekologikoen azoka honetan, gainera, ongi pasatzeko, nekazaritza ekologikoaren inguruan ikasteko edo elikadura sistemei buruz hausnartzeko jarduera ezberdinak egonen dira.

Nafarroako VII Azoka Ekologikoak batez ere Nafarroako ekoizleak eta enpresak hartzen baditu ere, beste autonomia erkidegoetako eta Frantziako ekoizleak ezagutzeko aukera ere izanen da. Horrela, Nafarroako ardo, gazta, garagardo, barazki, olio, ezti, arrautza, haragi, kontserba, ogi, pasta, esne edo gozagarri ekologikoei beste produktu batzuk batuko zaizkie, hala nola frutak, laranja-zukuak, txahal eta txerri-kontserbak, haziak edo kosmetikoak.

Azokak, parkeko erdialdean kokatuko den merkatuaz gain, haurrentzako gune bat, gune gastronomiko bat eta hausnartzeko parada eskainiko duen hitzaldietarako eta tailerretarako guneak izanen ditu.

Nafarroako VII Azoka Ekologikoa trantsizio agroekologikoari eskainiko dio edizio hau. Mirian Otxotorena CPAEN/NNPEKko lehendakariak esan du “premiazkoa" dela nekazaritzako elikagaien "egungo sistemaren gainean jardutea, elikagai justu, iraunkor eta osasungarriak ekoizteko eta eskuratzeko”. Antolatzaileen hitzetan "une erabakigarria da hau" eta, horregatik, lurraldeko hainbat esperientziak parte hartuko duten mahai-inguru bat antolatu da. Bertan, parte-hartzaileek mahai gainean jarriko dute zein urrats ematen ari diren eta etorkizunean norantz jo beharko den. Nafarroako nekazaritza- azaleraren %7 ekologikoan ziurtatuta dago. Europako Batzordearen "Baserritik Mahaira" estrategiaren arabera, zifra hori %25era iritsi behar da 2030ean: 8 urte besterik ez dira geratzen. "Nafarroa aurrera doa, baina egin beharreko bidea luzea da oraindik, eta horretarako dugun denbora-tartea laburra da", dio CPAEN/NNPEK elkarteak.

Mahai-ingurua larunbat goizean egingo da, 11:00etatik 13:00etara, eta Mirian Otxotorena CPAEN/NNPEKeko lehendakariak gidatuko du. Parte-hartzaileak hurrengoak izanen dira: Ester Montero (Arrea elkarte agroekologikoa), Arrate Corres (Subbética Ecológica); Thomas Erguy (Biharko Lurraren Elkarteko koordinatzailea), eta Hazialdeko elkarteko (nekazaritza estentsiboen elkartea) ordezkari bat.

Horrez gain, Itziar Gomez Landa Garapen kontseilariak azokara joateko deia egin du, eta adierazi du departamentuak apustu handia egin duela ekoizpen ekologikoa bultzatzeko: “Nafarroako Nekazaritzako Elikagaien Merkaturatzeari buruzko Bide Laburren Foru Legeak beharrezko txosten guztiak ditu gobernu-bileran onartzeko. Elikagaien merkaturatzea zuzenean arautu eta sustatuko du nekazaritza-ustiategien titularren eta azken kontsumitzaileen artean. Lege honen bidez, tamaina txikiko nekazaritza-ustiategiei lagunduko diegu, eta haien bideragarritasuna hobetuko dugu, lehiakorragoak izan daitezen”.

Egitarau oparoa, ostegunetik igandera

Hitzordu horrez gain, irailaren 15ean, osteguna, “Zure platerean hasten da mundua” dokumentala proiektatuko da Nafarroako Filmotekan. Ondoren, dokumentalaren zuzendariarekin solasaldia egingo da. Gune gastronomikoa Geltokik kudeatuko du, eta bertan, elikagai eta edari ekologikoak eskaintzeaz gain, dastaketak ere eginen dira. Haurrentzako gunean tailerrak, ipuin-kontalariak, jolasak, puzgarria eta tiobibo ekologikoa egonen dira. Gainera, abeltzaintza ekologikoaren erakusketa ikusteko eta musika-emanaldiak gozatzeko aukera ere egonen da.

Ostiralean irekiko ditu bere ateak azokak, arratsaldeko 17:00etatik 20:00etara. Larunbatean, 11:00etatik 14:30era eta 17:00etatik 20:00etara, eta gune gastronomikoa 11:00etatik 21:00etara. Igandean, berriz, 11:00etatik 14:30era.

Zero zabor azoka

Nabarmentzekoa da, halaber, azoka zero hondakineko ekitaldia izango dela. Sortutako hondakinak minimizatzeko, berrerabiltzeko eta birziklatzea bermatzeko moduan diseinatu, antolatu eta garatu den ekitaldia da. Ahalik eta hondakin gutxien sortzen duen ekitaldi bat, eta, gainera, elikagaiak alferrik ez galtzeko neurriak hartzen dituena.

Nafarroako ekoizpen ekologikoa ezagutzeko beharrezko ekitaldia

Azoka ekoizleen eta kontsumitzaileen arteko topaketa izanen da. Baina azokara joaten direnek, erosi, dastatu edo jarduerez gozatzeaz gain, hedatze-prozesuan dagoen sektore bat ezagutzeko aukera izanen dute, Nafarroan 800 operadore baino gehiago eta 2.500 elikagai ziurtatu baino gehiago dituena. Izan ere, aurtengo lehenengo sei hilabetetan 108 operadore berri gehitu dira ekoizpen ekologikoan. Gauza bera gertatzen da kontsumoarekin, gero eta pertsona gehiagok eskatzen baitituzte elikagai osasuntsuak, kimikorik gabeak eta modu iraunkorrean ekoitziak.